ZOMI TE LEH MUALSUANG
(ZOMI LAWKITE LEH KHANG KIDEMNA)
Agelh ~ Pu Thang Siangh
Zomi ih Pu ih Pate in Khang taangthu ciaptehna laibu neilo uh hi. Laikawi khatzong tawh kinahvawh lo hi. Khangsawnte tungah humuap na namkim zangin ciapteh huai thu khempeuh hilh uh hi. A hilhnop thu khempeuh ciapteh ol dingin taangthu bangin gen uh hi. Paunak zangin a lungsim sung leh a sisan sungah ateeng tawntung dingin hilh uh hi. Amau gualzawhna ahi zongin kam siatna te ahi zongin la phuakin khangsawnte sutsak kikkik uh hi. Amau nopsakna, gualzawhna hehna, tuahsiatna, khempeuh pen atu-atate min suaksak hi. Tua khempeuh pen laibu taangaa kizang Khang taangthu ciaptehna ahi hi.
Mualsuang
Leitungah Phawkna-Mualsuang phut masa pen Jacob hidingin ka-um hi. A uupa’ innluahza be-meh kuangkhat tawh a khemkhit ciangin a Pu Laban kiangah galtai hi. Lampi ah khuamial a, gammaang singzing lakah suangpeek lukhamin ihmu hi. Amang sungah vantung kongkhak kihong a, kahlei khat ama lukham suangpeek sunin kikhungsuk mu hi. Vantungmi tampi kahto sek tuaksuk sek mu hi. Kahlei dawnah Pasian pau a, Abraham tungaa kamciam ama tungah akipakna thu gen hi. A khanlawh ciangin, "Hihmun in Pasian inn kongpi hilo hiam," ci-in a lukham suangpeek phut hi. Tua laimun pen Bethel ci hi, tudongin omlai hi.
Moses in Santuipi a kaan ciang ahizongin, Jordan gun a kaan ciang ahi zongin Israel phazah suangtum kaikhawm in mualsuang ciang uh hi. Tua thu khempeuh pen Israel mite khangtaang thu ciaptehna hipah hi. Tuhun in khuapi luite kito kik a, mualsuang te leh kawmpang tungaa lim kisunte tungtawnin amau nuntak sung nasep ziate kimu thei hi.
Ih Pu ih Pate in mualsuang bangci phuh
Gaalman-saman kidem hunlai-in pasal ngalhaat te in Mualbawlin, mualsuang phut hamtang uh hi. Tua mualsuang phuhna mun dingin vaikuante leh khualzin gamvakte aading khawlmun hoihna teel uh hi. Khawlna nuam theithei dingin phung ciangin suangpeek nopci takin phah uh hi. A thah-amat khempeuh suangpeek tungah lim sunin suang uh hi. Khuang, zam aa kipan aneih-alam thupi zawdeuh suang uh hi. Sial, bawng aa kipan ganlian a khawite lim zong suang hi. Agawh-aluup limte zong suang hi.
Khawlmun nungah suangpeekte tangtakin phut phei dimdiam hi. Tua mualsuang nunglam totamin lei hoihtak maih hi. A samat zah suangciip la-in a dimin phut hi. Mipi khawlna niliap dingin mawngkung golpipi te suan uh hi. Mualsuang a phuh ciangin Siampipa in phuisam a, taiteh tui buakin phut hi. Mikhat peuh in a suksiat leh cidam lo hi. Ama luang in sawng thei hi. Khe tawh mualsuang kimawk suih ngamlo hi. A tuante khekhultum veii-in si hi. Tua bang tatsiatna azangkha te pen zawngkhalin khuasuaklo kici hi.
Mualsuang phuh pen Lawkin te bektawh kisai kisa a, piangsual pawlkhatte in mualsuang te simmawhin heitawh saatliam, sukpaih sak, cih bangin a tuamtuam in susia uh hi. Mualsuangte pen thupi mahmah hi. Laibu’ taangaa kizang Khang taangthu ahi hi. Mualsuang phahte leh mawngkungpi te pen mipi te noptuamna dingaa kibawl hi a, neu ngaihsut ding hilo hi. Tua a susia kha te pen minam buppi leh khua buppi’ phattuamna susia ahih manin khautak in, hilh ding kilawm hi.
