Thumaan (The Truth)
Agelh~ Khansuan T. Guite
“Thuman tawh na kisem ding hi”, “Thumanlo a na sem mite kipho lak ding hi” cih otna (slogan/motto) a nei mikhat hong kipat ciangin midang khat sangin kimuangzaw thei hi. Mihingte Politics vai ahi a, Social-economic khantohna ding na sepna ahi a, Religion sung kivaipuakna sungah midang mawkmawk sangin muanna kinei baih zaw hi. Ahang pen mihing khempeuh in Thuman (the Truth) kideih tek a, thuman tawh vai a kihawm ding kilunggulh tek hi cih a kilatna ahi hi.
Mihing a piang khempeuh’ lunggulhna om tek bangin i nuntakna ah Thuman tawh vai a kihawm ding kilunggulh tek ahih manin “Thuman i cih bang hiam?” (What is the Truth?) ci’n thuman zonna a khangkhang in kinei den hi. Thungaihsut siam mipilte (philosophers) tampi takin in Thuman tawh kisai na kan uh a, tu ni dong mah muhdan, updan, theihna leh ngaihsutna kibang kimlo a, amau mimal etzia (approach) tungtawn bek in thukhupna (conclusion) a tuamtuam in na nei bek uhhi.
Zomi te sungah zong “thuman kigen nawnlo”, cih ahi zongin, “Thuman kinawl khin” cih ahi zongin i nisim nuntakna ah i zak kammalte ahi hi. Hih thu etna panin Zomi sungah zong thuman (the Truth) tawh buaina om cihna kilang hi. I om sak nuam kei zongin, a om veve hi. [Ei san/pomna ah a om kei leh a omlo-mimal bulphuh thuman (Subjective truth); ahi zongin ei san leh sanloh thu hilo in a omsa thuman (objective truth)]. Thu pen a bang cite thuman (the Truth) kici a, bangci bangin tua thuman a hihna kigen thei hiam cih pen sandan, etzia tampi om hi. “Thuman ci a mite’n a san leh a up pen a en (a gen) mite tung ahi zongin, a hun leh mun zui in ahi zongin kikhek den hi” cih tehna (tawikhaina) a zang pawl a om bangin, “Thuman pen a omsa (existence) thu hi a, a en (gen)mite leh a hun, a mun zui in khek tuanlo hi” cih tehna (tawikhaina) a zang pawl om ahih manin kinialna (debate) tawp theilo hi. I nisim nuntakna ah i tuah khak thubuai tampite zong hih thu langnih siksan a, sandan/pomdan kibat lohna dinmun pan kipan ahi hi.
Mihingte in thuman in i san/pom pen leitungah a om taktak thu (reality) tawh a kituak lian ciangin thuman i ci hi (Moral Truth). Tua bangin thuman a kisang khat pen a en mite etdan zui a tehna (tawi khaina) kinei maw, ahihkei leh a omsa (existence) thu pansan a tehna (tawikhaina) kinei cih pen mite sanna kibanglo ahih manin nisim nuntakna ah buaina leh kinialna beilo hi. A man leh a manlo a kisang thu zong mihingte sia leh pha khensatna (the morality of mankind) zui-in thuman leh thumanlo tehna (tawikhaina) zangin kiciamteh hi. (Lai Siangtho sungah sia leh pha theihna singgah a kinek khit ciangin a omsa (existence) thuman leh thumanlo theih theihna mihing in a nei ahi hi:- Mihingte in sia hi, pha hi a cih man hilo in Pasian in a omsa thu (sia leh pha) a koihsa thu a hihi.)
Mihingte Thuman hi ci a, i san leh i zat na ngawn thu pen i etzia i pomzia, a hun kilam danna leh a mun kikhekna zui ahih manin tuhun ciangin thuman kikhek bangin kigen kha thei hi. Mi pawlkhat in thuman pen upna, etna leh theihna, feeling/ emotion te tawh tehna (tawikhaina) nei in thuman a hihna lak khia uhhi. Gentehna in, Tangkha gah (bitter melon) a duh mahmah a dingin, Tangkha gah pen mehlim hi cih thuman ahih manin tangkha gah pen mehlim a hihna mansa uhhi. Ahi zongin Tangkha gah a duhlo khat a dingin Tangkha gah pen mehlim a hihna thu man hilo hi. Mehlim a hihna, a hihlohna thuman pen Tangkha gah meh a duh leh a duhlohna bulphuh a kiteh ahih manin mi khempeuh a dingin manlo hi. Tangkha gah pen a khaatna (taste) pen a duh leh a duhlo mite tungah kinga lo a, Tangkha gah pen a khaat ngei mah in kha den hi zaw hi. A khaa a duh ten a dingin Tangkha gah pen meh lim hi a, a kha a duhlo mite a ding Tangkha gah pen meh lim hilo hi.
