I Pasian Muanhuai Kulhpi hi.
A Mighty Fortress Is Our God
(Late 46)
Agelh~Zam Khat Kham
Martin Luther (1483-1546) Martin Luther (1483-1546)
English Traslation -Frederich H. Hedge (1805-1890)
Hih la a phuak Martin Luther pen Germany gam Eisleben, Saxony ah November 10, 1483 ni-in suak hi. University of Erfurt ah pilna sin-a, a nunglam ciangin Augustinian monk (phungzi) suak hi. University of Wittenburg ah philosophy leh theology hilh hi. “Protestant pawlpite’ July 4” (July 4 pen Americante’ suahtakna ngah ni hi. ZKK) a kici theizel October 31,1517 ni-in Germany gama Catedral of Wittenburg kongkhakah thu 95 a pha lai khat suang hi. Tua hun lai-a Roman Catholic pawlpi sunga kihilhna leh zatzia pawlkhat nakpi-a mawhsakna lai ahi hi. Pope leh pawlpi makai pawlkhat tawh kum tam simsim sung nasia taka kiselna a neih khit uh ciangin 1520 kumin palwpi pan kihawlkhia hi.
Tua banga pawlpi phuahphatna Reformation Movement hanga kingah hamphatna tampite’ lakah a thupi mahmah khat bel mipi lasakna a kizat kikna ahi hi. Biakna late a thupina leh a vangliatna Luther in tel mahmah hi. Hih bangin gen hi: “Mihaite bang mah-in mi khatpeuh in biakna late a thusim kei leh, tua mi ka paakta het kei hi; banghang hiam cih leh music i cih mite’ phuahtawm hi lo a, Pasian’ hehpihna leh Ama’ letsong ahi hi. Tua hi a, biakna late in dawite hawlkhia-in mite lungnuamsak hi. Biakna late a kisak ciangin hehnate kimangngilh a, lungsim siangtho lote leh thu dang tuamtuamte kiphawk kha nawn lo hi. Dahna, lunghihmawhna leh gimna haksatna khempeuh a piangsak dawimangpa mahmah zong phatna la a kisak ciangin Pasian’ thu a kigen cianga a taimang bangin taimang hi” ci-in gen ngei hi.
Khatvei bang, “Mite’ lungsim sungah Pasian’ thu la-a a ten theih nadingin biakna la phuak nuam ingh” ci-in gen ngei hi. “Biakna la a kizatna leh a vangliatna a thei lo mi peuhmah Pasian mite’ tunga thuhilh ding ahi zongin, laihilh ding ahi zongin ka phal kei hi” ci tangial hi.
Martin Luther’ phuah hih “Muanhuai Hong Dal Pasian” bel pawlpi kiphuahphat Protestant Reformation Movement hun lai-a a muibun mahmah la hi a, Late 46 bulphuh-a a phuah ahi hi. Tua hun lai-a thu um mite’ galdona lapi suaka, upna thu hanga thahna a thuak mite a thakhauhsak la ahi hi. Leitunga kampau khempeuh phial-in kitei a, Christian hymn thu ah la thupipen khat-a kiciamteh ahi hi. Mangkam bekbekin nam 60 bangin kitei khin hi, kici hi. England gamah Thomas Carlyle’ teikhiat pen kitamzatpen a, America gamah bel Harvard University-a professor sem ngei Frederick H. Hedge’ lehkhiat pen kizang deuh hi. Ei Tedi kam-in Rev. S. T. Hau Go’ tei Xristian La sungah ki mu thei hi.
Wittenburg-a Martin Luther’ hansuang tungah hih la a taang masa a gual masateng kigelh-a, kilawm mahmah hi. Tua gam-Germany, tua mun-Wittenburg a pai mi peuhmah in a et theih dinga kikoih ahi hi.
I PASIAN MUAN HUAI KULHPI HI.
I Pasian muanhuai khulhpi hi. Asia ngeilo kidalna
Mawhna tuibang a let mite puan bang sawpsiang huhpa hi.
Tanglai pu leh pa gal, Ei tung gal bang hong zong, Asiamna vaang a lian,
Gitloh muhdahna dim, Leitung leh agam the lo
Ei te’n ei tha bek ih suanghiam? Ei tha bek in zolo ding
Ei lam a pang mi maan omlo Pasian teel khiat mi pa in
Kua pen ahi ding hiam? Zeisu khazih a hi. Amin Topa Pasian
Tanglai tulai kibang Gal a zo tawn tung ding hi.
Dawi tawh kidim hih leitung in, Eite hong bawlsia ding dingin
Pasian deihkei, I lam kei ding, Amah’n hong zawhpih ding hi.
Khua mialna kumpi pa aa ding I liing kei hi. Amah I dozo ding
En un Sia dekta hi, kammal khat tawh puk ding hi.
Leitung vaangliatna te tung ah, Lungdamna piak kullo hi.
Kha Siangtho hehpihna ei aa, Ei lam amah hongpang khawm
Leitung nuntakna leh Nate sia khin ding aa, Pumpi athat ding hi.
Pasian thumaan kipin, Agam kip tawntung ding hi.
