KHUA UL PAN KHITUI
Agelh ~ CK Khai
Nupi khat gim mahmah sa in khua ul kai liangin hong tai a, inn ah hong ciah hi. A tanu omna khan sung, a lut sawm leh a tanu in a sunglam panin kong nakalh hi. Tam veipi kong kiu in a sap hangin a tanu in hon lo hi.
Anu in, apua lampan in, “Ka tanu aw kong deihsak mahmah manin kha (7) sungbang sum thalawh in ka zinkhia hi. Na tansawm bawda om nading a kisam sum ava zong hi-ing, namel kongmuh dingkal ngaklah inga, nang tun na kongkhak nangawn hong hon nuam lo” ci-in kap keei hi.
A Nu in a tanu munuam lua a hihmanin a pua lam pan a hon theih bangin kongkhak hongin a lut leh a tanu lupna ah puan za kikhuh in na kapkap hi. A nu in, “Ka tanu aw, banghiam na kah? Hong gen in” a cih hangin dawng lo in puan za kikhuhcip hi.
A nu lungnuam lo in a puanza a kaih khiat sak leh a tanu nau na paii mawk hi. A nu in nasa lua in a kah kawm in, “Kong deihsak manin tawmveisung, sum ka va zong hi. Na pil ding leh na nu leh pa nong vakkik ding lamen takin kong pantah hi, khua ul tampi luangin na ka sepna te a mawkna suak sak lawmlawm ding maw ka tanu aw” ci-in awling kawm sa in a genpih kawm in, “Hih na gil sunga nau kua hong neih pih hiam? Minsiat veve kiteng vet un, mi hong theih ma” ci-in a nu in kua hiam hong neih pih ci-in a dot hangin a tanu in kam khat zong dawng lo hi.
A nu in tam veipi a dot hangin dawng nuam lo a hihmanin, “Nang kei hong thusim lo a, navai te hong kuppih nuam lo nahih leh leitung ah ka nuntak hangin a khiatna om kei e, si zaw ning” ci-in inn sang tung pan len khiat sawm hi.
A tanu in a nu inn tung pan sidinga a len khiat sawm a muh ciangin nasa lua a hihman in, “Nu aw hong kum suk kik in, ka gil sunga nau hong neih pih hong gen mah ning” ci-in kapkawm sa-in a nu khoh bawl in a nu niik pan len hi.
A tanu in a nau neih pih kua cih gen ngam pak tuan lo in a ci hong ling in, pau khia thei pak lo hi, a nu in, “Boih aw na haksatna, na lunggimna, na maizumna te kei kiang hong ko kei leteh kua kiangah koh sawm na hia?” ci-in hopih hi. Tua ciangin a tanu in hamsa sa pipi in a nu mai nangawn en ngam lo in kap kawm ciling aw ling keuhkeuh sa-in, “Nu aw, sum thalawh dingin na khualzin sungin, ka pa zukhamsa in hong ciah a, zansim in kei hong buan hong luppih a, ut lo in ka tai sawm ciang temtatawh hongdawt sawmhi. Tuaman in ka gil sunga nau pen ka pa hong neih pih hi ci-in thumaan hong gen khia ta hi.
A nuta un khitui luang in, maizum mahmah in khuavak omkei henla, kuama muh loh dingin khua zing gam ah teng nuam si hangh maw ci-in kikah uh hi.
Nupinu in kei omloh kal in a pa tawh na kikem ding ci-in kha muang mahmah sa in sum a zonkal in a muan penpen a pasal in a tanu na buan mawk hi. Zomi ten paunak ah, "Ih muanpen zong galsuakthei" a cihmah bangin a muan pen uh a pa un siatna lianpi na piang sak mawk hi.
ZEISU nangawn zong nasep pih dinga a min tawh sam in, a tel ngiat, ni tampi a ki thuah pih Judas in sih nading phual na ngawn na tu veve mawk hi. Leitungah Pasian lo buang sih dong muan ding mihing om lo hi.
Matt 26:49-50 sung i sim ciangin Judas in Zeisu va naih hi,
va kawi hi,
thupha ngah ta in ci hi,
a tawpna ah nam hi.
Hong naih, hong kawi hong nam thupha hong piate nangawn in hong lehhekthei lai ahih manin Pasian bek mah muanhuai in belhtak hi. Tua man in David in “Ka munkip muanhuai ka belh suang pi Pasian nang mah na hihi” ci-in la na phuak ngaungau hi (Late 18:2).
Nupinu khua ul luanglianga a sepna khem peuh a muanpen a pasal in dahna khitui suak sak hiaumawk hi. Leitungah hong deihsak pen dingin i muan pen khat zong i dah penna munhong suakthei a, hongitpen dinga i lamet khat zong i gal lian pen hong suak thei hi. Ei zong mikim ading in, a muanhuai pen i hih zawh loh bangin mikim zong i muan hong bang den lo thei hi.
Koimun ah i om zongin mi muhna leh muhloh na ah ei sangin citak zawa, hong lehhek ngei lo ding, i sup nading a vaihawm ngeilo ding, hong kem khial ngeilo Pasian bekmah ahi hi. A taktak in papi pa in zong pa khat a hihmah bangin a tanu khantoh nading innkuan sung nuntak nading hun tampi tak mah khua ul luangin na a sem ngei khat ahi hi. Ahi zongin khua ul luanglianga kum tampitak a sep pen, dahna khitui mualsuah kik mawk hi.
Ni dangin papi pa pen, tanu it mahmah pa, zi te a khual mahmah pa cih tangthu a nei phial zongin tanu buan pa cih tawh a tangthu tawp ding hi mawk hi...
Khua ul luanglianga na i sep thupi hi,
Khua ul luanglianga i hanciamna thupi hi,
Khua ul luanglianga i hahkat thupi hi,
Khua ul luanglianga i sep nahoih leh tangthu tampi te dahna khitui luanna tawh i tawp khak loh ding thupi zawlai hi. Thu hoih tampi thusia in a tung pan a khuhcip sukloh ding thupi hi.
Judas mahmah zong ZEISU’ sap-pa, ZEISU nungzuipa, ZEISU lawmpa cih tangthu a nei kim lai ZEISU leh hek pa cih tawh a tangthu zak nop lo takin tawp hi.
Kammal dangin genpak leng minthan nading kum tampi hanciamding kisam a, minute khat sung in khantawn khom ding minsiatna piang theilua hi.
Tua manin keimah in Alpha leh Omega a ci Pasian mah pen i kipatna leh i tawpna hong hih ding kisam pen ahihi. Khua ul tampi luang a na hanciamnate dahna khitui hong suah loh nading in na muan pen na kingakna in ZEISU mah hi tawntung ta hen.
Tam veipi na tuidip sapen buak khat tawh bei sak ken!
Nitha pai nazon sum pen zu haikhat sung ah bei sak ken!
Kum tampi na thalawh inn leh lo te zan khat phe kapna tawh bei sak ken!
Khua ul tampi luanga na ngah hauhnate khat peuh khitui luanna hi sak ken!
Hun tampi bei a na ngah minthan nate, gamtat khialhna khat tawh min siat sawm ken!
"Na khua ul luang tampite
man nei sak in"
Laibu Saal / Zomi eLibrary
