LAMPI LUI NUSIATSAN IN LAMPI THAK TAWN TA NI.
Zomi sungah pawl ding zong ihih leh a kician in, hangsan takin a langtang in zong vet ni. Gal/langpang ding zongzong om ihih leh zong a langtang mahin kician takin zong vet zaw ni. Zolai gelh theih teng leh teng leh Fake account khawng tawh thu telcian lohpi khahkhah in, Zomi sungah kilang neihna ding zongzong kei ni. Tua bang bek uuk na hih leh nik teng masa vet in. Kitot kiselsel hun dingin hun kinawh lua ta a, minam dangte khantohna kilap ngei lo ding hi. Buai loh ding teng buaipihpih hun hi nawn lo hi. Khantohna kibansap minam i suah khak ding lauhuai hi. Minam kipumkhatna ding i septheih kei leh kilangneihna ding beek bawl kei hi.
Langpang cih ciangin a gal/lang lamah hiam tawh pang i galte leh a lang lam panin pangin hong lehdote cihna hi. Zomite pen i pu i pa hun in i omna leh teenna leh i gam belhna gam tengah a kiteng khawm, a kipawl khawm, a ta khawm liailiai minam kihi a, sa banga a hon tat minamte ihi hi. Ngaihsutna kibat loh manin kilang bawl-a kingawhtuah khawlsanhuai mahmah hi. Lungsim neu leh lungsim kawcik vai lua hi. Khantohna ding sangin niamkiatna lam hong manawhpih zaw hi cih phawk hun mahmah ta hi.
Ngaihsutna kibang lo i neih leh suakta takin cidamhuai leh picinghuai takin kinialna in, thuman bulphuh in hangsan takin kinialna neih theih pen minam picing lungsim neite ngeina hi. Tua bang pen tu lai vai hi ta a, cidamhuai-in khantoh vai hi. Nang ngaihsutna hong thukimpih lo teng na gal/lang bangin na tuat pah a, nang hong langpang dingin na koih pah leh leitung ah kuamah tawh na kilem ngei kei ding hi. Na totna leh sik ngil khitsa lampi mah tawntawn in, na sik ngil khitsa lampi mah tawnin nai paipai ngaungau den a, na mainawt ngei kei leh kimanna nei lo, bangmah sem lo, phattuamna om lo hong kicih leh zakdahna ding om lo kieuhkeuh hi.
Lampi thak sial a, lampi thak tot pah a, tua mun ah pai a mainawt hun ta hi cihna hi ziau hi. I tuat cilsa leh tot ngilsa lampi ah paipai nawn loin lampi thak ah pai hun cihna hi zaw hi. Lam khial lam sam, bah leh nguite khut tawh let in, lam khialte lam man lak in, hong langpang a i ngaihsut teng i pawl dingin i kaih leh huai zawh ciang bekin Zomi sungah kipumphatna hong piang ding a, khut kilen in kitonkhawm thei pan ding hi. Namdangte zah-a tam kihi lo ahih manin kipumphat in, khut kilen in i tonkhawm theih ciang bekin i tun nopna mun kitung zo pan bek ding hi. I lang ding i zonzon lai teng kimainawt thei ngei lo ding hi.
"Ka gam, ka minam leh ka mipihte ka it hi," ci-in na mit tawh na muhtheih na mipihte na it kei a, na lang bangin tuat den in, hong langpang bangin na muh lai teng "ka gam, ka minam leh ka mipihte ka it hi," na cih pong hangin a mawknapi hi a, na muhtheih loh "Pasian ka it hi," na cih hangin nang leh nei a kikhemkhem na hi hi. Na neih na lam bei lawh liangin, na nuntakna piakhia in na minamte adingin si ngamin, na sih liang hangin na muh theih na mipihte na it kei leh na minam itna a mawknapi hi a, na muh theih loh Sianmang it ing na cih hangin nang leh nang a kikhemkhem na hi zawsop den hi.
Pasian hehna mai muh ding ut a, gimna ngah nuam ihih kei buang leh i muh theih mihingte leh i teen khoppih i mipihte tawh kilem lopi Pasian tawh kilem sawm kei ni. Itna Pasian' mai zong napi i mipihte it masa loin Pasian' mai zongzong kei ni. Pasian a kikhem zo dingin ngaihsun kei ni. I muhtheih mihingte, i minam leh i mipihte it masa loin i muh theih loh Pasian ki-it thei lo a, i muh theih loh Pasian it-in ama' bawlsa mihingte, i minam leh i kimpihte kimuhdah ngei lo hi. "Ka neih khempeuh midangte tungah pia-in, Pasian’ nasepna hangin kihaltumna ka thuak ahi zongin itna ka neih kei leh ka phattuamna bangmah om lo hi." (1 Korin 13:3).
✍️Thang Khan Lian
