Khuak Sawpna Kammal Pawl Khat
Agelh ~ En Khat Thang
Nang le nang mi dang kuamah tawh kiteh kak kha het kei in. Tua bangin na kiteh kak leh nang le nang a kisimmawh na hi lel ding hi. Tawhtang om lo tawhbu kibawl ngei lo hi. Tua mah bangin Pasian in zong a kihong zo lo ding kong khak hong bawl sak lo hi. A kiphu zo lo ding haksatna hong guan lo hi.
Gual zawhna a ngah kha ngei mite in gentheih haksatna tangthu khat ciat nei hamtang uh hi. Tua mah bangin gentheih haksatna tuamtaumte a bei khitteh gualzawhna tawh tangthu kikhup pelmawh hi. Na lungzin hun laitakin leitung in nang hong nuih san hi. Na lungdam hunin zong nuih mai sa in hong en gige hi. Mi dangte lungdamna ding nasep sak ciangin ahih leh leitung in nang pen zahtakna hong pia hi.
A ol lua keii thu khat pen mi dangte mawhna ding zon sak ahi hi. A haksa mahmah khat ahih leh ei le ei i mawhna a maan taktak a i kimuh ding haksa kisa hi. Hun beisa a, khialhnate kuamah in va kilehkikin a hoih ding va bawlpha thei lo hi. A hizongin thumaan thu hoih hong pianna ding tu mahmahin, mimal kim in kipanin i sem thei ciat hi. Na dongtuahna thu khat peuh a kibawl thei ding thu ahih nak leh lung himawh tengtung kul se pah lo hi. A kibawl thei nawn lo ding thu ahih zenzen leh zong na lung hihmawh hang bang pha tuam ding aa?
Na tuahphatna ding vai limci khat peuh na khah suah khak zenzen leh dahin kap kha se kei in aw, na khitui in a dang tuahphat theihna ding vai limcite liah kha ding hi. Na mai puak kikhelna (changing the face) in kikhelna bang mah piang sak zo lo ding hi. Ahih hangin, kikhelna mai nawtin phu leteh (facing the change) tua in na khempeuh hong kikhel sak hanhan ding hi.
Mi dangte thu awlmawh lua in phunphun se kei in, na lung nop hithiat ding na ut leh nang mahmah kipuahpha ziau lel in. Khialhna i bawl khakte in hong lunggim sakin, i lungsim hong na sak hi. Hun hong paipai in, a sawtsawt teh tua khialhna i bawlkhakte hong kigawmgawm ding a, gual zawhna ah hong paipih lamlakte hong suak ding hi. Tuahsiat hun ciangin hangsan ding kisam a, tuah phat hun ciangin dai hithiata om siam ding kisam hi.
Kham (gold) pen kizepna ding van hoih hong suah theihna dingin mei sa mahmah piak kul hi. Nakpitak a kikaikai sumngote ahih leh mei khau hong piang hi. Tuzum, sekzum, sekkhuzum tawh a kisui sui suangtumte ahih leh lim hoih nono hong piang hi. Nuntakna i cih zong tua bangmah hi a, gentheih haksatna thuak khak, phut khak tam semsem leh nuntakna man nei semsem cihna hi lel hi.
Source:
Hih Thute Manpha Sa Lua Ni Teh (Laibu)
Laibu Saal / Zomi eLibrary
