Hong Pai In, Thupha Namkim Nak (Come, Thou Fount of Every Blessing)
(I Samuel 7:12)
Agelh~Zam Khat Kham
Robert Robinson (1735-1790)
John Wyeth (1770-1858)
Hih la aphuakpa Robert Robinson pen England gam Swaffham, Norfolk ah September 27, 1735 ni-in suaka a nu a pate minuamsa lua hilo hi. Kum 8 aphak ciangin a pa in sihsan a, kum 14 aphak ciangin a nu in sammet sin dingin London paisak hi. Tua lai ah tawlkhat sung khangno ginalo pawlkhat tawh kikhawl-in zukham ankham numei lama phengtat mikhat suak hi. Kum 17 aphak ciangin George Whitefield’ thuhilhna cialpi khat-ah alawmte tawh va kikhawm uh hi. Tua “Methodist thuhilhsiapa zahpih” nuama pai uh hi lelzaw hi.
Ahi zongin George Whitefield’ gen lungdamna thu in a lungsim vutlua-a piangthak hi. Kum 7 khit ciangin Ama’ nasem dingin Pasian’ sapna ngah-a, Methodist pawlpi ah nasep kipan hi. Tua khit ciangin Cambridge ah kituah a, Methodist pawlpi nusia in Baptist pastor suak leuleu hi. Tua lai ah Laisiangtho thuthuk thei theologian khat suaka, hymn zong tampi mah phuak hi.
Hih la aphuah laitakin a kum 23 phapan hi. Taang nihna ah, “Nong huhna tawh hih ciang kong tung, Huhna mualsuang hiah phut ing” a cih kammalte I Samuel 7:12 kila hi a, tua lai-a Ebenezer pen Pasian’ muanhuaina/thumanna lim ahi hi. A taang thumna a, “Topa kong vaksan dek zeel hi, Ka it Pasian hong kem in” a cih kammalte in laphuakpa Robinson’ nuntakzia ding genkhol hi leh kilawm zawzen hi. Hih la a phuahzawh kum bangzah hiamkhat ciangin mawhna sungah pukkik zelmawk-a, kiplo kho lo-in om hi. Tua banah Unitarianism a kici Pasian pen mimal thum Pasian khat hi cih Trinity upna a nial upna lam peuh ah hong hoi thawthop hi. (Unitarianism in Trinity nial-a, Zeisu Khazih Pasian hi lo hi, ci-in Khasiangtho zong Pasian-in sang lo hi. Mihingte’ pukna, mawhna tanga Zeisu’ sihna, tawntung gawtnate um lo uh hi. ZKK)
Robinson tawh kisai a kigen thupiang khat om ngei hi. Khatvei, Robinson sakol-leeng tuang hi. Labu (hymn book) khat lunglut lua mahmah-a sim nupi khat tawh tuangkhawm hi. A leeng tuan kawm un tua nu Robinson’ lamah kiheii-a, “Tu-a ka saksak hih la ngaih na sa hia? Na bangci muh a?” ci’n dong hi. Robinson zong khitui naptui tawh kidim-in, “Madam aw, kei pen kum tampi lai-a hih la a phuakpa hi’ng, tua hun lai-a ka lungnopnate a ngah kik thei ding hi le’ng leitung tul khat dim kham le ngun tawh khek ngam ingh” ci-in kapkhia hi, kici hi.
A la-aw min pen “Nettleton” kici sezen a, 18th century bul lam-a Pasian’ mizat minthang mahmah American evangelist Rev. Asahel Nettleton’ min tam-a kiphuak ahi hi. A phuakpa bel John Wyeth hi a, America gam Cambridge, Massachusetts ah March 31, 1770 ni-a suak ahi hi. Laikhet lam nasem printer hi a, pawlpi mi mawkmawk music siam khat ahi hi. 1813 kuma a khet Wyeth’s Repository of Sacred Songs kici labu sungah hih la hel-a, a kikhet masaknapen hi pah hi.
Verse1
Hong pai in thupha namkim Nak
Ka lungsim hong puahsakin
Kang ngeilo Nong hehpihna Nak
Nakpi'n hong phat thei sak in
Vantung mite phatna la ngaih
Kei zong hong sa thei nuam ing
Nong itna tung kip ka lungngaih
Tua itna mual ka phat ding
Verse2
Nong huhna tawh hih ciang kong tung
Huhna mualsuang hiah phut ing
Nong deihsakna hangin tunung
Lungmuangin inn hong tung ning
Lam khial a Pasian ka nusia
Ahih hang Zeisu'n hong zong
A si manpha tawh hong tankhia
Gimna lauhuai pan hong hon
Verse3
A ni simin hong hehpihna
A tampi hong ba sak den
Na hehpihna'n hong khih in la
Na kiang pan hong pial sak ken
Topa kong aksan dek zeel hi
Ka it Pasian hong kem in
Hiah! ka lungsim Nang sung seel in
Nang ading na ciamteh in
Source:
Christian Hymn-te’ Tangthu (Laibu)
Agelh leh laibu bawl: Zam Khat Kham
Laibu Saal / Zomi eLibrary
