Community College saang siauzia ding
Agelh ~ Tg. Khaipi (Zolimtui)
US ah saangkah ding pen leitungah khangno tampite ii a ki-ut mahmah thu khat ahi hi. Sum nei ta kei lecin, na sawmnaak leh, kah theih dingin kumpi in a vaihawm ahi manin, pilna zong nuamte adingin hamphatna lianpi khat ahi hi. Tua manin, ei mi sungah zong a kahnuamte a ding lam lakna in tawm khat hong hawm sawn nuam ing. (Hih bang i at ciangin, thei pen pil pen cihna hi zaw lo-a, a thei nuam 1 le 2 in na phattuam pih hen cihna tawh ka hanciam ahi hi. Hih sung information khempeuh zong situation khempeuh ah kizang thei lo kha mai thei ding hi. A huamkima theih ding cihna bek hi.)
Step 1 Siau ding
Amasa penin na kahnopna saangah application ten masak kul hi. Tua lai ah High School Diploma / GED certificate kisam hi. High School Diploma pen Kawlgam pan ahih leh, notory leh credential evaluation bawl kul hi. Hih credential evaluation pen Kawlgam aa na sinsa teng US saanglai a sin bang hile cin, bang teng sinkhina, bang level in ong na hiam cih a ciaptehna lai hi. Hih dan a bawl, service a pia, company omin, certificate khat ciang a tawm pen US$100 kipia kha hi.
Step 2 Entrance test
Entrance test phi kul hi. Gamdang pan na hi zong, US pan Highschool ong na hi zong hih test phi kul hi. Gamdang pan direct a siaute in bel TOFLE/IELTS score lak kul hi. Hih gam pan Highschool kahte in bel ACT or SAT test Highschool a kah lai-un phi khin ahih manin kisam nawn lo thei hi. Ahi zongin a mat a hoih phat kei leh, a phi kik kul ding hi. Univesity leh College minthangte ah ACT or SAT ah mat sangpipi deih uh hi. ACT or SAT na neih kei leh, CCommunity College te ah amau Entrance Exam sum beilo-in kiphi thei hi. Na mat hoih lo-a na phi kik nop leh, sum piak kul hi. 10/20 $ bek hi. Hih test ah Math leh English (Comprehension, Writing, leh Grammar) kihel hi. Amau deihzah score na ngah kei leh, saang kah ding hong sang hangun, college level course sin thei lo-in, na thanem pen Math or English Highschool level sin kik ding hi teh. Tua na ong ciang bekin college level kila thei pan hi. (Hih pen community college paizia bek ahi hi.)
Step 3 Federal Student Aid siau kul
Federal Student Aid siau kul hi. ( https://studentaid.gov/h/apply-for-aid/fafsa ) Credit 12 leh a tungsiah na lak leh, fulltime saangnaupang or saangkahin kisimin, huhna a vek mahin na ngha ding hi. Credit 6 pan 11 kikal pen half-time in kisimin huhna alang na ngah ding hi. Credit 6 nuai siah ahih leh, part-time kici in huhna tawm cik bek na ngah ding hi. Hih huhna pen tuition man ding hi pi pen hi. Khat veivei laibu man ai ding zong cian thei sam hi. Tua ciang, hih huhna pen kum-2 community college ah tuition ai ding ciangin kicing bek hi. Kum 4 saang University ah na trasfer ciangin, kicing nawn vet lo ding ahih manin, na kahtoh beh sawm leh, nang le nang sum na kiging kul ding hi. Aih kei leh, kumpi student loan interest tawmin kila thei hi. Student aid leh student loan gawm le cin, na saangsaap cing mialmial thei kha bek ding hi. Saang hoih saang minnei pianah bel kicing nailo ding aih manin, private loan na lak beh kul kha ding hi. Tua manin, US ah sum neilo aa sum ba nuam lote pen Associate Degree/ community college ciang tawh pilna saangkah ah khawl uh hi. Studeh Aid pen income tawm innkuante bek in a ngah hi-in eimi bang bel a qualify lo ding ki khaak mahmah kha ding hi. Theih ding khat ah pongmaan kum 2 kah ding (Associate Degree) pen kum 3 ciang bek hi. Cih nopna ah kumpi huhna tawh saang na kah sawm leh associate pen kum 3, bachelor pen kum 6 sungin zawhkul cihna hi. Hih hun sunga na zawh kei leh, huhna ngah lo ding hipah hi. Hih huhna pen bachelor ciang bek huamin, degree ngah khin/ngei sa hi lo ding hi.
Saangsaap tawh kisai theih dng khat ah na tuition rate pen na residency tawh tampi hong kisai ding hi. US ah saang khempeuh pen Gamke state ii khut nuai ahih manin, na omna state mah ah kah le cin, tuition fee tawm zaw hamtang ding hi. State khat ah residency ngah na dingin, kum khat sung tua state ah nasep kul hi. Tax return khat vei bawl kul hi. Aih kei leh, tua state pan highschool na man kul ding hi. State dang pan aa tai-in state dang khat ah saang na kah sawm leh, hih state resideny ngah masa lecin, na saangsaap tampi kiam tuam ding hi.
Step 4 Orientation leh Academic counseling kah kul
Orientation leh Academic counseling kah kul hi. Counseling ah na major ding ai zong, na class lak dingte hong register pih ding uh hi. Orientation zong tua dan pian mah cih ding hi. Financial aid tawh kisai dot nop a om le zong advisor a tuamin koih uh hi.
Thukhupna
Saangkah pen hun, sum, tha le ngal, lungsim pumpi a kipia khia ahih manin na kah ma-in na major ding hoih tak ngaihsun khol in. Na kah kawmin zong ngaihsunin, laih huai le zong laih lel in. Na hanciam degree tawh nasep kician na mu zo mah diam cih zong ngaihsut ding khat ahi hi. Na uuk (interest) leh saang man ciang na zat theih pilna, hih te nih kikal khinkhai' theih ding kisam pha mahmah hi.
Laibu Saal / Zomi eLibrary