Thuman pen a et/pom mite in a mau muhdan, up dan, theihna leh feeling/emotion te bulphuh in a man a hihna a lah khiat uh ciangin a mau bang a hilo mite a dingin lauhuaina leh siatna piang hi. Leitung galpi nihna a piangsak pa Hitler in a ma laibu gelh Mein Kampf laibu sungah “A thahat zaw mite in buluah (dominate) ding a, a thanem mite tawh kithuah lo ding, tua bang a kithuahna pen mi hatte in a mau hatna a sum uh ahi hi” cih Charles Darwin in mihingte hinsuahna (survival) thu bulpite a hi “a thahat penpen hingsuak ding – survival to the fittest” thupen a ma muhna leh upna bulphuh in tehna nei ahih manin Jews mite tampi tak sihna tuak lawh hi. Darwin’ thuman etna, sanna, muhna leh theihna bulphuhna tawh “German te thahat kei le midangte in hong cimang sak ding hi” cih thu kisang ahih manin a thahatna uh panin siatna leh galpi a piang ahi hi. “Sia leh pha” pen sia leh pha theihna a nei mite in “sia hi a cih leh sia a; hoih hi a cih leh hoih hi” cih tehna (tawikhaina) kizang ahi hi.
Thuman tehna (tawikhaina) pen “Bang (What) um (bulphuh) i hiam” cih sangin, “Bangci (How) bangin um (bulphuh) i hiam” cih i zat ciangin midangte a dingin lauhuaina, siatna tun thei hi.
Tua ahih leh thuman (the truth) i cih bang hiam? Cih dotna om pah ding hi. Nang a ding a man hangin kei a ding a manlo ahih manin thuman kici theilo ding hi cih ngaihsutna kinei pah ding hi.
Thuman taktak (absolute truth) i cih pen a omsa thu/na (existence) ahih manin a taktak a omna (reality) tawh kituak hi. Tua thuman taktak (absolute truth) a kici pen “mi khempeuh a dingin mun khempeuh ah banghun banghun in man ding hi. Something true for all peoples, at all times and in all places” pen a omsa thu (existences) hi a, tua bulphuh in tehna (tawikhaina) pan a man thu pen thuman taktak hi zaw hi.
A omsa thu/na (existence) bulphuh lo a, mimal etna, muhna, theihna, pomna leh feeling (emotion) bulphuh a thuman a kan mite in hih mun panin lampiak thei hamtang hi. Mite in thuman kici pen a mau etna, muhna, theihna, sanna leh feeling/emotion zui a thukhupna a pia mimal bulphuh thuman (subjective truth) pen lenkip leh zui baih sa zaw hi. Thu/na pen hun tawlkhat sungah mi pawlkhat a dingin a man tawh kibang hi. Ahangin tua hun sunga mi a tamzaw in man hi ci’n, um in a san man ahi hi. Gentehna in, Hun khat lai in leitung pen a peek (flat) in mi khempeuh in um a hih manin Leitung peek hi cih pen tua hun a dingin thuman in kisang hi. Ahi zongin leitung pen a peek hilo a, a beem a hihi (A peek a ki sang bek hi a, beem veve hi). Leitung a beem lam a kitheih ciangin thuman kikhek (change) bangin sang uhhi. A taktak in leitung a peek pan in a beem a kikhek tawm hilo a, a beem a omsa thu pen, a peek hi, a cihte in a muhna leh theihna pen a beem ah a kikhek na hang hi zaw hi. (A omsa thu- hih mun ah leitung beemna thu pen kikhek kawikawi hilo hi.)
Mimal bulphuh thuman (subjective truth) pen “mi pawlkhat te a ding bek in man a, mi khempeuh a dingin a kibang hun (the same time) in manlo hi.” Tua ahih manin hih pen thuman taktak (absolute truth) hilo hi. Gentehna in, New York a om Zomi khat a dingin January kha pen Vuk (snow) kiat hun ahih manin Khuahun pen vot mahmah hi. Ahi zongin Malaysia a om Zomi khat a dingin January kha in khuahun pen lum mahmah hi. Mi khat a dingin Khuavot a, mi dang khat a ding khualum ahih manin, New York a om mikhat a ding khuavot pen a thuman ahih hangin, Malaysia a om mi a dingin khualum pen thumah khat hi vive hi. Aristotl i The Law of Non-Contradiction (A is not non-A) thu guipi zui in ngaihsut leng “thu man nih om pen thuman taktak (absolute truth) hilo a, mimal bulphuh thuman ahih manin mimal muhna, upna leh feelling te tawh kitehkhak (tawikhai)” bek ahi hi. Thuman taktak pen khat bek om a, tua bang thute pen mimal bulphuh thuman bek ahi hi.
