Vantungmi Nih Khualzinna Thu
Agelh ~ En Khat Thang
Khat vei lai-in, vantungmi nih mihing bangin hong kibawlin khual hong zin uh hi. Hong paipai uh leh khua hong zingin, mui hong kaii ta ahih manin, zin tunna ding zongin Inn kong khat hong kiu uh hi. Inntekte mihau na hi uh ahih manin, zin tungte neu muhin limtak hopih lo uh hi. A maule amau an bawl tawm sak, kuang sawp sakin nasem sak uh hi. A lupna dinguh zong Inn lei nuai khan sungah buhtu lom tungah lum sak maimai uh hi.
Nitak zankim khit pawlin, Vantungmi a zalian zawnu in, Inntekte lei nuai khan deina taih kiciang kitamin a vang khat mu ahih manin, a vang liatna zangin bittakin bawl sakkik hi. Vantungmi neu zawnu in zong lamdang sa in, "hi bang a lungsim hoih lote bang ding a huh laizang na hiam" ci-in lungkim lo pianin gen hi. Vantungmi lian zawnu in ahih leh, "Khat veivei thu piangte pen i mit tawh i muh sangin a lamdang zaw, a thuthuk zaw tampi om hi" cih san hi.
Zing khua hong vakin vantungmi nihte in khualzin hong zom uh hi. Khua hong zingin mui hong kaii zel ahih manin, a tuah masak pen uh inn khat ah lutin zin hong tung uh hi. Inn tekte ahih leh lokho nupa kop khat hi uh a, neih le lam hau pawl hi lo uh hi. A hizongin, a lupna uh zinte awn in, a nek dinguh a lim penpen ding bawl sakin, a siam tawp un zin do uh hi.
Zing khua hong vakin hong thawh uh leh, inntek lokho nupate a nihun na kap kauhkauh mawk uh hi. Vantungmi neu zawnu in "bang ci a kap na hi uh hiam?" ci-in a dot leh "ka bawngpi nawi nek theih neih sunsun uh tuzanin si mawk hi" ci-in kihehnem zo lo-in om uh hi. Vantungmi neu nu zong lungkim zo lo-in, a Sianu kiangah "inntekte lungsim hoih uh a, limtakin zin hong do uh hi lo hiam? bang ding a hi bang tuahsiatna tuak mawk uh hiam?" ci-in dong hi.
Vantungmi lianzaw nu in zong, "tu zanin sihna Pupi hih inn sungah hong tun ni tawh kituakin, Inntek nu sih ni ding ahi hi. Ahi zongin Sihna Pu aw, Inntekte lungsim hoih mahmah uh hi", ka cih ciangin sihna Pu in zong a bawngpi uh nuntakna a lak sak ahi hi. "Inntek nu' nuntakna tun zanin a honkhia hizaw hi hang. I zin tun masakna mihau inntekte ahih leh, a Pu le Pate un a mau a ding a sel sakuh khamle ngun, suang manpha tampitak inn lei nuai khanah om hi, Inn deina kawm kitam bawl sak lo hi leng, Inntekte in a bawl uh kul dinga, tua bawl le uh hih a manpha kisel cipte mu ding uh hi. Tua manin, inn deina taih kitam pen a bit ding ka bawl sak hi" ci-in gen hi.
Ei leitung mihingte zong i nuntakna ah i thuakkhak thu tampitakte, i mit muhna sang a lamdang zaw, a thuthuak zaw i telzawh loh tampitak om tawntung thei zel hi. Khaileh! "A piang nakhempeuh Pasian hehpihna hizaw gige mawk hi lo hiam?"
Laibu Saal / Zomi eLibrary
