LAMKA KHUASAT THU
Agelh ~ H. Pau Za Cin , MES(Retd)
LAMKA VANGKHUA:
Lamka khua pen tuipi maitang panin metre 914.0 in sang hi. Manipur State sungah khuapi lian nihna ahi hi. Lamka pen kumpi theihpih(recognised) hi lo a, eite’lawhna ahi hi. Tua mah bangin Kawlpi zong Myanmar kumpi ciaptehna ah Kalemyo hi a, Kawlpi pen ei lawhna hi. Kawlpi khua sungah vengmin tuamtuam a om mah bangin Lamka in zong a huamsung zai mahmah a, a taangpi-in a huamsung – Appolo Veng, Chiengkonpang, Hqrt.veng, Hill Town, Hiangtam Lamka, Hmuia veng, Jion Street, Khumujamba, Lailam Veng, Luioa Veng, Meitei Leikai, Mission Veng, Nehru Marg, Salem Veng, Zenhang Lamka, Zellang Veng, Zou Veng, Zomi Colony, banah Veng thak zong kisatsatin veng tampi a phata hi. Lamka a khiatna taktak pen ‘Lamka bom/Lamka thuam’ cihna hi a, Tipaimukh Road, Sugnu Road le Tedim Road kikatkhiatna munpi ahih manin Lamka a kici ahi hi. Lamka min tamin hih anuai-a khua 3 teng a kisat hi:
ZENHANG LAMKA:
1926 kumin Kam Thuam Valte’ tapa Zen Hang in galpi nihna ma-in tulaitaka Police Station mun santakah teeng a, a kongmai ah Bazar no khat omin tua laiah sumbuk khat a bawl hi. A sakdeuh tengah tawsawsing po ngiamnguamin tua nuai-ah ci zuak mi pawlkhat zong a om uh hi.Tulaitak a Zenhang Bazar mun pen Mawltual in a nei uh hi. 1931 kumin Lamkanuai khua na satin Bizangloubuk a kici, tulai taka Zenhang Lamka mun santak ah a teng hi. Ni dangin Lower Lamka(Lamka Nuai) na kici ngei hi. Hausapu Zen Hang pen 1898 kumin Myanmar gam Kansau khua-ah a suak hi. Zen Hang in Tonglawn a apu Hatzawte ama kianga teeng dingin zolzol napi in, a pute in, “ Tua lai a thokangte pehlup dingin ut laizang kei hang,”na cihsan uh hi. Tua hunlai-in kangkalh, thopuan cih bang om nai vet lo hi. Zen Hang in a zite leh a tate tampi malaria (nattun)hangin a na khuai hi. A teng masa Tawngkungi(Kawlchuan’ nu), Paukholun te leh midang tam lo khat a teng uh hi. 1946 kum ciangin Ngulhau, Ngaipau, Thangdohang(Thangngeu), Zamthang leh Khawizathang(Thangpu) te in a beel uh hi. Tuni ciangin sumbuk tampi om-in inn zong tampi a phata hi. Khuasung vaihawmna pen Tedim Road suahlam pang, Lailam lui panin Zou Veng dong a huap hi. Tulaitakin Zen Hang tapa Letboi Valte hausa ahi hi.
