Ka Hi Bangin (Just As I Am)
(John 6:35,37)
Agelh~Zam Khat Kham
Charlotte Elliott (1789-1871)
William B. Bradbury (1816-1868)
A kiphuak ngei la dangte khatpeuh sangin hih la in mite’ lungsim sukha-in, Khazih’ ading mite zozaw hi, ci-in gen lehang kikhial lo ding hi. Hih lamalte amah leh amah bangmah man a kisa lo numei zawngkhal khat in a lungkiat mahmah laitaka aphuah lamalte ahi hi.
Hih laphuaknu Charlott Elliott pen England gam Clapham ah March 18, 1789 ni-in suak hi. A khangno lai-in lungkhamna bangmah neilo-in om meelmeel-a, nuntakna nuamsa mahmah hi. Portrait artist (mel kisun dinga limsuai) khat hi a, mite’ nuihzak theih ding ciamnuih tom nono agelhthei khat ahi hi. Ahi zongin a kum 30 kiim aphak ciangin dam loh kipan a, a sawt lo-in lupna tung-ngak mi zawngkhal khat-in a khantawn omsuak hi. A dam lohna tawh kizui-in a lung zong kia mahmah hi. 1822 kumin Switzerland gam pan Swiss evangelist Dr. Caesar Malan England gam Brighton a Elliott-te’ innah hong hawh hi. Tua ni a kipan Charlotte Elliott’ nuntakna kilamdang lian hi. Kha lam ahi a, lungsim lam ahi zongin a kisapna bangbang Pasian’ thu tawh kuppih a, Dr. Malan in, “Na hi bangbangin na mawhna tawh leitung mawhna a puakhia Pasian’ Tuuno’ kiang na nazuat ding hi” ci-in hanthawn hi. Kum simin Eliiott in Swiss evangelist Dr. Malan in Zeisu Khazih tawh kizopna maan taktak-a a makaih tua ni phawkna bawlden hi, banghanghiam cih leh Elliott in tua ni pen a khalam suahni in ciamteh lian hi. A pianthak zawh kum 14, 1836 mateng hih la a phuah nailoh hangin hih lamalte a i muh mahbangin Elliott in Dr. Malan’ kammalte mangngilh ngei lo ahihna kilang hi.
Charlotte Elliott kum 82 bang a nuntak hangin dam sinsen cih bang nei ngeilo hi. Khat veivei bang tawlkhat khat sung natna lianpi thuakin genthei mahmah hi. “Pasian in hong mu, Pasian in hong maikaih, Pasian in hong cing hi. A hehpihna in hong tuama, a nasepna ah ka hi banga ka lungdam ding a, aw nem in hong gen den hi” ci-in genngei hi.
Miss Elliott in hih la 1836 kuma a phuah hi a, tua kum mah-in ama’ phuahsa la dawng 115 a kikhetna The Invalid’s Hymn Book kici labu sungah kihel pah hi. England gam Brighton a pastor sem a sanggampa in a cimawh zawdeuh Pasian’ nasemte’ tate’ ading ngaihsutna tawh lam dinga a hanciam sang khat akilam zawh nading sum leh paii a huhnop man-a aphuah ahi hi. Tua nasep pen nasep manpha ahihlam theinapi-in bangmapi semzo kisalo hi. Pasian in a lunggulhna thupha pia takpi-a, tua sang a kilam zawh nadinga sum zonna bazaar-te leh project tuamtuamte pana kingah sum khempeuh sangin hih numei zawngkhal khat’ phuah la tungtawna kingah sum tamzaw takpi hi. A sanggampa mahmah in, “Pasian’ ading kum tampi na kasepna ah na nasepna gah pawlkhat a mukha dingin ka ki-lam-ena, ahih hangin ka sanggamnu’ phuah hih la dawng khat bekbek in Pasian’ na tam semzaw hi, ci-in ka ngaihsun hi” ci-in genngei hi.
Charlotte Elliott’ phuah la peuhmah a kigawmin dawng 150 pha a, England gam-a numei laphuakte’ lakah a siampen khat-a kiciamteh ahi hi. A sih khit ciangin a laidalte lakah hih la tungtawna a nuntakna uh a kikhel mi tul tampite’ lungdam kohna laikhak tampi kimu hi.
William Bradbury’ phuah la-awte lakah hih la, “Ka Hi Bangin” (Just As I Am) banah, “Ama’n Hong Kha” (He Leadeth Me), “Thunget Hun Nuam” (Sweet Hour of Prayer), “Zeisu’n Hong It Ka Thei Hi” (Jesus Loves Me), “Depth of Mercy,” “Even Me”, “The Solid Rock” cihte minthang mahmah hi.
Numei zawngkhal khat’ phuah hih la in mi bangzahte’ nuntakna khelhiam cihbel tawntung mun leh tawntung hun i tun ciang bekin kithei pan ding hi. Hih la bel kikhop man cianga ki-apna sapna beka zat ding hi lo a, thu-ummi peuhmah hih la kithuhilhsak-a, tawntung i dinmun leh Pasian tawh i kilemnate ei’ hihna khat beek hang hi lo-in Zeisu Khazih hong zawhsaksa nasep hang hi cih i kiphawksak kikkik den ding ahi hi.
Ka hi bangin, paulap neilo
Kei aa ding, na siluang simloh
Nangmah in, nong sapna thutawh
Pasian tuu-no kong zuan, kong zuan
Ka hi bangin, misia mittaw
Khuamuhna hauhna damna tawh
Kasapna teng ngahding in aw
Pasian tuu-no kong zuan, kong zuan
Ka hi bangin, mawhna baang in
Kisil tawm ding in khawllo in
Na si’n hong siangsak thei man in
Pasian tuu-no kong zuan, kong zuan
Ka hi bangin, nong sang mah ding
Nong phel, nong sawp, nong huh mah ding
Na thuciam ka um zo manin
Pasian tuu-no kong zuan, kong zuan
Source:
Christian Hymn-te’ Tangthu (Laibu)
Agelh leh laibu bawl: Zam Khat Kham
Laibu Saal / Zomi eLibrary
