ZI/PASAL NEIH DING NA SAWM TATAK LEH!
Agelh ~ Rev. Khoi Lam Thang
Zi/pasal neih ding na sawm takpi leh zangkhai ngaihsut kei in. Khatvei annek ding nangawn thu a ngen masa tangtang ei Khristiante in khantawn koppih ding zilepasal thu-ah nakpitak-in thungetna kisam hi.
Zi/pasal na neihsawmna banghang hiam cih nih vei thum vei ngaihsunpha kikkik in. Innkuan sung nopsak loh man peuh, mite hong hanthot man peuh a hih leh buainate hong khuanung tun ciangin kantan zolo in haksatna na bukkhuk kha ding hi.
Na lungsim takpi tawh na it takpi mah a hiam? Amah tawh nuntak lampi-ah tonkhawm zawh (theih) sawm takpi mah na hiam? Sem khawm, nui khawm, hawmkhawm ding, suan le khak nei khawm taktak dingin na khensat ngam hiam? Na dang khempeuh peel in a mah bek beel in nupa suak dingin na kibuppiak ngam takpi ding hiam?
Kiteng cih pen pasal khat le numei khat amau lungsim kizawhna tawh nungta khawm dinga khensatna hi a, kumpi thukhun (upadi) tawh zong
Innkuan i cih pen tuipi tung a paipai tembaw tawh zong kibang hi. Huih nem a nun laitak kilungmuang a, huihpi a nun ciangin, "Kalaisai! Kei aw! ngasa an ding ka hi ta veh maw" cih hun om thei hi. Huih dam hong nun bangin huih sia zong hong nung thei hi.
Innkuan i cih pen thonginnpi khat tawh kibang hi. Tangval suahtakna kikhumcip a, nungak nopsakna kol kibulh hi. Tua thonginn sungah ei mimal kihihsakna khempeuh kihencip hi. Midangte i kigualzawh sakna mun ahih manin i guallelhna mun ahi hi. Ei' deihna nial-in, mi' deihna i sepna mun ahi hi. Utna le deihzia kikumkhawm-a, nopna le haksatna thuakkhopna mun ahi hi.
Hong it lua ing, hong ngai lua ing, nang lo in nungta zo kei ning i kicih itna a gahsuah theih na dingin, "KEI" khempeuh "EI" tawh a kikhekna mun in innkuan ahi hi.
Source :
"SIHNA IN HONG KHEN MATENG" Laibu
~ Rev. Khoi Lam Thang
Laigelh Siapa in Zomi eLibrary/Laibusaal ading in Phalna ahong piak ahi hi.
