Milim Le Kahlei
Agelh ~ En Khat Thang
Khat vei, Sengam a om mual sang tung khatah Buddha lim khat kibawlin etlawm kisa mahmah hi. Tua mual dawn kahtohna dingin zong suang kiciangin kahlei hoih takin kidawh hi.
Nisim phialin mitampi tak tua mualdawn a om Buddha va bia dingin kipai den hi. Mualtung kah peuhpeuhin nuam sa in lungkim uh ahih manin, mi mualtung kah nuam hong tam semsem hi. Khual gamlapi pek pan hong delh lianguh hi.
Tua bangin phimle khau bangzah phialin a kahto tawh, a tuaksut tawh hong tam semsem hi. A kahtote bang mualdawn tungin Buddha va biak ding lawp lua kisa a gim lamuh zong phawk lo phial uh in, kahleite hong sikto detdet zo uh hi. A tuaksuk kikte sem zong lungkim in, kahlei tungah hong kimawl sukin nuam hong sa ciat uh hi.
Tua leh, khuadaih khit sim zan khat, kahlei bawlna suangtum khat hong pau in, milim hong hopih hi. "Lawm aw, nang zong suang hi a, kei zong suang mah hinga, suangtum ciatciat bang dinga nang mai ah hong kikunin, zahtakna hong kipia tek napi in, kei ka hih leh khe bebek tawh hong kisik gawp, hong kituan gawp a hi hiam? Nang mai ah hong tuntoh na dingun kei siksanin hong kinei toto hi napi kei tungah lungdam ing hong ci khat beek om ngei lo mawk hi" ci-in khasiat hopih hi.
Milim in zong "lawm aw, nang pen kahlei a hong kibawl dingin na pang kiu li teng bek hong kisui tang ziau hi. Kei ka hih leh milim ka suahna dingin tamveipi hong kisat, hong kisek hi. Zumle hiam nam tuamtuam zangin hong kidawt zel, hong kitan zel, hong kisui zel hi. Bektham loin laiham (sand papers) tawh tamveipi hong kinawt gawp lai hi. Ka pumpi buppi a namsia mahmah a man duakduak za nuh tuamtuam hong kizut gawp lai hi" ci-in dawngkik hi.
Kahlei suangtum in zong telsiam ta ahih manin a om na ngei kahlei mun mahah khe tampi sik dingin om suak hi.
Hih tangthu’ deihna ahih leh, i kimle pam ah mi lawhcing mun sangpi tungin, zahtakna, minphatna a ngah khat peuh hong om teh a nuai a om pawl khatte in kihaza in, mi hing ciatciat a mah bang hi tuan peuh kici kha thei zel hi. Ahi zongin mun sangna a tung, mipil, milian, mihau a zahtak huai mite ii a thuakna, a gentheihna, a haksatnate uh i theih pih khak loh thu tampitak na om gige thei hi. Nuntak khuasakna ah haksatna, gimna tawlna, ze-etna tuihual tampi i tuak hang lungkia lo-in, i palsat zawh leh ni khat ni teh mi tampite it, zahtak le pahtawite a suak thei ding i hih lam hong phawk sak hi.
Gentheih haksatna tawm tuakin a lungkia pahpahte ahih leh bel kahlei suang bangin mite sik suk, sik toh peuhin ki om thei hi.
Source:
Hih Thute Manpha Sa Lua Ni Teh (Laibu)
Laibu Saal / Zomi eLibrary
