HUHPA HONG PAI KHIN TA
(The Comforter has come. TD LA 174)
Agelh~ J. M. Ngul Khan Pau
June 17-20, 2011 in Chicago Zomi Christian Church-te'n amau kiangah hunzang dingin hong sam uh hi. Kozong Colorado Springs ah om lai kahih manun Dimnu leh Toshi Mang nusia in keikia kapai hi. Pawlpi bup tawh hunzatna ka neih ma-un Khangnote tawh nitak hun ka zangkhawm uh hi. Nitak masa June 17 ni-in khangno 25 khawng tawh Pa Piang Mungte innah kihawmin lasakna thalawptakin kanei uh hi. Tua nitak in David in Goliath a zawhna thusim khangnote'n zong i nisim Goliath-te zo thei i hihna ka gen hi. Ka thugen ma-in thugenpa sapna leh phatna in ci-in "Huhpa hong pai khin ta" cih i din lamin sa ni, ci-in dingto-in kasa uh hi. Tua la dawng lina (fourth stanza) ka tun uh ciangin ka lungsim hong kilawk a, la kasa thei nawn kei hi. Tua la thu:
Gen zawhloh itna siang, ka lei in bang ci-in
Gen zawhloh hehpihna, mi vakvai tung gen ding
Amah leh A meel tang, sungah ka om theih nang
Huhpa hong pai khin ta.
Huhpa hong pai khin ta, Huhpa hong pai khin ta,
Vantung Kha Siangtho pen, Pa'n piak ding hong ciam pen
Lungdam Thu zelsak un, mi omna ci tengah
Huhpa hong pai khin ta.
"Amah leh a meel taang, sungah ka om theih nang" cih pen eikam tawh a khum dingzah in khum zolo hi. Mikang la ah "That I, a child of hell, should in His image shine!" Lettawm ding hi leng "Kei hell khuk ta in ama meel suun a tang ding," cih ka ngaihsut ciangin thupi kasa hi. Pasian meel suun a taang ding ka kicih ciangin ka pumpi hong zeelin ka khuasik mul hong tho hi. Tua ciangin ka khe panin electric in hong mat bangin hong kipan a, ka khuk, ka pumpi hong zeelsuak hi.
Topa' nang kei lungsim sungah nong taan kei leh nangma meel kong suun thei kei ding hi, cih tawh amau lasak sung thungetna leh lungdamna, khasiatna tawh ka zo hi. Topa in hong lawng ahih manin ka pumpi buppi ka tha hong zang mahmah hi. Tua bek hi loin tua zan ka giahna ah zanpuan zong silh thei loin ka ci lum in khuahun hong nuam lua hi. Ka lup ciangin tua inndei sungah kei bek om loin Topa'n hong giahpih cih ka tel mahmah hi. Ka ihmut ciang zong "nuih meel" tawh ihmu dingin ka ki-um hi. Ka lungdam ka lungkim lua mahmah ahih manin Peter in "Mel kilamdanna Mual" ah "Topa, nang a ding, Moses le Elijah ading buk khat ciat" tenna bawl ding a cih bangin tua zan ka ngaihsut kik ciangin ken zong "Topa tawh omna" sanga nuamzaw mun leh mual omlo cih ka thei hi.
St. Augustine in, "Kote nang a dingin nong bawl ka hi uh a, nang kiangah kong tawlngak madong uh ka lungsim uh tawlnga thei lo hi," a cih ka phawk hi. Topa' ah tawlngak nuam lua, tawldam taktak mawk mah ei cih ka tel sitset hi. Muslim biakna panin Khristian hong suak khat kiangah, "Lai Siangtho sungah bang kammal khum nasa penpen hiam?" ci-in a kidot ciang, ama'n, "Tawldamna," ci-in dawng hi. Amau biakna ah sep ding bawl ding tawh thalawh ding vive hi a, Jesu in, "Vangik pua a a gim mite aw, kei kiangah hong pai un, lungsim tawldamna kong pia ding hi, a cih mahmah thupi kasa hi," na ci hi. Huhpa Kha Siangtho in nang hong lawng hen, bang hang hiam cih leh amah "hong pai khin zo hi."
Verse1
Lungdam thu zeel sak un mi omna citengah
Mihing lungsim omna mihing gal tamna-ah
Tapidaw leii khempeuh Lungdam thugen sak un
Huhpa hong pai khin ta!
Chorus
Huhpa hong pai khin ta! Huhpa hong pai khin ta
Vantung Kha Siangtho pen Pa'n piak ding hong ciam pen
Lungdam thu zeel sak un mi omna citengah
Huhpa hong pai khin ta!
Verse2
Zan hun saupi beita zingkhua hong vaak zo ta
Lungsim vangikpi teng hehna hu ging veng ta
Ni taang khammual panin hong suah khiat tak ciangin
Huhpa hong pai khin ta!
Verse3
A kha sung zatui tawh kumpite' To hatpa'n
Thongkia kha khempeuh tung hong puak hotkhiat kicing
Thong pi hawm sung tengah zawhna lapi hong ging
Huhpa hong pai khin ta!
Verse4
Gen zawh lo itna siang! ka leii in bang ci-in
Gen zawh loh hehpihna mi vak vai tung gen ding
Amah leh A meel taang sungah ka om theih na'ng
Huhpa hong pai khin ta!
Laibu Saal / Zomi eLibrary
