ACHSAH
(Aksah ci-in sim in)
A ngah ding hamphatna la thei
Adeih thuah Numei
(Josh 15:16; Judges 1:12, 13; 1 Chronicles 2:4, 9)
Agelh ~ Rev. Dr John Thang Hum leh
Dim Lun Zam
Achsah (Aksah) pen Kaleb in khatbek aneih tanu ahihi. Kaleb i cih pen Israel te Kaanan gam a zuatlai a Joshua tawh kibang in, thuman tak a, makai Moses nungzui khat ahi hi. Achsah min khiatna ‘Kizem’ cih nopna hi. Sanggam pasal zong 3 nei hi (1 Khang 4:15).
Othniel tawh kiten na
Joshua in Pasian thupiak bangin Kaleb gamh (tanh) pia hi. Kaleb in ama ngah gamsung pan Anak mite hawlkhia hi. Alak ding maban omlai ahih manin lungkim theilo in lak suak ding ngaihsun hi. A mahmah pai kul lo a, apian theih nading in tua dan a-ut, a lazo ding mi a om leh a tanu pia ding cih kamciam pia hi. Kaleb sanggampa tapa, Othniel in tua thu azak ciangin lawp mahmah a, va kuan pah in galte a omlai teng hawlkhia siang hi. Tua ciangin Caleb in a kamciamsa om bangin a tanu Othniel pia hi (Thukhente 3:8-11). Hih luah ding gamah amau gamh (leitang) thupi mahmah hi. Banghang hiam cih leh Izipt gam ah, na nakpi tak in asep uh hang aluah khak ding bangmah omlo hi. Atu atate tungah a nusiat ding vangil leh leitang khat zong omlo hi.
Leitang nget behna
Hih a ngah sa uh Negeb gam pen leitang hoihlohna sehtak gam ahi hi. Tuikhuk gina omlo in ankung leh singno ki ciin theihna ding mun omlo hi. (Hih Negeb zangkuam pen Israel kumpi te siamna hangin tu hun in singno leh lo hing tawh dim hi). Aksah in a pasal tawh kikum in a pa kiangah tuikhuk omna gam teng zong na ngetbeh hi. Caleb in zong nungngat san hetlo in na piapah hi.
Thukhupna
Aksah leh a pasal gamtatna huaiham vai asa zong om ding hi. Ahi zong in hih Aksah te nupa gamtatna pen kha thu tawh kipawl khat ahihi. Kha lam ah zong Pasian in duhhop ding hong deih hi. Mi khenkhat te in, Pasian in i kisapna hong thei a, bangmah ngetnget kul lo hi, a ci pawl zong om hi. Ahi zong in Laisiangtho in ih kisap thute Pasian tungah nget tangtang ding ahihna hong gen hi. Ngen lo a hong ki pia na tampi ih ngah hi. Ahizong in Pasian in ih nget ding hong deih hi. Ih nget ciangin; khatna ah- Pasian in na khempeuh’ bulpi ahihna a pulak ih hihi. Nihna ah- Pasian in kizopna deih Pasian hi-a, deih leh sap ngetna in kizopna nei ih hihna hong lak hi. Athumna ah- Pasian pen a cingh Pasian ahihna hong thei sak hi. Luke 18 na-ah, lungkia lo a, ih deih, i kisapte i ngah masiah nget ding ahihna meigong nupinu tangthu tawh na genteh hi. 1 Khang 4:10, ah zong Jabez in Pasian tungah duhhop tak in thu na ngen a, Pasian in a thungetna diksa in pia hi.
Pasian in leitung nate sang Kha Siangtho nget ding hong deihsak zaw hi. Leitung nate ih kisap lam thei hi. Ahi zong tuate sang a kisamzaw abulpi Kha Siangtho ahihlam hong gen hi. Aksah in tua sehtak gam ahoihsak theih nading a kisam tuikhuk ahih na thei hi. Aksah apil ahi hi. Pasian in thupha apiak mite en leeng, a minthan na ding azangh kik thei ding mite zong na hihi. Late 2:8 na ah, leimong donga ih nget ngam ding Pasian in hong gen hi,’.
Aksah leh a pasal in tua nungsang ah suan leh khak bangzah nei a, bangteng sem hiam cih akigelh loh hangin Pasian in maipha pia ahihna ih mu hi. Othniel in a sungh pa lunggulhna tangtun in, Israel mite gal pan a hutna ah Pasian lungkim hi cih ih thei hi.
Dotna
Aksah pa Caleb thu Laisiangtho in bangci dan in gen hiam? (Gamlak vakna 14:20-35 sim in)
Othniel bang cidan mi hi ding in, ki ngaihsun thei hiam?
Aksah in banghang apa tungah tui khuk te nget beh hiam? Hebia 13:5 na tawh etkak inla a kilam danna gen in.
Aksah in tuhun ading khalam thu bang hong gen hiam? (Matt 7:7-12;1 Kor 14:1), te tawh et kak in.
