Nu leh Pa Omkhop Khitciang Siluangna (Bleeding After Sex)

Nu leh Pa Omkhop Khitciang Siluangna (Bleeding After Sex)

Nu leh pa omkhawm  khitciang siluangna pen mi tampi a thuakkhak a piang nuam mahmah khat ahi hi. Kum tawmlai numeite leh kum tamkhin niin kang khin numeite tungah piangnuam deuh​​ hi. Kum tawm hun lai leh kum tamkhit niinkang kuan in nu leh pa omkhop khit ciang tua bang a piang leh a ngeina hi lel aa lungkham huai lualo hil. Ahih hangin niinkang khin numeite tungah tua bang a pian leh a lauhuai natna te hang hi thei ahih man in a thei Siavuan Siamahte tawh ki lak pah ding ki sam hi.

Nu leh pa omkhawm khit siluangna ahang tuamtuamte

• Naubu gong cancer hang (Cervical Cancer),

• Naubu gong’satak cidamlohna (Cervical Ectronpian),

• Naubu gong sungah cancer ahilo sabawk a omhang (Cervical​​ Polyp),

• Naubu gong bawkna hang (Cervicitis),

• Nu leh pa omkhop laitak thahatluatna hangin liamsak khakna hang,

• Zummawh mun ah meima khat peuh ahih kei leh siklik a ki pan Nu leh pa omkhopna pan a ki ngahthei natna tuamtuam a om hang (Sexually​​ Transmitted Infection),

• Nu leh Pa omkhopma ki patna/ki nohna (Foreplay) ki cin zawhloh hangin Numei’zummawh lampi nel zawhloh hang,

• Naubu’vun liamna (Adiak in naukhamna a zangte),

• Numei’ngeina niinneih laitak ahih man  zong hi thei hi. (Niin neih khit​​ tuung ahih kei leh niin neih ki pat tuung hun tawh a kituak leh),

• Numei’zummawh a keu hang,

• Numei’zummawh a patluat hang,

• Numei ‘zummawh a bawk hang,

• Thatang hatna suangin thazawhna tawh utlo pi omkhop pihna hang (Sexual Abuse).

Ki sittel /ki lak ding

• Niinkang nailo na hih leh nau  paai maw paailo limtak sittel in.

• A​​ thei Siavuan Siamahte kiangah Numei’van cidamloh na a om hiam cin limtak ensak in. (Vaginal Examination)

• Naubu gong zong cidam maw cidamlo cih Speculum tawh limtak sit sak in.

• Naubu gong  cancer nei maw neilo na sit nai kei leh Pap Smear a ki ci nau bu gong sitna tawh sit sak in . (Nu leh Pa omkhawm khit siluangna ahang a tamzaw  in naubu gong cancer hang hi.) Naubu gong cancer na neih kei leh na neihloh nading Naubu gong cancer​​ natna dalna zatui sun in.

Nu  leh pa omkhop khit siluangna a dam nading ;

• Kum tawh ki zui in ki bawl ding ki sam leh ki samlo ki khen thei hi. Niin kan kuan hi in khat vei khawng si a luang, naubu gong cancer a neilote a hih leh ki bawl kul khollo hi.

• Zummawh ah meima omna hang ahih leh bel limtak ki bawl kul hi.

Niinkang khin numeite a hih leh khat vei bek a luang ahi zong, tam luanglo in tawmbek ahi zong in a thei Siavuan Siamahte kiang ki lak pah in. Ahang a tamzaw pen zummawh keu man leh patluat man​​ cihte sangin cancer hang leh ki bawl ding a ki sam natna hang hi zaw hi.

Deihsakna tawh,

Taksin Thu

Ref ;

NHS Choices,

UK Mayo Clinics,

Healthcare.com.mm

Zomi eLibrary / Laibusaal in hanciam in akigelh ahi hi.