INNKUAN KI-IT LEENG
Agelh ~ Khoi Lam Thang
"Innkuan a pankhia Pasian hi" ci khin hi hang. Tua innkuan kitenna tawh kipan khia hi. Mihingte pen ganhingte bang a tuahna peuh-a kiteng mengmeng te ihi kei hi.
Pasian zakta-in lungsim siangtho tak tawh a ki-it nungak-tangvalte kikhoih supsup se lo uh hi. Itna siangtho tawh a ki-itte khat leh khat kithupisim uh a, mindaina ding siatna ding kibawllo uh hi. A manphatna uh kitheihsiam pih uh hi. Tuhun ciangin gam khangto zaw te-ah a ki-uangsak kiten ma a lupkhop (living together) cihte cikzet ngaihsut uh hi.
Innkuan taktak i cih ki-itna bektawh kipan dinga, tua ki-itna mah in kipsak ding hi. Cilesa kingaihna pen kitelsiamlohna tawh tawp thei hi. Innkuan sung ki-itna pen lungsim pan hong phulkhia midangte a ding a hoih deihsakna hi-a, nupa kikal ki-itna bang thuk pha diak hi. Tua itna pen feeling hi nawnlo in, kideihsakna, kisepsakna, kimaisakna, kitelsiamna, kiniamkhiatna-te tawh kikhen thei nawnlo hi.
Inn i lam ciangin khut kizang a, sik, gua, bi, leisek te (le a tuamtuam) tawh kilam hi. Innkuan ahih leh lungtang a kipia tuah mihingte tawh a kilam hi.
House is made by hand,
Home is made by heart: kici hi.
Inn a om hangin innkuan piang theilo hi. Innkuan nuam peuh leng, inn a hoih loh hangin nuam veve hi. Bangzah innhoih sung ahi zong innkuan nuam kei leh gawtmun ahi hi. Hauhna le zawnna in innkuan nopna le noplohna a ding thubulpi hi lo hi.
Luiging bek zong la ngaihpi
Vandum bek zong maitaina
Pasian van pan hong nuih pih
Innkuan ki-it leeng.
Innkuan i cih itna tawh kiphut a, itna in nopcisak in, itna mah in kipsak hi.
Source:
SIHNA IN HONG KHEN MA TENG (Laibu)
Agelh: Khoi Lam Thang
Laigelh siapa in Laibu Saal / Zomi eLibrary ading in phalna ahong piak ahi hi.
cinpuzomi@gmail.com