HIANGTAM LAMKA :
Sialbu khua hausa Pu Ropiang Guite’ tapa Phungkhothang Guite leh a zi Thang Vung Tawh 1927 kumin Khristian Ngeina tawh kitengin , North East India General Mission(NEIG Mission) in sangsia na sem dingin Phungkhothang appointment a pia hi. Khua sat ding lunggulh ahih manin1930 kumin Gasper saap SDO kiangah phalna a ngen hi. Phalna ngah ahih manin 1931 kumin tulaitaka Zenhang Lamka hanmual mun santakah bawkta khawhin a lawmte- Leivang Thanghrang, Tonsing Vungkhokam, Thangsel, Ngulvum, Dousel Khatthang, Nengkhothang leh amah hausa(chief) tawh a teng masa uh hi. Tua lai mun pen pumpeng tam mahmah ahih manin Pumpeng tamin Pengphai kici hi. Tua lai munah thokang tam mahmah ahih manin leh cidam thei hetlo uh ahih manin hausapa Phaipi ah va hawhin kumpite kiangah tu laitaka a tenna uh Hiangtam Lamka mualbawk a van ngen hi. Phalna ngah ahih manin 1933 kumin Lamka nuai Pengphai khua panin mualbawk lamah kisuan to-in patta a bawlsak hi. Tua mualvum pen Mual Veng zong a kici hi. Khua tuamtuam panin mite hong pemlutin inn 22 a pha uh hi. A teng masa teng:
1. Phungkhothang Guite,Hausa;
2. Voma;
3. Chhunkim;
4. Zamkham;
5. Tunglut Thawngdam;
6. S.Ngulzaneng;
7. Dousel Khaipau;
8. Dousel Damzalian;
9. Dousel Thuamgin;
10. Dousel Khamgin;
11. Soivum Samte(Pastor Thongkham’ pa);
12. Ngulkhopau Samte;
13. Dengthang;
14. Pum Za Kham;
15. Khaizadal;
16. Damkhokai Tunglut;
17. Liankhogin, Taangko;
18. T.Khamkhochin;
19. Mangdam;
20. Thawngdong Tunglut;
21. Pauthang Thomte
22. Kim Thawn.
1953 kumin O.Kathipri, IFAS(Indian Frontier Administrative Service), SDO, Churachandpur-in hong tu a, Tedim road suahlam teng Lower Lamka( Lamka nuai) tumlam teng Upper Lamka (Lamka tung) cih ahi ding hi, ci-in Orders suah a, kum tampitak a kizang hi. Lamka tung ECC Upa Committee in nimit.2/6/2010, thukimna no.7 na tawh kituakin Upper Lamka kici pen Hiangtam Lamka ci-in a khek uh hi. Hiangtam Lamka a khiatna pen Hiangtam khua zuatna Lampika cihna na hi gige hi. Hiangtam Lamka in a huam khak vengte pen Mual Veng, Vengnuam, Chapellane, Zellang Veng, Mission Veng, Mantop leikai panin District Hospital dong ahi hi. Tulaitakin Thawmzapau’ tapa Thangkhosuanmung Guite hausa ahi hi.
NEW LAMKA:
Nidangin tulaitaka Lamka College mun pen Zanglian kici-in Khoi Pum Leivang Ngaihte leh a u anau leh mi pawlkhat tengin,1946 kumin a tapa Vum Za Kham leh a innkuante banah beh le phung tuamtuam pawlkhat tawh Zanglian nusia-in Tangnuam khua satin a teng uh hi.1957 kumin Go Cin Khup Hatzaw in kumpi sangsia a pensen khit ciangin Lambulane(tu-in Hqrt Veng) kici kumpi nasemte inn nusia-in Hill Town hausa Thangzam Gangte in tulai taka Go Cin Khup veng gam lianpi khat na pia a, tua lai munah bii inn khat lamin a teng hi. Tua hunlai-in sing le gua zong tam mahmah lai hi. A khang zekah Hmuia tol tenin tuhun ciangin Hmuia Veng a kici ta hi. Go Cin Khup kum tam lo khat a tenkhit ciangin a u anau in beelin inn hong tam tektek hi. Kumpi sangsiapi Kham Khan Pau Hatzaw in 1963 kumin inn khat lamin a teng hi. Go Cin Khup Veng a kicih ma-in Hatzaw Quarter/Tedim Road 39 miles/ leh Tedim gama Hatzawte’ tenna masa khua ahi Laihan(tu’n Pimpih) min tamin Laihan Veng cih bangin a kiphuak kawikawi hi. Go Cin Khup veng leh Simveng a om masa pen hi. 1963 kumin Kumpi Sangsiapi Kham Khan Pau Hatzaw in inn khat lamin Go Cin Khup vengah a teng hi. October kha 1964 kumin Tangnuam khua panin En Khaw Thawng Khaute Ex.Serviceman hong pemphei-in tulai taka Hebron EBC biakinn khangah a teng hi. 1974 kumin Nehru Marg panin Jamsuan Tonsing hong pem phei hi. Khuasung upate kiho-in veng min dingin New Lamka a phuak uh hi. Jamsuan tenna veng pen Hebron Veng a kici hi. Lian Za Go Hatzaw in 1974 kumin taihinn(pucca building) khat lamin New Lamka huam sungah building inn a nei masa pen zong a hipah hi. New Lamka pen tuni ciangin veng tampi-in a kikhen hi. Tuate- Go Cin Khup Veng, Hebron Veng, Dorcas veng, Elim Veng, College Veng, Vengnuam, Zion Veng, Chimtung veng, Bethel veng, V.Munhoih, Khominthang, Kanan Veng, G. Tonjang, Val Veng cih bangin New Lamka pen veng tuamtuam tampi-a phata hi.
