Hing Eive! (He Lives)
(Matthew 28:6)
Agelh~Zam Khat Kham
Alfred H. Ackley (1887-1960)
Alfred H. Ackley (1887-1960)
“Tua a sisa Jew khat bang nuammawh-a bia laizang ding ka hia?”
Hih la a mal leh a-aw a phuakpa Alfred H. Ackley in evangelistic cialpi a bawlna a kikhawm Jew-te tangvalno sangnaupang khat in lungsim takpi-a adot ahi hi. Evangelist Ackley in, “Amah hing aive! Hong gen ning aw, Amah si zenzen lo ahi, tu mahmah in hi lai ah nungta ahi! Tu mahmah-in tua Zeisu nungta teekteek ahi. Kei’ nuntakna mahmah, tua bek thamlo mi tultampi sim zawhte’ nuntakna tungtawnin hong lakthei ding hi’ng” ci-in dawng hi.
Ackley in alungsim khempeuh-in tua banga dawnga tua tangvalpa in Zeisu Khazih a san nading a hanciam na khempeuh la dawngkhat hongsuak hi. Lungdamna Thu bute sunga Zeisu’ thawhkikna a kigelhnate a sim kikkik ciangin “Amah thokik zo hi” cih kammalte in khiatna thak nei mahmah hi. Tua thawhkikna thu in a lungsim a lawnna pana hong phulkhia la ahi hi. Laisiangtho’ hong hilhna, ama’ lungtang sung mahmah-a a theihna, tangthu mahmah in teci a pannate in sim zawhloh mite’ nuntakna-a a tuahsa uh thu leh teci panna ahi “Amah nungta hi” cih thu honglak hi. Tua a nungta Zeisu Khazih in ompih gige ahih manin hih la a phuah laitakin zong haksa het lo-in phuak thei ziau hi. A mal leh a aw phuah khat-a a phuah pah ahi hi.
Rodeheaver Company in 1933 kuma a khet Triumphant Service Songs labu sungah kihel pah a, tuni dongin evangelical pawlpite’ deihpen la khat hi den hi.
Hih la a phuakpa A.H. Ackley January 21, 1887 ni-in America gam Spring Hill, Pennsylvania ah suak hi. Music sinna kician mahmah a nei mikhat hi a, laphuah zia mahmah zong England gam London khuapi-a Royal Academy ah sin ngiat hi. Cello tumsiam minthang khat zong ahi hi. (Cello i cih violin tawh kibang khauzang kisai tum theih hi a, khuk kikal-ah kinga-a kitum ahi hi. ZKK). Westminster Theological Seminary ah pilna sina a zawh ciangin Presbyterian pawlpi ah 1914 kumin ordination kipia hi. Pennsylvania leh California ah Presbyterian pawlpi te kemin pastor a sep kawmkawmin hymn mal leh hymn aw phuak den hi. Gospel la leh hymn dawng 1,000 val phuaka, Rodeheaver Company-te huh in labu tampi kaikhawmin khenkhia hi. Pasian’ la phuahna leh lasakna lam a hanciamnate pahtawina-in John Brown University in Doctor of Sacred Music Degree pia uh hi. July 3, 1960 ni-in Whittier, California ah si hi.
Verse 1
Kei Topa a hing ei ve, Tu'n zong leitungah om,
A hin kik ken thei gi ge, Mi te'n bang gen ta leh;
A mah'n hong hehpih thei a, hong hopih na ka za
A mah ka sap lai takin hong nai gi ge.
Chorus
Hing e (hing e) hing e (hing e) hong hon khazih Topa,
Hong tonpih-a, hong hopih hi, ka paina khempeuh ah,
Hing e (hing e) hing e mihing hon khia Topa,
Bang ka ci theih hiam nong cih leh,
Ka lung sungah hing hi.
Verse 2
Ka kiim Leitung mun khempeuh ah hong itna ka mu,
Lung khamna ka thuak zel hang,
Ka lung kiangei kei ding,
Huihpi nuna tengah,
Amah'n hong kha ken ka thei,
A mah hong kilat ding, hong tung ding hi.
Verse 3
Nuam un, nuam un Zeisu mi, lung dam in la sa un,
Hin tawntung Hallelujah,
Zeisu Khazih Kumpi,
Muan na tawh a zong mi ten,
A mah mu thei ding uh,
Tua bang itna a nei mi dang om ngei kei.
Source:
Christian Hymn-te’ Tangthu (Laibu)
Agelh leh laibu bawl: Zam Khat Kham
Laibu Saal / Zomi eLibrary
