Thu laigil
Agelh~T.Sawm Lian
I sep theih panin ei le ei tawi i kikhai a, i sepna tungtawn in mite in tawi hong khai uh hi.
Kipan photphot lecin, na lawhsap hangin pilna na ngah lawh veve ding hi.
Na nuntakna a kikhelsak ding mi na muh nop leh limlangah ki-en in.
Tuhunin na sep leh nidang ciangin na ne ding a, tuhunin na nek leh nidang ciangin na sep kul ding hi.
A sia lam vive ngaihsutna tawh na nuntakna pen ahoih lamin na zang thei kei ding hi.
I lawhcin nading hong dal thei lianpen ahihleh lawhsap ding lauh luatna hi.
Mi gualzote lungkia pahpah lo uh a, a lungkia pahpahte gualzo ngei lo uh hi.
Gukvei na puk leh sagihvei thokik in. – Japante Paunak
Kaamphatna tawh a lawhcing mi om a, ahi zongin a tamzaw pen hanciamna tawh lawhcing uh hi.
Khialhkhak ding lauh luat mana bangmah hih ngam lo a i omden pen i khialhna lianpen hizaw hi. – John C Maxwell
Mi thupi i cihte pen nang leh kei mah banga mi mawkmawk na hi masa uh a, sawmna/tupna thupi tak a neite na hizaw uh hi.
Kipatkhiat nadingin mi thupi na hih kul lo a, ahi zongin mi thupi hih nadingin na kipatkhiat kul hi.
Ka deihna teng tangtunsak ding sangin, ka deihna teng khiamin lungdam ding ka kisin zaw ta hi. – John Struart Mills
I tuikhuk a kan ciang bekin tui manphatna i thei pan hi. – Benjamin Franklin
Mi 100(za) ann na vak zawh kei leh khat vak lel in. – Mother Teresa
Na kuan lama na tuah mite tungah diktat in; na ciah lam ciangin kisam kha thei ding hi teh. – Wilson Mizner
Theihna pen midangte tung pana kisin hi a, pilna pen eimah a kisin ahi hi.
Tam na gen kei naak leh sauvei thei ding uh hi.
Na tuak thute in na nuntakna makaih lo a, bangci bang mi na hi hiam cih hong kilangsak hi lel hi.
Lawhcinna lampi ngaihsun man lo zah dong a mi buaite pen mi lawhcing i cihte hi nuam mahmah uh hi.
Mipil in amah kitheician a, na tampi tak kitheihmawh bawl hi.
Na hoihna na lahkhiat maloh muantaak taktak lo ding hi teh.
Rose in ling a neihna hangin na mudah kha thei a, tua ling laka paak hangin na it thei hi.
Phatna kammal in mi hoih hoihsak semsem a, mi gi lo gi losak semsem hi.
Na kidempihte zawh nading bek hi loin na hih theih laka a hoihpen hih sawm in.
Zuau hanga lungdam sangin, thudik hanga thuak hoihzaw hi.
Lawhsapna in a etsak pen, lawhcin sawmna neu lua lai cihna hi.
Gensiat na ut kei leh bangmah sem ke’n, bangmah hi tuan lo ding hi teh.
Huih leh tuihualte pen tembaw hawl siam penpente lamah pang hi.
A zongsat na hoihlote a zo thei mi pen mi hatpen ahi hi.
Hatlai hun pen nuamna tawh kidim hi a, khangham nuntakna pen kidopna tawh kidim hi.
Lungkiatna in a hong kimkot hun lai tak ahi, na dinmun bawlphat nading hun manpha!
A manpha mahmah nuntakna piak na hihna hang pen, nungta ding a na hatna hang ahi hi.
Mihaite in lungdamna pen gamla pekah zong uh a, mipilte in bel amau khutnuaiah koih uh hi.
Nek ding na piak leh ni khat ading bek hi ding a, nasep na sinsak leh kumtawnin kimang ding hi.
Sep khialh nei ngei kei lecin a khial thei lo na kisa kha ding hi.
‘Sem thei ing’ cih na kitheih leh a kim khat a zo khin na hi hi.
Haksatna pen i hat leh hatloh etsakna vanzat hoih mahmah hi.
Hauhna pen thupipen lo a, lawhcing ding a nakpi taka hanciamna pen thupi zaw hi.
Mi etteh taakte pen a puuk ngei lote hi loin, a puak uh zong a thokik mite ahi uh hi.
Hun mawk beisak pen nuntakna mawk beisakna ahi hi.
Mi thupi a kicite pen a sum neih uh pan kiteh lo a, a ngaihsutna zia uah kinga zaw hi.
Mi hai ii a lungsim pen a kamah om a, mi pil ii a lungsim pen a lungtang sungah om hi.
Mi mawkmawkte’n a masa bek mu uh a, mipilte’n ahih leh a tawpna thupingaihsut uh hi -Wawyar
Nupi khat in a pasal khantoh nadingin tha a piak theih mah bangin, a pasal gelnate zong susia gawp thei veve hi - Andrew Carnegie
Na gensa kammal lungngai kikkik in. Na lungngaih khempeuh lah gen sam keive ni teh -D. Lam
Tuhun adingin a hoih na na sem thei kei zongin, nidang cianga hoih ding na sem in.
