Topa In Hong Kem Ding Hi
God Will Take Care of You
(Late 91:4)
Agelh~Zam Khat Kham
Civilla D. Martin (1869-1948) W. Stillman Martin (1862-1935)
A kuamapeuh in a deih mahmah hih hehnepna leh thapiakna la pen Martin-te nupa in 1904 kuma a phuah uh ahi hi. Martin-te nupa Lestershire, New York-a Practical Bible Training School ah a hawh laitak un a phuah uh ahi hi. Tua hun laitakin tua sanga president John A. Davis in labu khat bawlbawl-a, a huh dingin Martin-te nupa cial hi. Tua Lai Siangtho sangah a taam sungun ni khat pawlpi khat-a thuhilh dingin kisam hi. Amah pen tua hun lai-a thuhilhsiam minthang Baptist evangelist khat ahi hi. A pai nading pawlpi amau omna Lai Siangtho sang panin gamla piana, tua Nipi Ni zingsangin a zi dam lo ciitciat sawnsawn hi. A pai nading gamla simsim ahih manin a pai nadingah pai lo-a khawlkik mai ding ngaihsun hi. Tua hun laitakin a tapa un, “Pa aw, Pasian in tuni hua pawlpi ah thu gen dingin hong deih leh nang om loh kal-in ka nu na kem lo ding hiam?” ci kekkak bilbel hi. Reverend Martin in zong hisa pahlian-a, a thuhilh ding kipelhsak lo-in pai pah vingveng hi. Tua ni-a a thuhilhna Pasian in thupha pia mahmah a, mi tampi takin Zeisu Khazih Honpa-in sangin piangthak uh hi.
Tua nitak inn a tun ciangin, a zi mahmah zong nakpi-in nuamtuam-a om mu hi. Nuamtuam mawkmawk bek lo-in zingsanga a tapa’ kammal, “Pasian in na kem ding hi” a cih pen la dawng khat-in na phuaka na manlah zawzen hi. A nitak ciangin Reverend Stillman Martin in a zi’ lamal phuah tawh kituak ding la-aw phuak-a tuni donga i saksak la-aw hi pah hi. A kumkik ciangin W.S. Martin leh President John Davis in tua Lai Siangtho sanga zat dinga a kaihkhop uh labu Songs of Redemption and Praise sungah kihel pah a, “Pasian In Hong Kem Ding Hi” pen leitung mun tuamtuam-a kideihpen la khat hong suak pah hi.
Hih lamal a phuak Civilla Durfee Martin pen August 21,1869 ni-in Nova Scotia (Canada) ah suak hi. Dr. Martin tawh a kiteen ma-in tawlkhat sung sangsia semin laihilh-a, tua kawmin music sin hi. Reverend Martin tawh a kiteen khit uh ciangin a lawmpa’ zinna khempeuh ah zui kawikawi-a a nasepna nakpi-in panpih thei hi. A nupa un gospel la tampi mah phuak khawm uh hi. Mrs. Martin’ phuah late lakah “His Eye Is on the Sparrow” a cih la bang a minthang phadeuh ahi hi. Tua la bang bel a aw Charles Gabriel in phuahsakkik bilbel hi. March 9, 1948 ni-in America gam Atlanta, Georgia ah si hi.
Walter Stillman Martin bel America gam Rowley, Essex County, Massachusetts ah 1862 kumin suak hi. Harvard University ah pilna a sin khit ciangin Baptist pawlpi ah ordination kipia hi. America gam buppi ah Bible conference leh evangelistic thuhilhna nei kawikawi-a minthang mahmah hi. 1916 kumin Martin-te nupa Disciples of Christ pawlpi ah lut uh a, North Carolina-a Atlantic Christian College ah professor of Bible sem hi. December 16, 1935 ni-a a sih dongin Atlantic, Georgia ah teng uh-a, nasepna tangzaii takin nei uh hi.
Pasian’ na i sepna ah i tuah ngeisa leh i theihsa ciat mahbangin a kuamapeuh in hehnepna leh thapiakna kisam den hi. Mihingte i upmawh sangin kithanemzaw thei mahmah mawk hi. Martin-te nupa’ phuah hih la mahmah zong tua bang hun cianga mite a hehnem ding leh thathak a guan dinga Pasian’ zat la ngaih ahi hi.
Gimna thuak hang, lungmang kei in,
Pasian in hongkeem hi.
Ama itna nuai ah om in
Pasian in hong keem hi.
Pasian in hong keem hi.
Nisim in ah, Tawntung in ah
A mah in hong keem hi
Pasian in hong keem hi.
Nasep nakpi na bawi laitak
Pasian in hong keem hi
Na paina lam launa om leh
Pasian in hong keem hi.
A mah nadeih teng hong pia ding
Pasian in hong keem hi
Piak loh bang mah om kei ding hi
Pasian in hong keem hi.
