Nang Le Kei Hong Sam Hi
Softly and Tenderly Jesus Is Calling
(Matthew 11:28)
Agelh~Zam Khat Kham
William L. Thompson (1847-1909) William L. Thompson (1847-1909)
Ama’ phuah late lak pan mi’ deihpenpen dawng 4 man dingin New York-a la khente in dollar 25 bek a piak vial uh ciangin William L. Thompson in ama’ late ama’ thu-a khetkhiat hong kipan hi. A sawt lo-in a awn tampi-a sim ding hong zuakkhia a, “The Lord of Ohio” cih ahi zongin “The Millionaire Songwriter” cih ahi zongin min hong ngah hi. Hih bangin minthanna leh hauhnate a neih kawmkal-ah Will Thompson in ama’ nuntakna ah a kisam khat om denkeii leh kilawmsa hi.
Ni khat, D.L. Moody tawh kimu a Moody in, “Will, na la phuahte hoih mahmah, ahih hang bang dinga mite’ lungsim nuamsaka Khazih kiang a tun ding late phuak lo na hi hiam?”ci-in kuppih hi. Tua ni-a kipanin Will Thompson in Pasian phatna la bek phuaka, a nungciangin kisikkik het lo hi.
Hih la a phuahna a nungthu lian tampi kithei lo hi. Ahi zongin Moody leh Sankey in America leh Great Britain ah campaign a bawlna khempeuh vuah hih la sak loh hun nei lo uh hi. Hih la a phuahna a nungthu tampi a kitheih loh hangin a nuntakna bangzah-in kihel cih hih thupiang khat in hong lak hi. 1899 kum December kha-in D.L. Moody in lungtangnat (heart attack) ngah-a a nungta dingin kilam-en lo cih, Will Thompson in a zak ciangin ama’ tenna East Liverpool, Ohio panin dingkhia pah a, D.L. Moody’ omna Northfield, Massachusetts lam zuanin pai pah vingveng hi. Moody’ tungtawna a nuntakna mahmah a kikhel ahih manin pai loh phamawh-in ngaihsun hi. A pilna a siamna khempeuh Gospel la phuahna-a a zat nadinga a hantawn Moody hi mawk hi.
Northfield a tun ciangin Moody’ natna nasia lua mahmah-a leenglate kuamah kitumsak lo, cih va mu hi. Ahi zongin Moody in a lawmpa hong tung cih a zak ciangin samsak pah hi. A nih un kimu uh a, a khatpen leitung buppi ah lungdamna thu a tangko pa, a khatpen tua lungdamna thu mah la-in sa-a a tangko pa ahi hi. Will Thompson in a liing keuhkeuh Moody’ khut a khut nih in hum-in len-a, a lungdamnateng gen hi. Ahih zawh zahzah-in Moody pau a, “Will, leitunga ka hihtheih tawp-a ka sepna khempeuh sangin ‘Zeisu in Damtak Hong Sam Hi’cih la a phuakpa hi leng utzaw taktak ingh” ci-in tua la leh a phuakpa thupi a sakna gen hi.
Will L. Thompson bel America gam East Liverpool, Ohio ah November 7, 1847 ni-a suak ahi hi. A pa Josiah Thompson in Ohio State Legislature ah term nih sem ngei hi. Thompson a neu lai-in 1870 pan 1873 ciang Boston Music School ah kah hi. Tua khit ciangin Germany ah music mah sin beh lai hi. Mipite’ ading la phuah ding mah tup lianpen-in nei den hi. A tupna tangtungin minthang mahmah hi. Leitung la tuamtuam phuaka a minthan mahmah khit ciangin a pilna a siamna khempeuh gospel la phuahna-in zang hi. East Liverpool leh Chicago khuate ah music khetkhiatna leh music van zuakna nasepte nei a, mihau khat hong suak hi. A hauh-a a minthan mahmah hangin migi mahmah-a, daii hiithiat mahmah hi. A kithuahpihte in it mahmah uh a thupisa mahmah uh hi. Sakol leeng khat tungah tuangin Ohio State sungtengah ama’ phuahsa late sa kawikawi-a mite’ it mahmah khat-in om hi.
Maitai in damtak Zeisu in hongsam hi.
Nang leh kei mah hong sam hi.
Topa Zeisu’n lungduaitakin hong ngak hi.
Nang leh keimah hong ngak hi.
Inn ah (inn ah) ciah un (ciah un)
Gimna thuakte hongciah un
Lungdam takin Topa Zeisu in hongsam
Mawhnei te hongpai un ci
Bang khawl I hiam Topa Zeisu hong thum hi.
Nang leh kei kiang hong thum hi.
Hong hehpihna bang thu’n donlo I hiam?
Nang leh kei thupha hongpia
Ahun in amanlang in hongkheng thei hi.
Nang leh Kei hong kheng ding hi.
Khuamialna leh sihna natna hong nai hi.
Nang leh kei hong nai ding hi.
Nong itna leh a damdang thuciam na pi
Nang leh kei aa ding koih hi.
Gamtat khialhna Topa’n hong phel sak ding hi
Nang leh kei aa phel ding hi.
