Laisim Mimalkim tungah Zotna :
Hih laibu pen ni 40 sung simding ahih manin nikhat in khatta(nikhat aita) Laibu Saal website (www.zomielibrary.com) pan hong suah toto ding hi ung…
**********************************
Ngimna' Tawsawn Nuntakna (The Purpose-Driven Life)
NGIMNA NEI KHUALZINNA
Hih Laibu A Hoihpen Dingin Zatna
Hih laibu pen laibu cih ciang bek hilo hi: mihing nuntakna sunga dotna thupipen ahi “Hih leitung ah bang aadingin om ka hi hiam?” cih thu a dawnkikna hong mukhiasak thei ding ni 40 kha khualzinna sunga hong mapi ding lamlak hi. Hih khualzinna na man ciangin na nuntakna aadinga Pasian’ hong geelsak ama ngimna na theikhia ding a, na nuntakna a pian nadingin bang teng bangci kigawmkhop cih thu tangzai takin na theitel ding hi. Hih bang thumuhna na neih manin na lunggimna hong kiam ding a, na thu khensatnate hong oltuam ding banah, a thupipenin ci lehang, tawntung hun aadingin hong kigingkholsak ding hi.
TU ZAWH NI 40
Tu hunin mihing nuntakna pen a huamin ni 25,550 sau hi. Hih pen a ngeina bang na hih nakleh na nuntak tanzah ding hi. Tua hun le nite khempeuh na zatdan ding tawh kisai Pasian’ hong deihsak thu na theihkhiat nadingin tu-a ni 40 hun khat na khenkhiat ding pen hunzat siamna khatin ngaihsun lo na hi hiam?
Pasian in ni 40 cih pen kha thu tawh kipawl ah a thupi mahmah khatin ngaihsun ahihlam Lai Siangtho in tel takin hong lak hi. Pasian in Ama ngimnate a cingsak dingin mi khatpeuh a pattahnop ciangin ni 40 sung hun la hi:
Guahzuk hun sung ni 40 tungtawnin Noah’ nuntakna kikhel hi.
Sinai Mual tungah ni 40 sung a va omna tungtawnin Moses kikhel hi.
Kamciamna Gam sungah ni 40 sung a va omna uh tungtawnin thukante kikhel uhhi.
Goliath’ galto hun ni 40 tungtawnin David kikhel hi.
Pasian in tha om nading annek nam khat bekbek ni 40 sung a piakna panin Elijah kikhel hi.
Pasian in mipite kikhel theih nading hun ni 40 sung a piakna panin Nineveh khuapi bup kikhel hi.
Gamlak ah ni 40 sung a va omna tungtawnin Topa Jesuh, vangliatna tawh kidim hi.
Sihna pana thokik Jesuh tawh ni 40 sung a kithuahkhopna uh tungtawnin nungzuipite kikhel uhhi.
Mai-a hong pai ding ni 40te in nang’ nuntakna hong kikhelsak ding hi.
Hih laibu sungah khenpi tomnono 40 kiguang hi. Na nuntakna aading zat takpi ding thute lungngaih ding hun na ngah nadingin ni khatin khenpi khatta bek sim in, ci-in nakpi-in kong hanthawn nuam hi. Lai Siangtho sungah hih bangin ci hi: “Ngaihsutzia a kilaih mi thak khat na suah theih nadingun Pasian kipuahphasak un. Tua hileh na sep ding uh Pasian’ hong deihsak thu na thei ding uhhi.”1
Laibu tampi simsim ta lehang i kikhel theih lohna pen a mai-a khenpi thak khat sim nuam lua i hih man hi. I lawp luat manin khawl hun neilo-in i simsa thute limtak lungngaihkik ding hun i la kei hi. I theihsa thute haizan nai lopi-in thumaan thutak a dang khat i ne buatbuat pah hi.
Hih laibu a sim bek hi kei inla kithuahkhawm in. Laigualte a taw-giit in. Laimai nawl ah nang’ aituam ngaihsutnate gelhkhia in. Nang’ laibu suah in. Na min tuangsak in! Laibu ka phattuampihte pen a sim bek hi lo-a ka nuntakpih laibute hi.
