A KIBANG LO TENG GAWM THEI LENG PICIN'NNA.
Agelh ~ Thang Khan Lian
Khat leh khat aw kidang githa khau,
Mel tuamtuam nei-in mel sagih a nei sakhituhup;
Aw guk ciang (githa) khat hi; mel sagih khat mah hi.
Lungtuak-a a pankhawm uh ciangin a aw leh a mel ithuai si....
Ngaihsutna kibang lo kitukalh ziazia nei innkuan khat,
A pa leh a nu' ngaihsutna kikhat ngei lo innkuan;
A tate ngaihsutna kikhat loin kitukalh den innkuan
Ahih hangin lungtuakin a ngaihsutna uh
Hong gawmkhawm theih uh ciang bek un
Innkuan khatin hong ding thei-in hong pangkhawm thei uh hi.
Zomi sunga political ideas leh muhna, geelna a tuam ciat,
Khat ngaihsutna a dangte adingin a paikhial bangin kimu;
Khatin ko pawl ham zaw, lungpicing zaw hi ci nuam sese,
A dang ten no ngaihsutna leh muhna khanglui (old fashioned) lua ta... kimang thei nawn kei... tu lai vai nawn kei cihsan sese..
Ngaihsutna kibang lo hong kinawktuah ciangin kiniamkhiat nuam masa a om loh ciangin kitelsiam lohna, tungnun' ding kituhna, sisan naisan kisuahna, ngongtatna leh Zomi political movement thanem sak zawsop a, namdang ten hong nuihsan uh hi.
A kibang lo teng gawm thei leng picin'na hi.
Aw kibang lo teng gawmkhawm thei leng ithuai zaw hi.
Mel kibang lo teng gawmkhawm thei leng
Etlawm in kipumkhatna piang thei pan hi.
Ei ngaihsutna bek man i sak leh Zomi nautang teng pei lung-am in philtang bangin i kithehzak sak ding a, kithanem semsem ding hi. I ngaihsutna kibang lote sangin ngaihsutna kibang teng
I khilkhawm, gawmkhawm thei ciangin i political kalsuan
Hong muibun pan ding a, kimainawt thei pan ding hi.
I ngaihsutna tuamtuamte lawng khat sungah thun khawm in,
Khat ngaihsutna a kizat theih loh ciangin a dang khat ngaihsutna I zat theih ciang bekin na khatpeuh hong kimang thei pan ding a,
Lawng khatin i ginkhawm theih ciangin i politics hong muibun thei pan ding a, hong picing zo panin i kalsuanna ding mun i nawk thei pan ding hi. I ngaihsutna kibang lo teng bek i kinawktuah sak lai teng i gam leh minam adingin bangmah i sem man kei ding a, buai loh ding teng buaipih in hun in hong khengkheng ding a, nam dangte mei bek gal et thapai in, i hun bei den ding hi.
Milip tam minamte bang kihi lo ahih manin "no" leh "ko" muhna, ngaihsutna, thusan zia, paipih dan kibang kei ci-in i kilang bawl lailai leh democracy ah milip tamtam (majority) power tam ngah ahih manin i power ngah ding neu mahmah ding hi cih phawk hun ta hi. I minam bup hamphatna ding power gol i ngah sangin a mei bek i galmuh thapai den lel ding hi. Miksi sa zawngte a tung a pang, a kiu a pang, a lai a pang, a leek a pang om napi in hong pankhawm uh ciangin sa gol pipi zawng zo pan uh hi. I pan'na a kibat lohna hangin i kigal bawl lai teng sa kizawng zo ngei lo ding hi cih phawk hun ta hi. A kibang lo teng gawmkhawm leng picin'na hi.
Milip tam minamte bang kihi lo ahih manin "no" leh "ko" muhna, ngaihsutna, thusan zia, paipih dan kibang kei ci-in i kilang bawl lailai leh democracy ah milip tamtam (majority) power tam ngah ahih manin i power ngah ding neu mahmah ding hi cih phawk hun ta hi. I minam bup hamphatna ding power gol i ngah sangin a mei bek i galmuh thapai den lel ding hi. Miksi sa zawngte a tung a pang, a kiu a pang, a lai a pang, a leek a pang om napi in hong pankhawm uh ciangin sa gol pipi zawng zo pan uh hi. I pan'na a kibat lohna hangin i kigal bawl lai teng sa kizawng zo ngei lo ding hi cih phawk hun ta hi. A kibang lo teng gawmkhawm leng picin'na hi.
