Calvary Ah Hong Zui Ning (Lead Me to Calvary)
(Luke 23:23)
Agelh ~ Zam Khat Kham
Jennie Evelyn Hussey (1874-1958)
William J. Kirkpatrick (1838-1921)
“Ka nuntakna a tamzaw khualam vive ah zang kahihman in Topa in kanuntakna honglak ma-in, ‘Zeisu ka it hi’ ci-in mi khempeuh’ tungah gennuam lua ingh.” America gam Concord, New Hampshire-a First Baptist Church pastor-pa’ tunga tuiphum nading a nget kawma agen Jennie Evelyn Hussey’ kammalte ahi hi.
Miss Hussey pen Quakers a kici Friends nu le pa sung pana piang ahi hi. A pu a pate New England ah khang tampi pek-a kipan a tengte ahi uh hi. A nuntak sung bup phial a sanggamnu damlo kem-in om hi. Khatvei beek phunngei peuhmah lo a, “Topa’ tung pan hi” ci-in sang a khatvei mahmah zong hehngeilo hi. Nisim-in inn nasepteng tawh manlah den-in, kuama’ lungdam kohna nangawn ngah lopi-in abuai mahmah den hangin Evangelist Gipsy Smith in a gen theihzel mahbangin “Zeisu’ ompihna” sin den-in nuamsa mahmah lel hi.
Thuak zawh lohding zah-a na, amel mahmah asiasak zo helzen guhnatna tawlkhat sung nakpi-a athuakkhit ciangin hih lamalte phuaka, laphuaksiam dangte bangmah-in leitung beidong atul ngeilo ding minkhat hong ngah hi. “Topa aw, kei’ ading hong puaksak khin na hih manin phunhet lo-in ka singlamteh nisimin hongpua nuamsak in” ci-in thungen hi. Tua mah tawh kizui-in hih bangin la hongphuak hi:
Nang thuak khin ta kei adingin,
Kei zong nang adingin;
Nisim ka singlamteh pua ning
,
Na hai hong dawnpih ning.
“Calvary-ah Hong Zui Ning” la sunga taang lina hongsuak hi.
Hih banga athuakna leh a ki-apna panin hih ladawng buppi ading ngaihsutna hong phulkhia ahi hi. Ni tampi sawt lo-in ala dawng buppi phuak khina, a nunung lampan kipana kiphuak hi se hi. Taang nihna, taang thumna leh taang lina a Topa’ tunga thumnate aphuah khit ciangin taang khatna-a “Ka Nunna vannuai tang ta in, Mang in ka Kumpi-in” ci a alungtang pana phulkhia pulaakna tawh akikhum ahi hi. Hussey in Pasian’ deihna-a ki-apna sin takpi a, tua tungtawnin leitung buppi-a thu ummite’ ading thupha asuak la dawng khat a phuaknu suak hi.
Hih la-aw phuakpa William J. Kirkpatrick bel February 27, 1838 ni-in Ireland gamah suak hi. A neulai-in anu le apa tawh America gamah lal uh a, Duncannon, Pennsylvania ah teng uh hi. Khutsiam lettama nasep sema, ahihhangin a uk taktak bel music ahi hi. Violin, cello, tamngai leh fife tum sin hi. Kum 17 a phak ciangin Methodist Episcopal pawlpi ah lut a, biakna la lamah kipia hi. American Cilvil War (tual-gal) sungin 91st regiment of Pennsylvania Volunteets ah 1861-1862 sung galkap sung misic makai leh tamngai tawh a kibang pian tumtheih namkhat hi fife tumin om hi.
Tua khit ciangin tembaw kilamna ah sema, kum 12 sung Philadelphia-a innsung vanzat furniture kibawlna ah sem hi. Sunday school nasepna thupisa dena, 1859 kumin camp meeting-a sak ding la pawlkhat khen hi. 1865 kumin Philadelphia ah organist leh music director suaka, 1878 kum ciangin a khutsiam nasep nusia kiuhkeuh ta hi. Gospel laphuah leh biakna la editor sem a, John R. Sweney tawh kopkhawmin biakna labu 50 dektak kaikhawmin khenkhia uh hi. Amah guak in bu 40 khenkhia leuleu hi. September 29, 1921 ni-in si hi.
Source:
Christian Hymn-te’ Tangthu (Laibu)
Agelh leh laibu bawl: Zam Khat Kham
Laibu Saal / Zomi eLibrary
