DEMOCRACY GAM-A MIPITE LEH MAKAITE KIKAL.
Democracy gam ah public servants or civil servants = gam makaite, security i cihte pen mipite, tangpi tangtate (civil or public or the people) adingin silate or nasemte leh gam humbit dingte cihna hi. Mipite pen khat hi loin ngaihsutna tuamtuam nei tampi ahih manin thukhensatna bawlna (decision making) leh a hoih lam a ki-ukna (governance) a piang theihna dingin mipite sik leh tang a nasem ding kiteelcingte pen minpha makai (leader) a kici ahi hi. Sila khat a to (master) sangin lianzaw ngei lo hi.
Mipite sik leh tang dingin a kiteelcing pak gam makaite leh hong cing ding security kicite peuh to leh kumpi sasa in, democracy a thuneihna lianpen nei mipite hi napi makaite leh galkapte thuneihna khempeuh nei sasa in, makaite leh security teng gamtatna a encik mite pen mit kihumsak ding leh mittaw ding peuh a sasa lai teng bekin mipite pau thei lo ding hi, kamhum sak den ding leh mot tut belbal ding sasa heemham uh hi.
Mipi pen democracy ah a guardian ahih lam thei loin mipite sila leh nasemte kumpi leh to zaa len sasa teng bekin thuneihna lianpen neite pau a zakdah uh a ngeina hi. Mipite sanga mipite silate leh nasemte dictatorship banga gam uk ding a deih teng bekin mipite pau leh a phun ci uh hi. Mipite in amau nasemte leh silate a phunsan nop uh a, a hangkhumsan lualua nuam uh a, a tai gawp nuam uh a, a bek hek nop uh a, a bil kaih nop uh a, a thuhilh nop uh leh thuneihna khempeuh nei lua hi. Tua pen mipite thuneihna, rights uh leh a power uh hi a, a rights uh leh a power uh kuamah suhsak thei lo a, cihmah hun in bengdai zo ngei lo ding hi.
Democracy a thuneihna sangpen nei mipite pen sila a sasa a, a silate leh nasemte (gam makaite) to leh kumpi suahsak sawm in, sila leh nasemte thuneihna khempeuh a pia nuam thapai teng bekin mipite pau leh a phun ci ngam uh hi. Tua bangte pen democracy leh politics cih a min bek thei milmial teng hi uh a, a khiatna bang hiam cih a tel melmal nai lo teng bek hi. Democracy tawh ki-ukna nuai-ah a phun nuam teng phun in, a ciak nuam teng ciak in, a gensia nuam leh a phat nuam tengin suakta takin a pau theih ciang bekin democracy cidam a, lampi man ah pai lai a dictatorship tawh ki-ukna lam manawh nai lo hi cih a kitelna leh kilatna hi bek hi.
American 16th President Abraham Lincoln in, "Democracy i cih mipite thuneihna tawh gam ki-ukna, mipite vaihawmna leh mipite ading ki-ukna hi," ci hi. Makaite thuneihna leh makaite vaihawmna leh makaite adinga ki-ukna hi ci lo hi.
✍️Thang Khan Lian
