Nong Deihna Mun Peuh-ah Pai Ning
I’ll Go Where You Want Me to Go
(2 Corinthians 5: 9-14)
Agelh~Zam Khat Kham
Mary Brown (1891-?) Carrie E. Rounsefell (1861-1930)
Charles E. Prior (1856-1927)
Ki-apna la kici peuhmah laka la ngaihpen khat-a kingaihsun hih “Nong Deihna Mun Peuh-ah Pai Ning” cih la a phuakte’ thu kitam theih lua khol lo hi. Hih lamalte a phuaknu Mary Brown bel Fanny Crosby’ teenna New York pan a gamla lua lo, Jewett City, Connecticut-a teng cih leh Fanny Crosby’ phuah la “A Sia Ding Honkhia In, A Si Ding Don In” cih la deih mahmah hi, cih ciang kithei hi. Tua la tungtawnin hih la, “Nong Deihna Mun Peuh-ah Pai Ning” a phuah ahi hi. A phuah cil lai-in Mary Brown’ la taang khat leh a sakkik bek hi a, a thulu “I’ll Go Where Thou Wouldst I Should Go” ahi hi. Tua Jewett City mah-a teng, church organist, la-aw phuahsiam leitung nasepna lama banker Charles E. Prior in a taang nihna leh a taang thumna phuahbeh hi.
Bangbang ahi zongin hih lamalte leitung buppi ah a kizelh theih nadinga a pua kawikawi ding la-aw ngaih mahmah a phuak pen numei evangelist Carrie Ester Rounsefell ahi hi. America gam New England kual tengah zin kawikawi-in, auto-harp khat tum kawma gospel la sasa khat ahi hi. Jewett City kiim tengah a zin laitakin Mary Brown’phuah, “Nong Deihna Mun Peuhmah Pai Ning” cih la mu kha hi. Lungsim takpi tawh a ki-ap mi khat’ lungtang pana hong luangkhia lamalte ahih lam thei pahlian a, ama’ auto-harp tumin a la-aw thak ding khat phuak hi. A zawh ciangin “Nong Deihna Mun Peuhmah Pai Ning” la in aw thak khat a nei hong hi pah a, a aw lui sangin kituakzaw tham hi. Kum tampi sung mah a bulphuh lapi-in nei-a, a paina khempeuh ah sa den hi. A sawt lo-in hih la ngaih pen Carrie E. Rounsefell’ sak bek hong hi nawn nawn lo-in leitung buppi ah hong kizel hi.
Hih la in mi bangzahte’ nuntakna khel-in mi bangzahte’ nuntakna ah nasem cih bel tawntung mun i tun ciang bekin kithei ding hi. Hih la tungtawnin gospel music-a mi mingthang mahmah mi nih in bel a teenna uh East Tennessee nusia-in Pasian in a sawlna peuhpeuh ah pai takpi uh hi. Tuate lakah khat bel Dr. Reuben Archer Torrey tawh kithuah-a cialpi khempeuh-a la makaipi a sem den Charles M. Alexander ahi hi. A dang khat bel Billy Sunday cialpite-a la makaipi a sem den Homer A. Rodeheaver ahi hi.
Hih la tawh kisai-in Homer A. Rodeheaver in a tuahkhak ngei thu khat theihnop huai ka sa hi. Khatvei, Homer A. Rodeheaver leh John D. Rockefeller, Sr. te Palm Beach, Florida ah golf kimawl khawm uh hi. A golf kimawl uh a kipat ma-un Rockefeller in Rodeheaver kiangah a deihpen la khat a sak nadingin ngen hi. Homer A. Rodeheaver in zong hih “Nong Deihna Mun Peuhmah Pai Ning” cih la sa pah hi. A kiim a paam vuah hoih taka kipuah paakte leh tang taka kisuan diudeu palm singkungte in umcih a, vasate ham ciauciau-in van ah lah meii khat beek om lo-in dum kilkel-a, tua laitakin tua huna leitunga mi haupenpa Rockefeller in hih la limtakin ngai ngiungeu hi. A lungsim su kha mahmah hi. Rodeheaver in a lasak a man ciangin Rockefeller in, “Homer, nuntakna khat bek nei hanga – a sawt lo-a bei pak mawk ding! Zeisu Khazih’ ading i sep sunsun bek a kip ding hi mawk!” ci ngau keii hi. Tua a cih khit ciangin, “Khaileh! tu’n i golf kimawl ni ei leh” ci-in a kimawlna uh zom uh hi.