Innteek te elnopna leh gamtat siatluat manin a liaap dihdiah khawlna nuam mahmah mawng kungpi peuh sat heeu mawk uh hi. Suangphahte longkhia-in puamai uh hi. Mualsuang neite in pammaihsa-in ciliing liang uh ahih ciangin mipi’ phattuamna ding ngaihsun ngam nawnlo uh a, inntual khawngah tuahin phut uh hi. Christian pawlkhat in Lawki vai danin ngaihsun a, suangphah peekin zang uh hi.
Hihte pen mitkeuh hun hong tun ciangin deihmahmah a, zonhun hong tung ding hi. Pawlkhat te in Han ah lukhung suangin phut hi. Taangthu tampi gelh uh hi. Tua bangte nangawn saili [sailung] tawh kaap paat se uh hi. Nitumna lam mite in Han ah mualsuang nakphuh mahmah uh hi. Kumcin simin paakhoih mahmah tawh thaksuah sak zel hi. Kisuksiat sak mawk om nawnlo hi.
a. Ka khuamual a, lailu kasuan nun a meng nam veel veh aw,
b. A nun dawnglai pal bang kaban pal ahul kha ding hi e.
a. Pupa khuamual dai aa damsa lumsuang paallai suan ing e
b. Pupa khuamual dai aa damsa pupa khuamual a tulsa aw lailu a kapal sak e.
a. Sangkaap tek a laihen tek a, sing zuapan hen mual nei e dawh suangphah e.
b. Kei pawh lianu taangpa hileng kazua sangkap henmual neilo dawhsuang phahsak nuam ing e.
Tuni dongin lailam nasepna thaneem bek thamlo-in, lailam kipawlna-kip kineizo nailo ahih ciangin Khang taangthu kaihkhopna zong kiptak khotak kinei zolo hi. Dawibiate’ ngeina ci-in kineu seh a, a banbanin mong beibei lel hi. Ka innpi uh Tapidaw hong suah ciangin ka Pu uh nungtalai hi. A zitawh khahualna ahi a Songpi phukpai uh hi. Ka Pu hong pai a, a Songpi kawikawmin kap hi. "Kazi tawh kakha hualna hiven maw, nasa sing ei" ci-in tawlpikhat kap a, a kim aa om khempeuh kidiiklo khatbeek omlo hi.
Tuhun ciangin innphiat kici a, molhtum tawh a sing a suang vaatin dawi hawlkhia uh hi. Api apu tuanna maante saatzan sak mawk uh hi. Zu-um sungah dawilut ci-in avang hu a, lokgawpin a that kineih mawk uh hi. Kamsang bangin kibawl a, pianna nu hawlkhia a, apuan-anik khempeuh haltumsak mawk hi. Dawi icihpen vantung pan aa kihawlkhia vantung mite hi a, tua bang mawk a, bawltheih nam hilo hi.
Amaute in singpi lian beello hi. Uum leh beel lakah teenglo uh hi. Mihingte’ thahlup theih hilo hi. Khanglui vante ih suksiat manin dawite a tai ding hilo hi. Pianthakna pen bangkua kikhenna ding hilo hi. Nu leh Pa, Pi leh Pu tawh gaalsuahna hilo hi. Mipum tungaa Khazih silhna hi a, leitung nate in khaktan tuanlo hi. Pasian a biate in lungsim leh kha tawh biak ding ahi hi.
Khangluite in mualsuang a phuh ciangin amau hun a, dawibiakna tawh kituakin seem uh hi. Tuhun mualsuang ih bawl ciangin Tapidaw upna zui-in thungetna tawh lungdam ko-in kiphut hi. Biakna leh Ngeina tonkhawm tawntung ding hi.
Laibu Saal / Zomi eLibrary
