Itna Tawh Nong Vaikhak Bangin (According to Thy Gracious Word)
(Luke 22:19)
Agelh~Zam Khat Kham
James Montgomery (1771-1854)
Henry W. Greatorex (1813-1858)
From the “Greatorex Collection” 1851
Neekkhawm nek huna kisa late’ lakah a ngaihpen khat-a kingaihsun hih la “Itna Tawh Nong Vaikhak Bangin” pen a phuakpa Montgomery in Luke 22:19 a i Topa’ kammal “Kei nong phawk nadingun na hih un” ci-a hong vaikhakna bulphuh-a aphuah ahi hi. I Topa in a nuntakna pia-a hong tatkhiatna leh thu-ummite in i Topa’ hong thupiakna lungdam taka i manna la-a kiphuak ahi hi. Isaac Watts leh Charles Wesley, hih laphuaksiam tegel zomin England gamah hymn tam a phuak pen James Montgomery hi ding hi, ci-in kiciamteh hi. Hymn dawng 400 bang phuaka, tuate’ lakah 1/4 bang peuhmah tuni dongin kisasa lai hi. “Thengetna In Lungsim Sunga”(Prayer Is the Soul’s Sincere Desire), “Angels from the Realms of Glory” (Vantung Gam Pan Vantung Mite – Xtian La No. 72), “In the Hour of Trial” (Ze-etna Ka Thuak Ciang – Xtian La No. 200) cih late Montgomery’ phuah late laka minthang mahmah late ahi hi.
Hih laphuakpa James Montgomery bel Scotland gam Irvine, Ayrshire ah November 4, 1771 ni-a suak ahi hi. April 30, 1854 ni-in England gam Sheffield, York ah si hi. A nu leh a pate bel West Indies a pai Moravian missionary-te ahi uh hi. England gama Moravian seminary khat-ah tawlkhat pilna sin-a, la phuakphuak, poem gelhgelh lel ahihman in kitawpsak hi. Newspaper nasep lam uk-a, London khuapi a Sheffield Register editor sem hi. Tua lai-ah editor a sep sungin mipi’ phattuam nading na lianpi tuamtuam tampi semkhia a, England gama sila neihna a bei nadingin nakpi-in pang hi. Mizawngte panpih den-a, a kinengniamte hu den hi. Newspaper sungah a buai huai thu pawlkhat gelh ahih manin nih vei thongkia ngei hi. 1797 kumin Prison Amusements kici laibu khat gelh-a, thong sunga a gelh tamzaw hi. A tawptawpna ah a thumaanna leh a cihtak luatna kithei semsem-a, mipi’ adinga a hanciamnate pahtawina-in British kumpi in kumsim pension pia zawzen uh hi.
Montgomery in mipi’ ading a hanciamte lakah Anglican pawlpi sunga hymn sak ding leh gamdang mission nasep dingte a thupi deuh ahi hi. England gama hymn phuakte’ lakah hotkhiatna thu puakkhiat ding a hanthawn masapen amah hi, kici hi. A nu leh a pa ngiat in West Indies a mite’ tungah lungdamna thu a puakkhiatna un a nuntakna uh pia uh cih mangngilh ngei lo hi. British Bible Society a pianna ding leh a kip nadinga pangpi khat ahi hi.
A la phuahte Songs of Zion (1822), The Christian Psalmist (1825), Original Hymns for Public, Private, and Social Devotion (1853) kici labute ah kikhen hi. Hih “Itna Tawh Nong Vaikhak Bangin” la bel 1825 kuma kikhen labu sungah kihel pah hi.
Hih la-aw “Manoah” bel 1851 kuma America gam Hartford, Connecticut-a kikhen Henry W. Greatorex’ labu Collection of Church Music sungah kihel a, a kikhetkhiat masaknapen ahi hi. “Manoah” i cih bel Laisiangtho sunga Samson’ pa min ahih hangin hih la-aw lian bel tua min tama kiphuak zong hih tuak khol lo hi. Greatorex bel Engand gam Derbyshire ah December 24, 1813 ni-a suak hi a, 1839 kumin America ah lal a, America gam nisuahna lama pawlpi tampite ah organist-in om hi. 1851 kuma a khet Collection of Church Music sungah ama’ phuah la-aw dawng 37 kihel hi. “Gloria Patri” (Pa Pasian le A Tapa – Xtian La No. 11) la-aw phuakpa ahihna tawh zong minthang hi.
Source:
Christian Hymn-te’ Tangthu (Laibu)
Laibu Saal / Zomi eLibrary
