Rights and Responsibilities
Agelh ~ En Khat Thang
Tu ciangciang i minam sungah democracy tawh kisai kigen, kigelh a tamzaw pen Rights (mihing pianngei thuneih theihna) thu vive kigen, kigelh ciatin zong nasia thei bilbel hi. Democracy kammal huam sungah tangpi tangta te thuneih theihna, hamphatna tampitak a om mah bangin (Responsibilities) sep ding, bawl ding a kisam mawhpuakte tawh zong om khawm, tonkhawm den ding ahih lam kiphawk kha mel lo mawk hi.
Rule of Law (thukhunte tungah kingakna) tawh kisai lam ah zong kumpite thanemna te bek kimuh sak diakin, mipite thukhun zuih loh bek tham lo, thukhun bang teng hiam cih nangawn a kitheih mel loh lam kitam gen ngei lo hi. Media lam semte in zong, kumpite siatna lam bek kilim genin mipite kitangsapna lam a gen ki om mel lo hi. Hi bang likliak tawh i Kawlgam democracy kalsuanna mai lam ding pen lungzin huai peuhmah hi.
Zingsang khat ka nasep pai zekai pian kha ka hih manin, mawtaw ka nawh hawl pian leh mei san ka tuak citciat hi. Ka vei le tak ka et khiankhian leh mawtaw dang mu lo ka hih manin kinawh nopna huhauin, mei san ka kan ziau hi. Ka gamtatna hong gal muh khikhe putek pian khat in a mawtaw tawh ka nasepna dong hong delh in, "denin mei sanpi kan kha hi teh, lauhuai mahmah hi, mawtaw dang a om loh hang mei san ahih nak leh khawl ding ahi hi. Ni dang teh tua ci nawn ken, na lungsim thumaan tawh ki uk sak in" ci-in hong tai dikdek hi. Ka khialh lam thei ka hih manin ka kisuang peuhmah hi.
US ah pemta khat ka hih hangin, mihing khat ka hihna ii (rights) hamphatna te ngahin mawtaw hawl thei, nasep nei thei, a dang hamphatna tuamtuam tampi zong a ngah thei ka hih hang, ka zuih ding a kilawmte ka zuih kei leh democracy gam tawh a kituak lo pa ka hi ding hi. Hong nung delh putek pa pen police zong hi bek lo, mi mawkmawk khat ahi hi. Aw! mite in a gamuh it i cih hidan hi mawk aive cih ka phawk thak hi. Ih gam, i minam i it taktak leh a maan lo thu khat peuh i muh phetin, kei tawh kisai kei ee! ci lo-in, a maan hilh pah ding mikim mawhpuak ahi hi. Kumpi nasemte mawhpuak bek hi laizang lo hi.
Nung kum April 2013 Kawlgam ka ciah leh, Yangon ah mawtaw hawlte in a utut un hawlin, om zelzul uh ka mu a, i gam pen democracy gam dingin mipi in Rights bek deih in Responsibilities a neih loh luat lam ka mu hi. Yangon panin Kawlpi ka ciah toh leh na suk semsem lai mawk hi. Motorcycles ut bangbangin kihawl zeuzeu mai hi. Muhna bek tawh hawl uh a, a awn awnna ah hawl cih dan hi mai zen hi. Hi bang thute pen kumpi thuneite bek in mawhpuak la-a puah ding hihet lo hi. Ei mipite mahmah kikhelin thu khun omte theih ding le zuih ding kisam lua peuhmah hi. Biakinn ah Siate in mipite gen ding kisam hi. ZYA banga kipawlnate in mipi hilhcian ding kisam hi. Kumpi lam thuneite tawh kipawl in ma pankhop ding zong kisam hi. Khangnote lungtang sungah sum om peuh leh piang lel ee cih tuak phial uh a, cycle hawldante bel dipkuat huai peuhmah hi.
Mihing khat i hihna tawh rights i neih pen, gtn; suakta takin upna, biakna, thu gen theihna, laiat theihna, nasep silbawl theihnate nei hi hang. Ahi zongin tua thugen, upna, biakna le nasep silbawlnate hangin mi dangte in phat tuam pih lo-in, mi dangte a ding siatna i pian sak leh tua pen rights zangkhial kihi ta in, responsibilities lam a nei nawn lo kisuak hi. Democracy deihin i awtawt hang' human rights deih lel bek kitam a, Responsibilities neih ding a kul lam a phawk kha selo kitam lai hi.
I gennop pak ahih leh, Democracy pen a lang bek deih, a lang lam deih lo cih bangin kingah thei lo hi. A buppi in i san kul hi. Rights neihna pen a panglang hi a, responsibilities kisapna pen a lang khat ahi hi. A kigawmteh pum khat sa khat ding hipan hi. I kumpite i mawh sak kawmin ei le ei mipite zong kiet phat zel ding kisam hi. US te in our young president ci a, a kisak theih pih mahmah uh John F. Kennedy in January 20th, 1961 ni a, a thugen min thang vangvang "ask not what your country can do for you - ask what you can do for your country." hih kammal phawk huai ka sa hi.
Source:
Hih Thute Manpha Sa Lua Ni Teh (Laibu)
Laibu Saal / Zomi eLibrary
