ZOGAM PAN TUUNNU’ LUANKHI
A gelh ~ Go Mung (Laaitui)
Sianpu leh Dimlek pen a neutuung akipan mihoih leh mi-thumang te hi uh aa, a nu uh Nu Mawi’ pattahna nuai ah khangkhia uh hi. Nu Mawi pen meigong daipaam, venglepaam’ simmawh khat ahih zahkhat in kuamah abelh asuan ding omlo aa, a tate bekmah muan leh lam-et in nei hi. Nu Mawi te mizawng ahih manun mi’sum leitawi in Sianpu te unau sang kahsak hi. Sianpu te’ pa in aneulai un sihsan baih ahih manin Nu Mawi in nudinmun padinmun la in, annek tuidawn, silhleten ding vaan in hanciam takin nasem den hi. Sianpu leh Dimlek ten a sangkahna uh panin hoihtak lai hanciam uh aa, milak ah laihatpawl in hong om hi. Hibang in Sianpu te unau in laithei in a lawm a gual te lakah a madawk lam uh, Nu Mawi in amuh ciangin amau adinga agim atawl nate phawk nawnlo in, angtang mahmah hi.
Hunleni te hong pai toto in, tuuk-hun phalbi leh khuakhal hun te hong ki heitozel aa, Sianpu leh Dimlek tezong bangkal hetlo in, tan 10 hong tung ta uh hi. Nu Mawi in ata tegel ading zingsangsim, nitak simin thu ngetsak den in, an tangin thu a nget hun zong tam mahmah hi. Nikhat ni ciangin Sianpu te unau tan 10 hong ong aa, nutha-theek, patha-theek ahih ding uh thu ngetsak den hi.
Nu Mawi te pen mite banga khawhsa kham leh minuamsa hilo uh ahih manin khatvei leh nekding omlo, khatvei leh Sianpu te’ sangsum ding omlo zel hi. Tua banghun ciangin venglepaam ah tai kawikawi zel in, mi’ maitang en in thapai hi. Hibang hun ciangin mite adingin hih leitung pen khualzinnagam bang hi in, nuam asak uh hangin Nu Mawi in ahihleh kalkhat nangawn asuan ding haksa a sak-hun tam mahmah hi. Himahleh Sianpu te unau adingin khutkha bankha cih nei ngei loin, thalawp takin nasem den hi.
Haksatna tampi kawmkal panin hunleni te bangkal lo in hong beito zel aa, Sianpu te unau tan 10 hong ong takpi ta uh hi. Tan 10 hong on uh ciangun Sianpu in innkuansung haksatna mah lunghimawh in, a tunglam zop ding ngaihsun zolo in Gamdang ah sum zonding hong khensat hi. Gamdang paiding acih hangin zong sum omlo zel ahih manin haksa sazel hi. Ahi zongin Nu Mawi in a tapa Gamdang pai nopna a theih ciangin a sum ding hong lunghimawh aa, sumleitawi va zong hi. Pasian hehpihna tawh mu bilbel aa sauvei lo in Sianpu Gamdang va pai thei hi. Sianpu Gamdang a tunzawh ciangin Nu Mawi in Sianpu in cidam in nasem thei aa, sumnu sumpa lam in, cidam takin nikhat ni teh a nuta un a kimuhkik nang uh thungen den hi. Sianpu inzong Gamdang atun tuung lamin anu phawk mahmah aa kaalkhat in khatvei ta bang phone tawh hopih zel hi.
Dimlek ahih leh numei ahih manin gamla pipi pai aa sumzon ding Nu Mawi in ngaihsun zolo hi. Banghang hiam cihleh Sianpu lah Gamdang ah omkhin, anau Dimlek mundang ah om lailai leh amahguak inn ah om aa, amahguak a nuntak ding pen a mitkha inzong bawl ngamlo hi. Mite in hauhna sumlepaai te thupisa in ommah taleh Nu Mawi adingin bel ki it diamdiam aa innkuankim aa nuntak ding simlo thupi asakzawk khatzong omlo hi. Himahleh hunsaupi a ngaihsut ciangin a tanu Dimlek ading lunghimawh mahmah zel hi. Inn ah a nuta un omkhawm mahleh nikhat ni ciangin alawm agual pha lo a, nuntakna a neih lohding phal hetlo zel hi. Tua manin Dimlek inzong masuankhat a neihding deihsak mahmah hi. Masuan khatpeuh zong ding ci mahleh mi banga ankhing kham, vulhlekhawi daupai lah hilo, zawn kinelhsiah acih bangin a tat dingdan thei tuan lo hi. Gamdang pan Sianpu in a thalawh sunsun a khak te bekmah nuntaknapi in nei uh a, Dimlek masuan ading inzong tawmtawm khol thiamthiam hi. Tua bang kawmkal pan Pasian in thupha pia aa, upmawh hetloh in Dimlek in khuapi sung khat ah nasep khat hong ngah hi.