Mi pawlkhat in thuman taktak (absolute truth) omlo hi ci’n nial uhhi. Thu leh nate pen khat leh khat kizom (relative) hi a, Thu khat a pian nading pen thu dang khat hang; na khat a pianna ding pen na dang khat hanghi ci uhhi. Thu ngaihsut pa, Aristotle gen bangin cileng, na khat a pian na ding a, a piangsak bang hiam? (what is the cause of causes?) cih kullai ding suak a, tua a piangsak thu khat, a omsa (existence) a om kul ahihna ki mu theihi. Tua a omsa thu (existance) khat om gige a hih lam i san kul hi.
Thuman taktak (absolute truth) om ahih leh, thuman dang om kikkik nawnlo ding a, thuman khat in zong thuman dang piangsak nawnlo dinghi, cilai kha ding uhhi. Tua banah, nisim phial in thuman a thakthak kimu khia hi mawk a, tua pen diklo ding hi ci thei uhhi. A taktak in Thuman pen a piangtawm thak hilo, a omsa thuman a kimu khia hi bek hi. A tunga gentehna khat i genna ah, leitung peek leh puum vai pen, “peek hi” cih thuman in a kisanna pan “puum hi” cih thuman a kimuh khiat ciangin thuman kikhek bangin kigen hi. A taktak in thuman in i theihna hong khangsak hilo zaw a, a omsa thuman i teldan kikhel bek hizaw hi.
Tua ahih leh na khat peuhpeuh thuman taktak hi cih bang ci theih ding cih ngaihsutna om kha ding hi. A omsa thu/na (existence) a om man a, thu kingaih sun thei hi. (I exist and, I can reason). A omsa a om man a, tua thu bulphuh a thu a kingaih sun thei pan ahi hi. Thuman hi ci a kinialna (debate) tuamtuam te zong a omsa thuman taktak a om man a, tua thuman taktak bulphuh a thuman leh thumanlo kingaih sun thei hizaw hi. Thuman taktak i cih pen, ei mimal bulphuh ngaihsutna, upna hang hilo a, a ma thu a a omsa thuman ahi hi. Thuman taktak pen tetti tawh lak thei in lak thei ta kei leng a omsa thu ahi hi. Thuman taktak in a taktak a om (reality) thute tawh kizopna (correspondence) nei hi. Thuman taktak pen mihing khat in a ma pilna, siamna, theihna, muhna, sanna, upna leh feeling (emotion) te bulphuhna tawh kiteh (tawikhai) ding hilo a, a omsa thu (existance) thuman taktak pan a teh leh tawikhai ding ahi hi.
Mihingte sungah thuman tawh kalsuan ding, thuman bulphuh ding ci’n awng (slogan/Motto) bang nei in, na kisepna mun tampi ah hih a omsa thuman (objective truth) pen kizui lo in mimal bulphuh thuman (subjective truth) tawh vai kihawm den hi. Tua mimal bulphuh tawh vai a kihawmna hangin “a thahat zaw mite in, thuman leh thumanlo ciamteh” ahih manin “a thahat zawte hinsuakna:- survival of the fittest” thuguipi mah kizui kha den hi. A thahat zawte in a mau upna, theihna, sandan, feeling (emotion) pansan in “man hi, manlo hi” ci ahih manin mi pawlkhat bek a dingin hoih/man a, mi khempeuh a ding manlo/hoihlo hi. Thuman taktak pen mi khempeuh a ding in mum khempeuh ah bang hun banghun in man den leh hoih den a hihna kinu sia hi.
Jesu in, “Kei mah in lampi, thuman leh nuntakna ka hihi” (John 14:6) ci hi. Hih thupen a omsa thu hi a, mimal bulphuh thuman a hi, upna, theihna, sanna, feeling (emotion) leh a dangdang tawh kisai lo in, a omsa thuman (objective truth) ahi hi. Ei mimal septheihna leh feeling (emotion) hangin thu heisuk heito a, tua bang thu heisuk heitohna (manipulate) na pan a hong piang thu pen thuman taktak (absolute truth) hi ngeilo hi. A tha hatzaw (the fittest) mite in, “man hi, manlo hi” cih ciaptehna zangin thuman leh thumanlo tehna (tawikhaina) a kizatna munah thuman taktak (absolute truth) kimu theilo hi.
