Na Thumaanna Lian Hi, Ka Pa Pasian Aw
Great Is Thy Faithfulness
(Kahla 3:22)
Agelh~Zam Khat Kham
Thomas O. Chisholm (1866-1960) William M. Runyan (1870-1957)
Tunai-a kiphuak Pasian’ hoihna leh thumaanna a kipahtawina late’ lakah a kideihpen khat ahi hi. La pawlkhatte a phuakte’ nuntakna-a thupiang khatpeuh hanga kiphuak hi hamtangzaw a, ahi zongin hih la pen a phuakpa’ nuntakna ah “zingsang sima hehpihna thak a muhna” tungtawna kiphuak ahih manin mi kim’ nuntakna tawh kituak deuh hi.
Thomas Obediah Chisholm pen America gam Franklin, Kentucky ah July 29, 1866 ni-a suak hi a, mizawng nu leh pate’ sung pana piang, singluang tawh a kilam buk sung pana khangkhia ahi hi. High school zong kah kha lo, pilna sangpi sin kha het lo hi napi-in kum 16 a phak ciangin pilna tawmkhat a sinna sang mah ah sangsia sem kik hi. Kum 21 a phak ciangin kal khat hal-a a khua vua kihawm The Franklin Favorite ah associate editor sem hi. Tua zawh kum 6 ciangin a khua vuah Dr. C.H. Morrison in cialpi bawl-a, tua lai ah piangthak hi. Dr. Morrison’ hanthotna tawh kizui-in Louisville ah kituah in Dr. Morrison’ hawmkhiat Pentecostal Herald ah office editor leh business manager thuah-in sem hi. Tua khit ciangin Methodist pawlpi ah ordination kipia a, ahi zongin a ci dam het lo ciitciat-in a pastor nasepna pan khawl hi. 1900 kum ciangin Winona Lake ah life insurance agent sema, tua khit ciangin Vineland, New Jersey ah kituah hi. 1953 kumin a nasepna pan pension la a, a nuntakna a om laiteng Ocean Grove, New Jersey-a ‘puteekte kikepna’ ah zang hi.
Mr. Chisholm in a khan sungin poem dawng 1,200 phuaka tuate’ lakah tampi mah Sunday School Times, Moody Monthly, Alliance Weekly leh a dang laihawm tuamtuamte ah suak den hi. Tua late tampi mah a aw kibulh-in hymn minthang suak hi.
1941 kumin Mr. Chisholm in a lawmte khat lai a khakna ah, “A beisa bang hun hiamkhat a kipan ka pumpi dam lohna hangin ka khasum peuhmah cikmah in tam ngei lo hi. Ahi zongin a thuciam a pel ngei lo Pasian’ thumaanna leh hong kepna lamdang tampi hong lahnate ka mangngilh kei ding hi. Tuate hangin nakpi-in ka lungdam hi” ci-in a lungsim na gen ngei hi.
1923 kumin Mr. Chisholm in a phuahsa la pawlkhat Moody Bible Institute-a nasem musician Rev. W.M. Runyan khak hi. Rev. Runyan pen July 29, 1957 ni-a a sih dong Hope Publishing Company-a editor sem ahi hi. Rev. Runyan in a genna ah: “Hih la pen a dangte tawh kibang lo-a i lungsim hong lawng mahmah la ahih manin a kilawm la-aw ka phuah theih nading leh ka phuah la-aw in hih lamalte a puak kawikawi theih nading nakpi takin thu ka ngen hi. Hih la a kizat zia i et ciangin Pasian in ka thungetna hong dawng hi cih kimu thei hi. Hih la-aw 1923 kuma Baldwin, Kansas a kiphuak hi a, keima’ hawmtawm laihawm pawlkhat ah ka hel hi” ci-in gen ngei hi.
Hih la pen Moody Bible Institute-a president sawtpi a sem hong nusiasa Dr. Will Houghton in a deihpen la hi a, sangnaupangte in zong deih mahmah-in sa mun mahmah uh ahih manin mun khempeuh-a evangelical pawlpite ah kizel kawikawi hi. 1954 kuma Great Britain gama kibawl Billy Graham Crusade ah Bev Shea in sa a, tua gamah a kisak masakna hi-in a kideihpen la khat hong suak pah hi.
Na thumanna lian hi, Ka Pa Pasian aw, Kihei kikheelna lim na nei kei hi. Nangma hehpihna kikheel in bei ngei lo, Tanglai bang mah na hi tawntung ding hi.
Na thumaanna lian hi, Na thumaana lian hi.
Zingsang simin hehpihna thak ka mu,
Ka sapna teng na khut in hong guan’ tawntung,
Na thumanna lian hi, Topa kei tung.
Ni kha le aksite, ngeina bang ciat in, Khuakhal le tuk hunte, phalbi nipi, Ngeina bang zui a hun hun a piangte in, Na thuman, hehpih, itna hong lak hi.
Mawhna mai sakna le a kip lungnopna, Nong ompih lung damna, lam nong hilhna, A nisim nong kepna, mailam lung muan’na, A pha tampite zong, nangma thupha.