Dimlek in masuan nei tading, khuapi sungah om ta ding cihthu Nu Mawi in a ngaihsut ciangin lungdam mahmah aa, ahizongin lamkhat ah dah mahmah zel hi. Banghang hiam cihleh Sianpu lah Gamdang ah omkhin ta, Dimlek khuapi sungah omlailai leh amah guak om dinga, a nat a sat ciangin kua in khoi ding, a lunglen ciangin kua in hehnem ding cih te a sunmang in a bawlbawl ciangin haksa sa mahmah hi. A ngaihsutna bek ahih hangin khatveivei bang a khitui luang thei zel hi. Tuabang a ngaih sutsut kawmkal ah Dimlek a nasep nading ah kisam ta ahih manin va pai takpi ta hi.
Kum kivei in, hun hong kikhel zel a, a hun zui a paak, paakte zong hong pak zelin, kumkhua hong sawt hiaihiai aa, Nu Mawi zong a kum hong tam semsem ta hi. A tha te hong kiam in, a luzang ah samkang te hong kituahding peuh hong hi ta aa, lokuan singpuak genloh innlak vakding nangawn haksa hong sa ta hi. A tate tawh a omkhop loh uh hong sawt simsim ta ahih manin Nu Mawi a lung leng mahmah a, a tate a phawkluat manin kapthei zel hi.
Sianpu ahih leh Pasian in thupha pia in a nasepna ah lawhcing mahmah aa, a nasep hun zong tamsim ahih manin abeisa banglo in a nu a hopih hun ding zong omthei nawnlo hi. Dimlek zong khuapi sungah om ahih mah bangin nasep hau mahmah in manlahden ahih manin a nu a hopih hun ding omsak theilo hi. Dimlek te unau in a nu uh a hopih ngeiloh hangun a nu uh Nu Mawi in phawk mahmah aa, a omom na uh ah gual tawh tanbang kim aa, nuam asak nading uh tatsat loin thu ngetsak den hi. Amah lah teek tektek in, a tate a itna leh a phawkna lah khang tektek hi. Innlak a vak ciangin ama khangual a lawmte a tate tawh ankuang uumkhawm aa om leh kiholim liailiai aa om te a muh ciangin Nu Mawi in a ta neihsun Sianpu leh Dimlek phawk mahmah in amau tawh omkhawm nuam in, a aw uh za nuam mahmah hi.
Nikhat, Nu Mawi in Sianpu leh Dimlek phawklua in a aw mahmah uh za nuam ahih manin phone sai ah va pai hi. A tate a hopihnop hangin lai theilo ahih manin a beisa aa Sianpu in gamdang a tuntuung lai aa a hopihna phone nambat te ciamteh theilo hi. Ahih hangin phone sai te in thei lel in teh ci in ummawh hi.
Phone sai hong tun ciangin “Malisia aa ka tapa Sianpu hopih nuam hi veng; hong meeksak ve vua” acihleh phone sai ten na theikha bilbel uh aa, a meek uh leh ngah pah hi. Sianpu in “Kua a hia hong ho nuam?” acihleh phone sai ten “Piteek khat hi veh aw” ci uh hi. Tua ciangin Sianpu in “aw.... tua ahih leh kei manmawh laitak ing in hun ngah kei na cihsak un” cihsan ziau hi. Tua ciangin phone sai ten Nu Mawi kiangah “Manlah ing ci ei. Ciah ziau ou ... na gen ding zong a thupi om keek ken teh. Na nam siatsiat tawh” ci in na tawng uh hi. Tua ciangin Nu Mawi in “Sianpu a ngah keileh Dimlek hopih nuam veng aw, hong hopih sak ve vua” a cihleh phone sai te in “A phone nambat ee” na ci pah uh a, Nu Mawi in “Ken lai theilo aa, Dimlek nambat zong ciamteh thei keng e, No na nei kha uh hia” acih leh phone sai ten nehpiik sa in “Zen mahmah, nang tanu peuh mikhempeuh in hong theihpih ding sa na hia? Amah bang ahia? Ulian lua maw? Tanu te phone nambat nangawn ciamteh theilo, bang ci Nu zawzen na hia, pai o; ciah o; a nambat na neih teh hong paikik o, uih lel teh” ci in hapkhat na suah lai uh hi.
Nu Mawi in bel Sianpu leh Dimlek hangin simmawh leh kosiat pen ana thuakthuaksa ahi hi. Sianpu leh Dimlek sangkah nading a leitawi lai inzong hi sanga khauhpaizaw zahkona leh simmawhna te a zaksa, a theihsa ahih manin a hiding mah in sanglel hi. Tua banah Nu Mawi pen a kem a khoi ding te mundang ah om ahih manun amah apuah ding, a puan a sawpsak ding, a sam a hiatsak ding kuamah omlo ahih manin niin mahmah ahih manin phone sai ten namsia leh uih a sak uh pen ahi ding mahzong ahi hi.
Phone sai ten bangzah in lipkhap in, a tot hangun Nu Mawi in Dimlek aw za nuam ngeungau ahih manin khatvei thasan kik in awnem tak tawh “hehpihna tawh ka tanu Dimlek ka hotheih nading hong vaihawm sak gawp ve vua” a va ci leuleu hi. Phone sai te zong heh lua ta uh ahih manun “Zawzen mahmah ... Dimlek cih ziau. Minpi nei lo maw, a minpi gen ve. Nang bek Dimlek tanu nei kisa maw” ci in sal gega uh hi.
