NUPA ICIH
Agelh ~ Tha Suante
Nupa icih ki it kingai a kiteng ahih hangin, kitot, kiselna om lo ding kici ngam lo hi. A hoih deihna hang kitot,kinial na piang thei ve2 hi.
Nungak/tangval lai, ki it kingaih lai leh kiten khit lungsim kibang lo hi. Kiten khit ciangin ginat na lam thupi kisa zawta hi. A kitawng, kinial phunsan khempeuh a kimudah hipah lo hi. A kimudah taktakte kitwng kinial,phunsan se loin,"Gulin kamei hong sikin, ken tuleng,"cin kipang khinkhian bek hi. A hoih zaw ding deihna hangin kitot, kinial na omin, kilai liang zong om theih hi. Hihte deih atel hilo in, a hong piangvat thute hang ahih manin, pelh theih loh hun a om thei ahi hi. Bang2 ahita zongin, kitot, kinial nate tate leh midangte mai ah ahih loh ding hanciam ding ahi hi.
Nupa icih ineihsa itna silo in anuntak tawntung ding hi. I ki ngaih lai leh nupa suah khit pen kilamdang mahmah hi. I kingaih lai kamsiam i kituh hun hi a,nupa isuah ciangin thumaan, thutak i kituh nop hun a hong hi hi. Kingaih lai pen kicimtakna omlo,ngah loh ding patauh hun hi a, kiten khit ciangin kicimtak theih hun ahi hi. Kingaih lai kimaivil hun hi a, kitehkhit ciangin tuate thupi kisa nawn lo thei hi. Dorothy Dix in, "Kingaih lai kamsiam lawmta suah nang,kiten khit kamsiam nuntak nang," naci hi. I ki it i kingaih lai kamsiam i kituh mah bangin, i kiteh khit ciang izop pai suak ding ahi hi.
Nupa icih lungsim paizia,deih na kitheih pih ding hi. Lungsim, utlam,duh leh deih ip loh a kitheih pih ding ahi hi. I kitheih khit ciang in kilungkimsak tuak ding ahi hi. Kitheih siamtuah na in innkuan sung ki itna khangsakin, lungkimna hong guan hi. Nupa icih nop leh dah a thuakkhawm dinga kigawm ihi hi. Khat lungkham mahmah khatin phawk pih vet lo cih bang om thei mawk mawk hi. Zi/pasal lungkim lo kitawmin ahan2 ciang thudawn lo in, "Nanu/napa gilo vaksan ni," cih bangin kihem khe thei hi. Tua in hoihna sangin asia zaw tun thei hi. Lungkim lohna a om leh ahoih na ding i vaihawm khop ding hi. Lungsim kitheih loh man siatna a pian theihzia pen lamdang mah2 hi.
Lungsim kitheih tuah lohna in siatna apiansakzia:
Gentehna:
zum lai-at(cleck) khat ama mawhna om lopi-in,zum ukpa(officer) in tawnggawp hi. Tua ni kilung nuam sak ding cin zum tuah ciangin, Akkha satin inntung hak hi. A zi in a pasal inn tunhak pen athu ala kan lo in na hehsan sawn2 hi. Azi in, "Tuni bang thu om ahia,hong tung hak sicia,ka lungnuam hetlo hivan," na cileh a pasalin,tua ni thupiang teng genin kikhasiat ding uh hi a, azi in, "Na koiteng kawivak2 na hia,duh na hih leh na ann ne ou," nacih san zaw lai hi. A pasalin, "Ann zong duh ngap keng e," acih leh azi in, "Zawlgau vei a ann zong nengap lo hi ding hive cin," cithuah lai ahih manin,pasal nasa lua, zi in lah mai vil thei lo cih bang om thei hi. "Nu- mei kamsian,maitai na in,nuntak nopna hi," (A cheerful wife is the joy of live).
Nupa kalah thuneu thulian cih a om ding hilo hi. Tua bang lel thuneu lua icinte in bang zah gim na, lungkhmna hong tun hiam? Nupa nangawn hong kikhensak zo mawk hi. Joseph Sabbath in, "Ka thukhenna thu tul tampi sung ka et ciangin,nupa kal thusia,thubuai hang kikhenna atam pen thuneu gen tham loh a kipan hizaw hi. Zite in a pasal kuankhia kamkhum toh kha in, atun ciangin maitai tak in na dawn leh nupa kilem lohna, kikhenna tampi bei ding hi," cin na gen hi. Nupa kitot,kiselna, kikhen na pen kimuhdahna hang hizaw loin,zi/pasal in ilam et bangin hong kihih khak loh nuntak, gamtat loh hang hizaw den hi.
