Na Kiphatsakna Suahkhia In
Agelh ~ En Khat Thang
Hun khat lai-in, pilna degree sangpi a nei khangno khat in company lian sim khatah nasep hong ngah hi. Ni khat, a tawlngak hun sung company huangpi sunga om bual gei ah pai-in ngasa va siah hi. A kim apaam veiletak ah zong company nasem pilna sang lua a neilo nih in zong ngasa thaang na siah uh hi. A lungsim sungah hite khawng maimai tawh kei pilna sangpi nei khat ka kikup ding thu um hetlo ding hi cih ngaihsun kawmin, a ma tumtakin ngasa thaang hong siah hi.
A taklam gal a khat pa zong a kawng kham hi ding, a ngakawi khiasukin bual tui tungah lamsiau in a gal khat hong kan mawk hi. Nasep lut thakpa in lamdangsa napi hih pilna neilo te thu dong kei ning ci-in om hi. A sawt lo-in, a veilam gala pa zong a taklama pa bangmahin tuitungah lamsiau in a gal khat hong kan leuleu hi. Kei PhD ngah hi buang veng hite peuhmah thu dong lawmlawm kei ning ci-in om teitei hi.
Hun sawt sim khitteh, pilna nei kisapa a zun suak lua kei ahih manin, a lawmte paina lama om zunbuk a delh ding pen bual kimkotin pai leh minutes 10 val ding ahih manin bual kan nopna lungsim hong nei ta hi. Hih pilna niamte nangawn tui tungah lampai thei hiven kei zong pai thei buang ning ci-in, a ngathaang siahna khiasukin, tui tung pai dingin a mai tui sungah a khe hong ngak suk leh tuikia in hong cimawh pah hi. A gei a om naseppihte in delhin va honkhia pah uh a, "bang dia tui sungah tuak mawk na hiam"? ci-in donguh hi.
Mi kipil sakpa in zong "No gel lah tui tungah pai thei mawkuh cin a, kei zong pai thei ding kisa kha a tuitung ka sik leh a kia hing" ci hi. A nasep pih gel zong nui kawmin "Bual kanna ding lei khat a kidawh hiven, tunung ni nih sung guah tamlua in ah tui in tua lei a tumto hi. Ko lei omna mun thei ka hih man vua a pai thei hing ung, Bang ci mawka hong dong lo na hia?" cih san uh hi.
Eite zong, i nasepna kimlepam ah i tel loh, i theih loh a omte eima-a, a tungsa, a na theisate i dot ding, kiniam khiata, i kansiam ding kisam mahmah hi. Kiphatsakna pen a kisapna mun lopi ah i neih khak ding lau huai mahmah hi. I theih loh, i tel loh khat thei kei sing?, tel kei sing? hong hilh dih ve lawm? I cih pen a zum huai thu hihet lo hi. A thei lopi, a tel lopi, a thei kek khat bangin i sep khak, i om khak ahih leh siatna, supna piang sak banah a zumhuai taktak hizaw hi.
Mihingte a theisa, a pilsa-a suak kua mah ki omlo hi. Bangmah thei lo a i suah pen ei mawhna hi lo-in, bangmah thei lo a i sih leh bel ei mawhna hi ding hi. I kiphatsaknate suah khiat a kul hun om a, i theih loh thute dot huaite dot hamthang ding a kul hun om hi. Ei mun tekah khatle khat kizahtak bawla thu kikup tangtang, thu kidot bawl tangtang pen mi picingte gamtat dan ahi hi.
Source:
Hih Thute Manpha Sa Lua Ni Teh (Laibu)
Laibu Saal / Zomi eLibrary