CHURACHANDPUR:
France gam kuan(Labour Corps)te hong tun tak ciangun a kuankik ding ut loin Zoute leh Haokipte in nakpi takin na nang uh hi. Buaina hong omtak ciangin Kumpite in Police outpost tuamtuam hongin galkap Platoon khat ciat a koih hi. Tuate lakah hausa Semthong Haokip khua Suongpi zong tuate laka khat ahi hi. 1919 kumin Manipur singtanggam teng mun thumin khenin SDO a koihte lakah 1. Simlamah (South) Suongpi 2. Tumlamah(West)- Laijang leh 3. Suahlamah(East) - Ukhrul ahi hi. France gam kuan cidama hong tungte vaidawnna-in 1921 kum bullamin Suongpi SDO B.C.Gasper in sialtal khat go-in Manipur Maharajah Surchand Singh zong a sam hi. Hih hunah Suongpi Sub-Divisional Hqtrs min pen Churachand Singh min tamsakin Churachandpur Sub- Divisional Hqrts kici-in tuni dong a kici lai hi. Tangko pa tangko sakin, ‘ tuni a kipan Suongpi Sub.Division Hqrts a ci kha peuhmah thonginn(Jail) baang zut ding hi’ a ci hi. Kum 10 khit ciangin CCPur Sub.Division pen Sadar tawh kigawm ding ci-in Imphal ah kisuan sukin ahi zongin Zato-inn(Hospital) pen kisuan lo hi. A kinusia Churachandpur pen Dr.Grouzier leh Pu Colemante in Mission munpi dingin Maharajah kiangah va ngen dingin kuan uh a, ahi zongin Maharajah tanu damlo ahih manin a dam siang matan enin a keppih uh hi. Maharajah tanu a dam siang ciangin kimu thei uh a, Missionary khat kia om thei dingin thu a pia hi. Tua banah a mi le sa(meiteite) kianga Pasian thu hilh lo dingin zong thu a pia hi. Tua huna kipan Churachandpur pen Churachandpur Mission Compound kici a, NEIG Mission munpi a suak hi. 1928 kumin Rostad te nupa hong tungin bawlphat tuakte bawlpha-in Mission munpi dingin Churachandpur a kipsak uh hi. Rev. H.Nengzachin in H.Coleman deihsakna tawh Shillong ah school kai-in 1934 kumin pawl X zo-in Churachandpur Mission munpi ah dept.tuamtuam ah nasep huhin eimi lakah Mission Worker masapen a suak hi. ( Pa Chin in Japan gal 1942 kumin Tedim Lamlianpi(Tedim Road) sialna ah Tuibuong panin gunlui dong Sub Divisional Officer(SDO) saap hihna tawh vaipuak a sem hi. Kumpi nasep ding omte nawlkhinin Pasian nasep ding teel zaw a, Mission nna mah a pensen ni July 31, 1980 dong a sem hi).
India in Independence a ngah khit sawt lo khatin, Pearson le Thangkhopao kipgen pen Circle office mun en dingin hong kizui uh hi. Suongpi SDO Office pen Japan gal sungin siacip dimdem ahih manin Lambulane kici tulaitaka Hqrt Veng munah Churachandpur SDO Office pen kisuansukin Circle Officer khat omna dingin kipsak uh a, a khua min dingin ‘New Churachandpur’ a ci uh hi. Hih mun pen Manipur Assembly speaker masapen TC Tiankham in hong a amahmah zong tawlpikhat a om hi..Thangkhopau Kipgen pen Circle Officer masapen ahi hi. Hqrts a Circle Officer omna New Churachandpur kicita ahih manin, Mission Compound pen Old Churachandpur kici hi. Tham lo-in District min zong tuni dongin Churachandpur District, a kici lai hi.
