ZIPPORAH
A Pasal nasepna a panpih Numei
Pai 2:21-22;4:25;18:1-6
Agelh ~ Rev. Dr. John Thang Hum & Dim Lun Zam
Zipporah pen Midian minam hi a, amin khiatna pen, “vasa no”, “kawlgiit” cih bang dan khiatna nei hi. A pa Jethro hi a, Midian gamah siampi khat ahi hi. Jethro’ tanu sagih te lak ah a-uu pen ahi hi.
Moses in amite a hotkhiatna-in Izipt mikhat thatlum a, tua pan lauin a taina ah Midian (tulai tak Iran gam) tung hi. Jethro tanute in gamlak ah a ganhingte uh tui pia in a om va tuakkha a, aman zong va huh hi. Moses gamtatna teng apa tungah agen ciangin diksa uh a, a-inn ah omsak pah hi. Tuapan in atanu uu-pen tawh kiteng sak hi. Hih minamte ngeina ah atanu uu-pen pasal nei masa lo in anuai aten nei theilo hi. Moses tangthu limtangthei (movie) kibawlte khatah, a-sunghpa in a- muakna leh a mopawi bawlnate thupi bawl mahmah hi. Hi zong ahithei ding thu ahi hi. Moses pen hihhun in Izipt daan in kizem ahih manin Izipt mi sapah uh hi. Moses a-sunghpa’ ganhingte kep sak in Sinai kuam teng kum 40 sung om hi. Moses leh Zipporah in tapa nih Gershom leh Eliezer nei uh hi. Gershom pen “Theih ngeilohna gamah pemta” cihna hi a, Eliezer pen “Ka pa’ pasian in kei hong huh” cihna hi.
Zipporah in Moses Pasian in asapna tel pih
Pasian in Moses Izipt gam pai kik in a mite a hot khiat ding a gen ciangin a vai khempeuh a zi leh a sunghpa kuppih hi. A sunghpa in phalna pia in thupha tawh sawl khia hi. Moses in azi-ata teng zong tonpih hi. Lam kal ah a-sanggampa Aaron in na dawn hi. Izipt gamah azi, atate bangtanvei ompih cih ki genlo hi. A maban sahlua cih thei ahih ciangin Arron in Moses kiangah azi atate gentheih ding thei ahih manin, a-sunghpa kiangah a khakkik phot ding gen hi. Moses in zong mang pah in, a-sunghpa kiangah aap in vaikhak hi. Hih hun sung teng a- sunghpa in azi atate na kepsak hi.
Moses sih na ding tan khia:
A pa kiang zuan ding apaina giahphual khat ah, Pasian in Moses nuntakna lak sawm hi. Hih thu azi in thakhatthu in telpah a, suang-temta khat la-in a tapa nihna vun at sakin, a vundawn Moses kiangah paipih hi. Tua ciangin Topa hehna bei hi.
Pasian in a mite ciapteh na ding apiak vunat na Moses in a tapa-uu pen bek tungah zangh a, a tapa neuzaw zangh sak lo hi. Lai Siangtho kantel pawlkhatte upna ah, Zipporah in Moses leh Pasian kizopna ahi vunat na, a siangtho ciaptehna pen theihpih khalo a, a tapa masa a-at lai in zong deihlo hi, ci uh hi. A phalloh nading thu ah, vunat ciangin ci-leh-sa ah na lua ahih manin naungek in a thuak zawh loh pen hehpih huai sa hi thei ding hi. Hi hun ciangdong Moses biak Pasian telpih nailo hiam, atapa nihna min a phuah ciangin ama’ pa pahtawina tawh phuak a, “Eliezer”, “Ka pa’ biak pasian in hong huh” cih ki tamsak hi. Bangbang hileh Zipporah in atapa vunat lohna hangin Pasian hehna thei in, thakhat thu in vunat sak a, Moses tungah tung ding Pasian hehna lakkhiatsak hi. Pawlkhat te ngaihsutna ah, vunatna hangin a pasal tawh kam kinial a, tua panin innlam ki ciah sak kik hi. Moses in Cannan gam aciah ciangin azi leh atate zong samkik hi, aci zong om hi. Moses tawh a kitot man in ciahsak cih pen tangthu paizia khempeuh tawh ih etkak ciang manlo dingin ki ngaihsun thei hi.
Zipporah min a nungsangah ki genkik nawnlo hi. Miriam leh Aaron in ahuat bawl uh Moses’ zi pen hih Zipporah mah hi ding hiam? Ahih keileh a-zi masa si-a, midang zi neikik hi ding hiam? cih zong ngaihsutna om hi. Bangbang hi leh min kigen kik a thupi hilo in, a pasal deihna man thei in, atate keem in, thuman thutak azong mikhat ahihna ki thei hi.
Thukhupna
Zipporah pen Pasian teel, makai kigente lakah makai lian pen Moses, mi nunneem leh lungduai khat-ii zi in omkha a, ki phatsakpih taak mahmah ahi hi. A pasal Pasian in asapna telpih hi. Atate hoihtak kem in khansuah hi. Adeihloh pen thu a kigen ciangin zong amang thei dingin om hi.
Dotna:
Zipporah tangthu na theihzah atomkim in gen in.
Atapa nihna min banghang a pa tam sak hiam?
A pasal Moses tawh a kizop zia gen in
Zipporah lungsimding na ngaihsut sak theih te gen in.
Banghangin mi lungsim hoih, numeipil leh gina khat in ki ngaihsun thei hiam?
