MAKAI LEH KAMPAU KIDOPNA
Agelh ~ Lian Muan Kim
Numei pasal a neu a lian a kuamah ciat kampau kidop ding cih pen i theihsa hi na pi zuihbaih lo hi. Kidawm taka kampau theite mipil hi a, mihaite haina pen a kamkat uh ciangin kilang hi. Zeisu sanggampa Zakoh in leii pen aneu mahmah hangin na lianpi uk hi. A neu mahmah hangin kizualsak zolo hi. Gammei a kangsak mei-am neu tawh kibang hi, ci in gen hi. A cih mah bangin maan takpi hi. Mi khempeuh in i leii i uk zokei-a i zual zokei hi.
A diakdiak in ci leng, makai khat a dingin kidop huai zawsem hi. Banghang hiam cih leh mipite in a kampau ngai uh hi. Taksan pah uh a, ciamteh in telkheh lai uh hi. Kam hoih khat a pau leh leitung in noptuamna ngah thei-a a hoihlo khat a pau le lah siatna tun pah thei hi. Siatna ding leh phatna ding pen makai pa leii ah om hi.
A dangdangte sang in hilai ah i ultun saknop thu in elpauna, kobawlna ahi zongin zahpihna kampau’ te ahi hi. Khantawn man ding khawnga khelpauna te zong a gen nuam ihi hi. Makai pawlkhat in a nungzuite deih a bat phatloh uh ciangin kobawl in dopbawl lo uh hi. Gina kei u teh; santai kei u teh; lailawm kei u teh; Kimanna nei kei u teh, khawng ci-in hap gawpgawp thei uh hi. Deih banga a kalsuan loh uh ciangin zong haibawl pian thei hi. Mihing hihna leh nungzui hihna tawh kikhial thei ki thanem thei cih phawk gige ding kisam hi. Khialhna khempeuh daan piak pahpah ding hilo hi. Gennop, cihnop khempeuh zong cih pahpah ding hilo a, genhuai cihhuai te gen ding, cih ding hi zaw hi. I gennop i cihnop zah sehthum suah sehnih, i cillum tawh valh leng a om lai teng na ngawn zong tamlua lai kha ding hi.
Mi lu tunga thovai tu pen sek tawh sat ngei ken la, mi ngawng a lungkhap pai namsau tawh vat ngei ken. Khialhna neu khat hangin sawm vei tai kei in la, sawm vei khialhna hangin khat vei tai zaw hi. Kisam lo pi in kamkha tawh ci se ken la, thudam in kamkhum tawh hilh zaw in. Na heh mahmah phial le zong ki-ip keeikaai in la, thuak keeikaai in. Na heh mahmah laitak in tai nai ken. Nang na khial zaw kha ding hi. Tua hi leh nasep pih ding mi gina na neithei zaw dinga, mi ginate zong nang kiang hong utpan ding uh hi.
Kampau na kidop zawh mahmah kei khak a le zong mawh maina na nget mai ding thupi hi. Khat vei D.L. Moody in a cialpi bawlna khat uah la makaih a, Mr. Sankey in piano tum in mipite a makaih ziahziah lai tak un Moody in Sankey kiang ah: Na khawl pak o, hia lai ah kikhawm dinga hong pai khat mu ing. Hua pa pen tusun in ci ngawh kha pian mawk ing. Mawh maina va ngen pak ning, ci-in pai vingveng hi.
Ida le David in a tate uh College kah a, lukhu nelkai a khuk ding uh deihsak mahmah uh hi. Ahih hangin David in kha khat in $ 150 val ngah zo mahmahlo ahih manin haksa sa uh hi. Hi gaigai phial mah ta le-uh a tate un lai a hanciam tentan nading un hanthawn den uh hi. Tua bang kawmkal pan a tapa khat ahi Arthur in tan 10 a on khitphet in nasep hong ngah hi. Tua laitak in a sanggampa khat uh ahi Edgar pen sitni (Law) sang hong kah hi. A omlai ahi Dwight zong College pan buaih hong ngah in a sep pak ding a theihloh teh Edgar tawh ki thukimna khat hong bawl uh hi. Tua in bang hiam cih leh Dwight in kum 2 sung nasem in a ngah sunsun tawh Edgar huh ding leh Edgar zong a sangman ciangin Dwight huh kik ding cih ahi hi. A kithukimna mah bang un hong hithei pah hi. Ahih hangin Edgar in Dwight a huh hun ding teh Dwight in ngaihsutna dang khat hong nei hi. Tua pen na dang tuamtuam sep ding sangin galkap tum ding ahi hi.
Tua bang khensatna a neih ciangin Ida le David in thukim pih hetlo in, zong deihsak hetlo uh hi. Deihsak hetlo uh hi ta se leh Dwight kiangah thudang bang mah genlo in: Nang thu ai ve, ci ziau uh hi.
Hih nupate'n Dwight galkap tum ding deihsak hetlo ahih hangin phunsan lo in, zong khamlo uh hi. A ki-ip keeikaai ua leh tua Dwight pen kum tam simsim khit ciang- in America-te' General, tua khit teh President Dwight Eisenhower hong suak hi.
Source:
Makaih Pilna (Laibu)
Laibu Saal / Zomi eLibrary