NANG HONG HUH DING THU LI
Khenpi khat a bei simin “Ka Ngimna tawh kipawl Lungngaihna” kici khawk khat om ding a, tua sungah a nuai-a teng na mu ding hi:
Lungngaih Ding Thu Khat. Lungngaih Ding Thu Khat. Hih pen ngimna’ tawsawn nuntakna thukhunte ni khat bup na lungngaihkik theih nadingin a tom-a hong lak thutak laigil lom hi. Paul in Timoti kiangah hih bangin gen hi: “Tu-a kong gen thute Pasian in theihtelna hong pia ding ahih manin tua thute lungngai in.”2
Phawk Ding Khawkneu Khat. Phawk Ding Khawkneu Khat. Hih pen kh Phawk Ding Khawkneu Khat. enpi sunga om Lai Siangtho khawkneute lakah khat hi. Na nuntakna a khantoh ding na lunggulh takpi leh Lai Siangtho Kammal kamngah ding kipan lecin tua pen hihdet (habit) thupipen khat hi kha thei ding hi. Na paipaina ah na ken theih dingin hih khawkneute laidalno a khauh khat tungah na teikhia kik thei a, ahihkeileh zong Purpose-Driven Life Scripture Keeper Plus khat na lei thei hi.
Ngaihsut Ding Thudotna Khat. Ngaihsut Ding Thudotna Khat. Hih Ngaihsut Ding Thudotna Khat. thudotnate in na simsa thute a cihnopna leh nang’ aituam aadingin bangci khiatna nei, cih thu hong lungngai theisaktuam ding hi. Na dawnkiknate hih laibu’ laimai nawlte ah ahi-a laibuno a tuam khat sungah ahi zongin na gelhkhiat ding nakpiin kong deihsak hi. Ahihkeileh zong tua danin zattheih dinga kibawl The Purpose-Driven Life Journal kici laibu lei-in na zat ding kong hanthawn hi. Ngaihsut thute gelhkhiatna pen kisittel nading lampi hoihpen khat hi.
Behlapna 1 sungah hih a nuai-a thu na mu ding hi:
Kikupnawi Ding Thudotte. Ni 40 sung hih laibu na simna ah na e. lawmte, khat ahi-a pawlkhat ahi zongin, na zot ding kong hanthawn hi. Khualzinna cih pen kithuahpih nei lehang hoihzaw hamtang hi. Mi khat ahihkeileh pawlkhat tawh kithuahin simkhawm lecin na simsa thute amau tawh kikumnawi thei-in khat le khat ngaihsutna na kihawmsawn thei ding uhhi. Tua in kha thu ah khangliatna leh thuklutna hong piangsak ding hi. Kha thu ah khangliatna maan taktak cih pen khatkia tangomna leh aituam thuzuihna tawh kingah ngeilo hi. Picinna pen kithuahkhopna leh khua le tual tungtawn bekin kingah thei hi.
Na nuntakna aading Pasian’ hong geelsak ama ngimna theihtel nadingin Lai Siangtho amah le amah hong kigenkhiat pen mah lampi hoihpen hi pah hi. Tua hangin hih laibu sungah Lai Siangtho sung tamveipi kikawk a, Lai Siangtho Mangkam tawh kiletkhia (translation version) nam sawm-lenga sungpan khawkneu tuamtuam leh laigual kilemkik (paraphrases) tul val bang kizang hi. Letkhiatbu nam tuamtuam ka zatna a hang thu tampi om a, tua pen behlapna 2 sungah gentelna ka nei hi.
NANG AADINGIN THU KA NA NGENNGEN HI
Hih laibu ka gelh kawmkawm mahin Pasian in hih leitung ah nang bang hong seemsak nuam cih thu na muhkhiat nading leh tua pana hong phulkhia lam-etna, thakhauhna, leh lungdamna cihte up ngamhuailo zah dongin na sinkhak nadingin thu kong ngetsaksak hi. Tua banga sinkhakna pen bangmah dang tawh kibang vetlo hi. Nang tunga hong piang ding thu lianpite theitel ka hih manin ka na lawpkhol mahmah hi. Tuate kei tungah zong hong piang khin a, ka nuntakna aadinga kikoih ngimna thu ka muhkhiat huna kipan a ngei ka bangkik nawn peuhmah kei hi.
A phattuamnate thei ka hih manin nang zong hih ni 40 sung kha khualzinna ah laisim ding ni khat zong pelh ngeilo-in na pom cinten nadingin kong to nuam hi. Na nuntakna thu, ngaihsut ding hun khat lakna pen a septaak mahmah khat hi. Nisim nasep ding na geelna ah hih zong khatin hel in. Hih thu, nong saanzawh ding leh thuciamna khat i bawlkhawm ding hi. Thuciamna khat bawlin minthuh cih pen khiatna nei khat hi. Hih laibu na simkhoppih ding lawm na neih leh amah zong a min thuhsak in. Tu-in kipan khawm dih ni!
Source :
Laibu Min : Ngimna' Tawsawn Nuntakna (The Purpose-Driven Life)
Laigelh : Rick Warren
Lailet : PLMangno (Power Translation Service) raymang@gmail.com
Laibu bawl kum : 2006
Hih laibu pen raymang@gmail.com ah kivaikha thei hi.
