LAI GELH DAN NAM TUAMTUAM.
Agelh ~ Thang Khan Lian
Lai gelh dan pen a tangpi in lom li in kikhen hi. Tuate pen ahihna bang (expository) a gelhna, mi thuzawh theihna ding leh mi lungsim zawh theihna ding (persuasive) a gelhna, ahi bang genna tawh (descriptive) gelhna leh tangthu banga (narrative) gelh cih bangin kikhen hi.
Tua loin khuangai thei, sia leh pha khentel thei (rational) a gelhna, a theih hamsa pian, thu tangpi leh paizia sel bawl napi a man theih ding deihna tawh gelh (critical) gelhna, kibawlphatna (reformist) deihna tawh gelh cih leh a source tawh kituak pansan a laigelh cih bangin kikhen beh thei lai hi. I hoih lohna teng a gen ngam phiatphiat a, kibawlphatna deihna tawh critical, reformist laigelh (writer) pen tu lian in kisap lianpen hi ci-in ka mu hi. Critical leh reformist pai dan in lai i gelh ciangin a zadah, hong el nuam, hong lang bawl nuam, hong mudah leh kipilsak, kithukhual sak hong ci a tam mahmah hangin hih banga lai gelh ngamna pen a thawm ngaih pen a, thu ngaihsun thei tampi leh thuman deih tampi in kibawlphatna ding leh lunggai phat kik theihna na ngah zaw uh hi.
Kei pen a tangpi in critical, reformist leh a source ka zatte pansan a laigelh uuk lam ka hi zaw hi. Pawl khat ten critical pian in lai i gelh ciangin na zadah pahpah se in, khentuam, guptuam nei, minam mindaisak nuam cih bangin hong ngawh pahpah mawk uh hi. I hoih lohna pen a hoih banga gen teitei leh gelh ngamna pen thuman lo hanthawnna leh thapiakna lianpen hi cih pen i phawk kim ding kisam ta hi. Kuamah mimal elnopna leh lungsim neihna tawh mimal min gen in lai ka at ngei kei a, tua bangin zong ka gelh ngei kei ding hi.
Mi khat hoih lohna selpho nuam luat manin a fb status update leh a fb wall leh post khawng amau phalna ngen se loin screenshot a post veuvau leh mi maan (photo) khawng peuh ut banga group khawnga phalna nei lopi a post cih pen privacy right paksatna lianpi leh mi dangte rights palsatna lianpen hi a, thusia le uh zum kong, mang kong a kihek theihna banah thong kiat theihna hi cih pen a kuapeuh fb zang ten i theih kim tek ding i kideihsak a, i kizasak hi. Ka rights hi na cih ngam lai leh leitung ah nang banga tawta leh rights cih a khiatna telcian nai lo pen pa/nu na hi ding a, na nu leh na pa na kiteng kei hen la, leitung ah piang se kei lecin hoihzaw lai ding hi.
Zomi sungah a tunga lai gelh dan tuamtuam lompi lite a gelh a tam mahmah hangin critical, rational leh reformist writer pen kitawm mahmah lai a, a gelh ngam mel zong ki-om lo ahih manin ka veina leh awlmawhna lianpi khat ahi hi. Mi dang ten man hi a cih ngeingai hangin thu lim takin ngaihsun pha loin man hi i va cihpih pahpah khak ding dahhuai mahmah ding hi.
US President 6na Benjamin Franklin kammal lunggaihhuai tham cing ka sa mahmah hi. "A sim tak ding, a sim tham ding, a ciamteh tham ding lai na gelh thei leh zong a sim tham ding, a ciamteh tham dingin nungta in," na ci hi. Mi khempeuh zaknop ding thuman lo i gen sangin kuamah zak nuam loh ding thuman gen leng ngaihzaw den hi.
Minam picing i suahna dingin i lungsim picin' kul hi. I lungsim picin'na dingin lai simsim, lai sinsin kul hi. Tu laitak ei Zomite a tawmzaw dinmun in "Laisimna I Manphatna" nangawn a thei nai lote leh a sinte leh simte sanga a sim leh sin lote kithei sak zaw lai minamte ihi hi. Hanciam ciat ni.