Nu Mawi in a tanu Dimlek pen a minpi in a sapding haksa sa mahmah hi. A neutuung a kipan huihmut ding nangawn phallo in a kep hi a, it mahmah ahih manin cikmah hun in a minpi inzong sam ngam ngeilo hi. Leitungah Dimlek minnei tampi ommah ta leh ama adingin a tanu Dimlek simlo mindang om theilo hi. Nu Mawi in Sianpu te unau a itna hangin a neulai un aminpi nangawn un zong sam ngam ngeilo in, ‘bawi te’ ci in samden hi.
Phone sai ten lah manlang taka Dimlek minpi a gen nadingin tawng laklak uh hi. Tua ciangin Nu Mawi in Dimlek minpi gen dingin kithawi hi. Genkhiat sawm ta leh a gong ah a khak khat om bangin genkhia thei mahmah lo hi. A genkhiat sawm teitei ciangin khaamkhaam ta leh kikhaam thei loin a mit sungpan a khitui mal te a biang tungah hong tolhsuk detdet mawk hi. Nu Mawi pen a tate hangin a khitui a luan hun tawm nawnlo hi. Ama khitui luanna hangin mite in Dimlek te unau a neumuh khakding uh utlo ahih manin ki iiptheih tawpin ki-iip gemgam hi. A ta neihsun Sianpu leh Dimlek te’n a nu uh phawk nawnlo in, anu ading hun a neihloh uh hangin a tate’ aw a zakloh pen a kum aa sim hita ahih manin Nu Mawi inbel a tate’ aw zanuam teta mai hi.
A tate tawh kiho lo aa a ciahkik ding pen hithei salo ahih manin khitui mualtuang sa, aw ling kawmsa in “hehpihna tawh ka tate ka hotheih nading hong vaihawm sak ve vua maw? Ken ka tate aw za nuam lua hi veng. Bangmah ka gen theilo ahizong ka tate aw za bek lengzong ka sih nuam ding hi. Ken bangmah theilo hi veng; hong vaihawm sak ve vua” va cikik ngeungau hi. Tua ciangin Phone sai ten Nu Mawi pen hai sa lua uh ahih manin phone pen a tua ci pi in Nu Mawi khut ah guang in, “ki ho vuau leh” ci in ciamnuihna in phone khat pia uh hi. Nu Mawi inzong bangmah theilo, phone zong azang ngeilo khat ahih manin a hiding mah sa in“ha lawng ... Dimlek maw? ... Dimlek .. Dimlek maw? Halawng .... Dimlek, ka aw na za hia? Dimlek......” ci in Dimlek samsam hi. Phone sai ten ciamnuih bawlgawp in nuihsan ngeingai uh hi. Nu Mawi in Dimlek a sapsap hangin a phone a ki-meek hilo ahih manin kiza theilo hi. Phone sai te in “Mihai nu ... ciah mengmeng zaw ou... hong zumsak zawsop teh. Ka nuihna un si zo phial nung” ci in thakhat thu in Nu Mawi khut aa phone sutkhia in, kongpi lam ah sawnkhia phei uh hi.
Nu Mawi pen teekkhin ahih manin amah leh amah kikhuangkhoh zo loin kongkaanlai ah hong tuuk suk hi. Tho zo paklo ahih manin kipei luupluup aa Phone sai ten nuihsan ngeingai uh hi. Nu Mawi in a lungsim sungah “Bawi te om hile uhcin hizah in miten hong simmawh lo buang mah dinghi ven, lawmlawm aw, ka tate koi ah om na vua, na sa lua ing, Tate aw hong ngai mah sing maw? Sianpu, Dimlek koi ah om na vua” ci in a khasiat tha hong suak mahmah hi. Ki iipiip taleh ki iipzo nawnlo in,“Bawi te.. ken hong it buang mah hi veng maw...” ci in hong kapkhia kha aa, a khitui te gialtui bangin a biang tungah hong taaksuk detdet hi.
Nu Mawi khitui te a nulsak ding kuamah om lo hi. Gamdang aa om Sianpu leh khuapi sunga om Dimlek inlah a nu khituimal te mu lo uh hi. Amau ngai aa a nu’ kahna aw zong za theilo uh hi. Nu Mawi inbel a kah kawmkawm in “Bawi te cikciang dawn bang ih tuahthei tam maw? Cikciang ka aw na za thei ta um maw; Hong phawk mah sing maw bawi te” ci in a tate sialsial mai hi. Tu in Sianpu leh Dimlek te a ngaihna in Nu Mawi a khitui tampi luang aa, nikhat ni ciangin Sianpu leh Dimlek te in a nu a ngaihna un a khitui uh a luang tam maw? Nu Mawi a hihleh a tate tawh dawn bang tuah a, nunnuam laitual a lenkhop hun ding bek uh ngak in a nungta ahi hi.
