MIN PHUAK – PILVANHUAI
Agelh~T.Sawm Lian
Hoihsak man hiam, Lai Siangtho a om cih mana min ding khawngin Lai Siangtho a min pawlkhat zat ding hi het lo hi.
Lai Siangtho siam pawlkhat in a genna uah, [Zomite mah bangin] min pen Pasian banah, a mi Isarael te in thupisak mahmah a, min phuak khawng zong mawk phuak cih bang hi loin, deihna kician tak, khiatna kician tak nei-in a kiphuak ahih banah, a phuakte in a phuakna tungah thuneihna nei hi, cih ngaihsutna nei uh hi.
Abram pen Abraham, Saul pen Paul, Adam, Eve, Daniel leh a lawmte min laihna, Jacob pan Israel cihte i ngaihsut ciang min thupina kimu thei mawk hi.
Ancient Near East a nimamte lakah zong, min tawh kisai ngaihsutna kibang lianpi om hi, kici hi. Tua hi a, Daniel leh a lawmte min thak, a Babylon min uh bang zong, Babylon kumpi in Daniel leh a lawmte tungah thunei ahihna uh a lahna-a a min uh a laihsak ahi hi, kici hi. Tua tawh kizuiin a min khiatna uh zong tuam pah hi.
Daniel leh a lawmte - Mishael, Hananiah leh Azariah bang, Hebru pau a zang, a min uh zong Hebru min, a khiatna zong a hoih mahmah vive ahih laitakin, Babylon gamah min thak - Belteshazzar, Shadrak, Meshak leh Abed-nego ci-a a kiphuahsak ciangin, Babylon pasian tawh kizom, min hoih hi nawn lo hi.
Gentehna dingin, Hebru min Daniel pen a khiatna 'Ka thukhenpa pen Pasian hi' cihna hi a, a Babylon min Belteshazzar pen '[Babylon pasian] Bel in a cin kumpi' cihna ahi hi. Azariah pen 'Hong huhpa Pasian' cihna hi a, a Babylon min Abed-nego pen '[Babylon pasian] Nebo sila' cihna ahi hi. Nidanga Abed-nego pen tuhun ciang a khiatna tuam om tuan lo a, kibang den lai hi.
Lai Siangtho ah zong om, cih man hiam, hoihsak leh deih man hiama min pen utut phuak, a utut phuaksak gawpgawp ding zong hi lo hi. Pilvanhuai mahmah!.
