ZOMITE LEH MINAM DANGTE ETKAKNA
A kaikhawm ~ GSPau
Nitumna lam gamte ah biakinn tam mahmah napi, a kikhawm ding mi om lo a, Zogam leuleu-ah a kikhawm ding mi kitam napi, i kikhop nading biakinn kinei lo hi.
Korea minamte in innkuan maban sah semsem leh thu nak nget semsem uh a, Zomite in bel innkuan maban sah semsem leh thu kingen man dihdih lo hi.
Minamdangte in a hauhna uh pilna zon'na-in nei mah ta leh Zomite in bel i hauhna kisiatna peuhin kinei zaw kha hi. (Rev. Khup Za Go)
Jews minamte in a tate sumzon'zia pantah uh ahih manin a hauhna uh khang tampi khom uh a, Zomite in bel i tate noptatna lam kipantah zaw kha ahih manin i hauhna khang khat kician nangawn kikhom zolo hi.
Israel minamte in singno suan uh ahih manin keugaw gam pen lonona gam suaksak uh a, Zomite in singkung omsa teng kiphuk ahih manin lonona gam pen keugaw gam kisuaksak hi.
Mikangte in pahtawina lai, medal, trophy cihte thupi ngaihsut uh a, a ngah khak uh ciangin kipaak mahmah uh hi. Zomite in bel tuate zing huan, nitak huanin kizang thei kei, kici a, i ngah phial zongin kilungdam lua lo hi.
Zomite in inn i lam ciangin innpi, anbuk, ekbuk, tuibem cih danin a banbanin kilam hi. Kawlte in inn a lam ding uh ciangin tuibem, ekbuk, anbuk, innpi cih danin a banbanin lam uh hi.
Kawl uliante khual a zin uh ciangin a tun'tun'na khua-a phungzi sang ah lut tangtang uh a, Zomi ulian pawlkhatte Khristian kihi napi, khual i zin ciangin nipi nino nangawn kiphawk kha lo thei hi.
Kawl mihaute in a tate uh kumpi na seem sak uh a, khasum a khom kei leh zong inn pan khakbeh zaw phial uh hi. Zomi mihau a tamzawte in kumpi nasep kineumuh kha pong a, i tate kumpi na kiseemsak khollo zaw hi.
Minam dangte in amau leh amau lamsap kisikin i gam ah hong pai-in thupha hong bawl laitakun Zomi pawlkhat in eima' angsung, eima' innkuan, eima' tanau hamphat ding vive kigengen niloh lai hi.
Laibu Saal / Zomi eLibrary