A kigen khia pak2 lo lungsim pumpi deihna kitheihpih loh man, kilungkimsak loh man,a deihhuai lo om thei hi. Tulai sex ciziau in, khang masate in, "Puannuai thu," ci in na hem gen uh hi. Huh thu toh kisai kitheihsak tuak, kizaksak tuak thute kigen kiho ding ahi hi. Miten genzia a tuam2 in na gen uhi. Upe twin in, "Nu/pa hileng thei to2 ning cikha kei un," na ci hi. Dr. G. V. Hamilton in, "Nupa kitotna atam pen pumpi tha kituah lohna pan piang ahi hi. Pumpi tha kituakin, lupkhopna thu ah lungkim peuh leh thudang2 hang kitot nate mai2 thei lel hi," na ci hi. Hoffman in, "Nupa kikhen sawm ah kuate sex nawngkai na nang hi," naci kik hi. John B. Watson in, "Sex thu ah nupa kizopna in,nuntakna sungah,nupa nopsakna asia sak thei a thulian pen hi," naci leu2 hi. Tua ahih manin nupa lupkhopna toh kisai thulian thuneu cih om loin,kitheihsak,kitheih tel tuak ding ahi hi. Papite a lunglen ciang in, "Inn leh lo,zi leh tate in kho zo lo," kici hi. Tu ciang numei zong tua bang om theita hi. Sex toh kisai laibu hoihte simtam ding hi. Paul Popenoe in, "Nipa kimakna kiam mah2 ta hi. Ba'm cih leh mi tampi in nupa thu leh nupa lup khopna thu laibu hoihte a simna hang ahi," ci hi. Thei to2 ning ci loin, i theih mah2 ding ahi hi.
Zi/pasal kigensia thei hi. A dahhuai mah2 thu hi. Min hong gensiatsak leh zong i gup zawk ding kilawm hi. Pumpi khat asuak khin nalawm na ko2, na gen siat2 leh na ginat lohna mi a hilh2 toh na kibang hi. Na zi/pasal hoih loh na,na gen2 leh zi/pasal zon siam lo na hihna a hilh2 na hi hi. Zi/pasal na gansiat pen na pumpi tung a om nate a ko2 toh na kibang hi. Na pumpi lang gensia in kosia gei kei in.
Phatna aw pen a zamite heh loin,lungdam zaw ciat hi. Phatna pen aneu alian in kiza nuam ciat hi. I cin lohnate kihuh in,i cinna om thei liaite kiphawksakin,kiphat tuah thei den leng hoih pen hi. A kimudah hi peuh mah lo kiphat ding pen haksa kisa ciat hi. Phatna tawh kisai a huampi a at ding ihih manin tam gen kei ni.
A khengval a ki itna in a kisam het loin, nupa kitot,kiphunsan na piang sak hi. France kumpi nu Marie Eugenie in zong apasal a khengvalin it ahih manin phunsan den hi. A zumkahna nangawn ah numei dang tawh a gual nuam dingin ummawh in, vadelhin tawng kha liang hi. Azi phun2 na in meng den ahih manin lungsim siangtho a thu leh la ngaihsut hun ngah zolo hi. Zan kimkhit akkhuan kuan ciangin, Kumpi melselin in pualam ah paikhia in, lungsim nuamsak, siangsak hi. Kimuhdah na hang hilo it khengval manin, Nepoleonin na thuak hi. Kihehsan, kiphunsan lo zawin, "Kong itna lian lua hiam? Na zin,navak kal nangawn ka lungzuangin hong zui2,hong mu2 nuam ing...... Hong ngai lua ka hih manin im zo kei mai ing," ci in zi/pasal itna ngaih na gen khiat ding hi zaw hi. Kiten ma,ki it kingaih lai kammalte silo a, i khantawn zat ding hizaw hi. Mui zang lua kipei sat (Hot love soon cool.). A kilawm akituak a nuntak gamtat theih ding ahi hi.
A ki it akingai lua azawltai liangte zong kikhen kik veve, a ki it kingaihna uh a bang ci hi mawk hiam? A beusa nungak/tangval lai gamtatna hang hi nuam mah2 hi. A beisa hunin aut bang2 gamta ahih manin a zi/pasal mitawh a khial dingin ummawh baih uh hi. Nungak/tangval lai zumhuai zah huai khual loin, a ut bang2 gamta ahih manin, tua bang a gamta ding ngaihsunna nei uh hi. A mau gam tat bang midangte zong agamta ding koih thei hi. Nungak/tangval lai thangtat na hangin nupa kilem lohna piangsak thei hi. A beisa pal ki am luatna gu a hong tung ahi hi. A hoih nung deih pen bawl phat haksa mah2 hi. Franklin in, "Na kitem ma mitpil inla,na kiten zoh ciang alang khiam in," ci hi.
Hilhloh thei tawm ding deihna pen a dahhuai mah2 thu hi. Leitung mi khempeuh hilhloh sin loh a thei tawm kuamah omlo hi. Hilh lopi,pantah lopi in, "Ka lung sim thei in,ka deihna thei in," ci in kideih khathei hi. Hih bang deihna in thadahna nam khat hi a, deihna tung hak ding cihna hi. Hilh kul lo a thei tawm pah2 nu/pa nang sang pilzaw cihna hi. Zi/pasal lung sim leh a nuam nang a theih ziau2 leha hai lo khat hi ding hi. A nih un a kitheih tawm pah2 uh leha pil asiam tuak kigawm kha hi ding a, a tawntung nupa nuamsa hi ding uh hi. A hizong tua bang ding nupa kop sawmah khat zong om zolo lai hi. Tua man theih tawm ding ngak loin, kikup khop, ngaih sut khop ding hi.
Tua manin nupa nuntak, gamtat nopna ding mi hong bawl ding hilo in, kei bawl khiat ding ahi hi. Kei mah2 ka hoih masak, bawl masak ding hi cih thei ciat leng maw? A tangpi lamlah na hi. Nupa nuamsa ihih nang sungah om hi.
Source:
Siamsinna leh Vakiangbu
Laibu Saal / Zomi eLibrary
