Tawntung Nuntakna (Gupna)kitan thei hiam?
Agelh ~ Tuangkhup’ Hiroshima, Japan
Note khempeuh tungah Topa kiangpan aa, hongpai lungnopna adimin hong om tahen. Kaneu lai-in Gupna kitan theidingin um kahihman in, kalungsim sungah kakhialh khakbek nangawn tawh tuni sileng vantung gam katung khanawn mawktam maw ci-in, lunggim in lungnopna kicing kanei ngeikei hi. A hizong in ka pianthak taktak, Kha siang tho kangah khit ciangin lungnopna ka sungpan hongphul ahihman in Gupna tanding tawh kisai kabuai nawnkei hi.
Tua ahihman in, tawntung nuntakna (Gupna) in bang hi aa, angah te bangci in , bangci nuntak cih ih telding thupi masa in kakoih hi.
Tawntung nuntakna angah taktak te’n
Asung ah Topan kei nangawn hong it aa tawntung gimna pan honghon khia hizen ci-in nuamna, lungnopna nei masa uhhi.
Tua lungnopna pen midang te’n zong angahding deihsak ahihman gengen nuam uh hi.
Ama sungah itna hong omta ahihman in, midangte tungah siatna bawllo mawh saksak nawnlo bekthamlo in, mite mawhna maisak zawlai uh hi. Atawmpen hiteng thum ihneih naikei leh Khasiang tho ngah taktak nailo hikhathei ding hi hang. Gupna ngiat angah nailo hizaw kha ding hi hang. Gupna ngahkhin kisakha in angah nailo tampitak kiom hi, kisit pha ni.
Banghang Tawntung nuntakna (gupna) tanlo ding
Zeisu ih upman aa, ih ngahpen akisia theilo tawntung nuntakna hiven, kitan theileh tawntung nuntakna hi nawnlo.
Hell, gam tungding sitset asiapen dinmunpan, hong honkhia ahihman in, hongpaih hong nawsiat nading thu omnawnlo, Ih lungsim/gamtat hoihna tawh hongsang hilo.
Zeisu up/neih man aa hongsang, thukhenna thuak nawnlo ding.
A piangthaksa khat bangci nuntak ding.
Zeisu in asisan tawh hongleisa hi aa, ama aa hita ihihman in ama deihna bang aa, nuntak ding hita. Ih ut bangbang aa ih nuntak leh kha siangtho ngahnailo Gupna ngahnailo hizawding hi.
Ahizong in cileh sa tawh kinungta ahihman in thanemin kituk kha theimah ding hi aa, kidawm takin kalsuan in nungta ding, Zeisu nuntak zia tawh ka kinai semsem hiam, kaki gamla zaw semsem kha hiam cih kisittel zelzel ding.
Ih tuk, ih khialhkhak leh zong, thokik pah ding, tua ahihkei leh Topa’n hongit ahihman in, hong thuhilh in hongsat khading hi. Tuate kisikkik in athu mangpah ding, thu ih mannop mahmah kei aa leh, Topa’n kisam asak leh ih nuntakna zong laziau thei hi cih tel ding.
Bang hang Pastor sem kahiam cih leh, Topa’ hongitna katel teh lungdamlua kahihman in, tuathu kagengen kawmkal in Pastor asuak kha hizaw ing. Gupna kitanthei dingin umleng tuathu tawh buaikhop gimkhop in, lungdamna thu kagen khia zokei ding hi. Ih upna akibat kei leh nang upna hongnial hi keng, tulaitak aa ka upna atom theithei in konggelh hi. Tel lohna aom leh kikum lai ni, atelsiam dingin Topa’n Thupha hongpia kimciat ta hen.
Laibu Saal / Zomi eLibrary
