NUNGAKPITE
Agelh ~ Khoi Lam Thang
Tangvalkhaat ; te khit ciang nungak ham ; te (nungakpi ci ni) tawh kisai tawm gen ni. Nidang lai in kum 20 val peuh leh nungakpi dan dingin kituat hi. Ei'n kum 35 tungsiah nungakpi dingin seh pong dih ni
Tangvalte kiho uh a,
"Tua nu na tenpih sawm, a kum tamlua ta hi lo maw"
a cih leh a lawmnu kumtam khin taleh lungkialo a, tenpih a sawm pa in;
"Pha mawh kei a guh peh ding hi kei"
na cihsak ziau hi. A lawmpa’n a dawnkikna ah:
"A guh peh ding bel hi kei mah ven, a tui kang thei eive"
ci in na dawng thuk kik leuleu hi. Pasal neih in "hun" nei a, hong kheng thei hihtuak hi.
Pasal neih peuhpeuh ciangin nungak hun a bei hi ta hi. Sanggam pasal muanhuai 10 na nei phial zongin pasal na neih kei leh nuntak bucing thei taktak lo hi. Vaang kim thei lo hi. Na hat lai, na zonzawh lai in, kei le kei ding thei lel ing na cih hangin, nu le pa te hong om nawnlo, sanggam pasalte'n zileta hong nei in inn khawng hong tuan ciangin na ngaihsutna hong kikhel veve ding hi.
Tua bang i cih ciangin pasal neite a nuntakna uh bucing pah, vangnei pah cihna zong hi khin sam lo hi. "Hih nu banga pasal ka neih sangin nungakpi in ka om mah manpha sa zaw’ng" a ci nungak tampi om hi.
Nungakpi a tamzawte "Mi’ ngaihlohte" hi lo uh hi. Lawmngaih tawh kikhen ngeia, lungtang kitam- sate, a khensat ngamlote leh nu le pa khualna tawh pasal nei ngamlote (upente hi thei deuh) hi thei hi.
Bangbang i ci zongin, hunsau ading a ngaihsut uh ciangin pasal neih ding mah hi ci zaw uh hi. Numei in va pat masak ding taktak piang thei salo uh hi. Tangvalte’ hong pat ding ngak gige uh hi. Hong zawlleng om leh "Mi ngaih ki-angtangsak thei" a, a lungsim tawng-ah lungkim mahmah uh hi. A dinmun (a hihna) thupi sim peuh lecin hong neumuh tuanlo ding hi.
Source:
SIHNA IN HONG KHEN MA TENG (Laibu)
Agelh: Khoi Lam Thang
Laigelh siapa in Laibu Saal / Zomi eLibrary ading in phalna ahong piak ahi hi.
cinpuzomi@gmail.com
