NU LE PA SUUL AZUI TATE
Singkung khat pen i va muh lian loh hangin, a gah i muhna tawh a limci leh limci lo i khentel thei hi. Tua mah bangin nupa sung nuam/lo, cidam/lo cih-te pen nulepate hong kimuh loh hangin, tate tungtawnin a nop ding le noplo ding pen kimu khia thei mawk hi. Naupang khat pen a nuntakzia tawh nu le pate' lem daan ding kimu thei hi.
Ahi zongin mi khempeuh kicingkim lo mawk hi. Ka sangkahpih lawmte nangawn in hong thei nawn keng, ci-in hong melmak hun zong ka tuak ngei hi. Amah zong Pasian nasem, pastor khat hi. Ka kitheihpih luat pastor khat zong innlam ciah ding laikhak puasak ding hong utlua hiaulo mawk hi. Pasian in amaute zong zang mahmah a, Pawlpi picing ciang dong Topa'n thupha pia hi, cih ka mu hi. Eite i tawdawk theizel hi. Thanemna khat ciat a nei i hihlam ka phawk hi.
Khangnote mahmah, ci-in na hawmthawh theih hangin nu le pate hong suun uh na hi gige hi. Thadah theilua, kuangsawp nuam lo. Kizen kei theilua, na cih khak leh nang le nang a kikawk na hi kha ding hi. Kei zong ka pau kankan hangin ka buaipih ding tapa nih na nei ing. Kei' deih bangin hong suun ding hileh zong, ka lungkim mahmah ding hi napi, a suuksia lamin hong suun vanglak leh nak suuksiat mahmah ding hi. Anu hoihlohna zong them khat vomto lai leh, kici thei mahmahlo ding hi. Tua hi-a, tua bang naupangnote a makaih zo dingin i kipat ciang,hong suuksia zaw semsem thei uh ahih manin ei' makaih theih hilo-a, khukdin-in, khutte laptohna tawh Topa' khut sung i ap theih ding kisam hi. Topa' khut sungah ap ni!
Thulu ding ka ngaihsut ciang, nu le pate leh Siate kikal longtang banga kipei velvel tate a cinuam ka hi hi. Ahih hangin sau lua mahmah dinga a cihnopna zong theihhak pian ding ahih manin tua bang ci nawnlo-in tuni-a mah hong guan ka hi hi. Nu le pate in atate uh siate khut sungah pum-ap thei uh hi. Khat veivei ciangin Siate in haksa a sak pian ciang nu le pate tung mah-ah apkik thei uh hi. Nu le pa tawh hun tampi sung omkhawmin, Siate tawh tawmvei sung a omna ah langnih ah haksatna om tuak ahih manin kingawhngawh thapai uh hi. Tua bangin ki-ap kawikawi uh ahih manin tate in a omna ding uh thei nawnlo-in a kallak ah na mangthang thei zawsop uh hi. A nuntakzia uh muh zawh-in om nawnlo-in maimang khinta hi. Tua pen a ngaihsut huai mahmah thu ahi hi.
Khatvei nupa nih ihmu theilo uh ahih manin lupna tungah thu kikum uha, thucin thutang a kikupna lamvua, a tawpna lam ciang a Pawlpi vua pastor-te' hoihlohna, thanemna vive kikumkum uh hi. Tua pen a tate in zalo ding ci-in ngaihsun uh ahih manin kamlim mahmah uh hi. A tate in za gige uh hi. Nipi ni hong tun tak ciang tate in Biakinn sungah Siate' thu mal khat mahmah zong mangnuam lo mawk uh hi. A zak thute uh in amau' ngaihsutna vulhnelh cipta hi. Siate' hoihna malkhat mahmah zong musiam thei nawnlo mawk uh hi. Thu khat cileh, neh piiksan ziau bek mawk uh hi. Anu le pa' gen pen a thupaipi hibek hi-a, tate pen sepna tawh a lakkhiate na hi zawsop uh hi.
Nu le pate in siate bek ngawh theilo ding hi. Tua bangmah-in siate in nulepate' thaneemna kitheih mawh bawl huailo hi. Langnih tuakin i muhsiam ding kisam hi. Tua hi-a hong nusiasa Rev. Khup Za Go' laigelh khat kong hawmsawn nuam hi. Tua laigelhna sungah muhna nih panin en-a:
Mipite in Pastor-te tel theih nading:
Na Pastor pa pen nang mah tawh kibangin lungkia thei hi.
Inn le lo kisam uh hi.
Lawm le gual zong ngai uh hi.
Lai Siangtho sim thadah-in thunget ding zong haksa a sak hun tam veipi om hi.
Thu ngetsak in la thapia in.
Lungzuang khuangai thei uh hi.
Niikten puansilh kisam thei uh hi.
Lungtom in sinso thei hi.
Gualnopna ah a kihelnop hun zong om veve hi.
Midangte a huhnop hun zong om hi.
Mi gensia thei veve hi.
An le tui zong duh hi. (Ei mah tawh a kibang danin ngaihsun ni)
Mipite in Pastor tung pan a lunggulhna:
Upna lam-etna a nei dingin mipi in lam-en hi.
A lungduai zawdeuh, a migi zaw deuh ding.
Natveh a hat ding, inn kim ah a kibanga innvak zo ding.
Mi a hehpih thei ding.
Lai Siangtho a simsim ding le a lungngai zo ding.
Lai Siangtho thu a thei ding, thuhilh a siam ding.
Kikhop pen a lawp ngiat, thunget a hahkat dingin.
Kamtam lua lo, thukhual citak dingin.
Vaihawm siamin sumpi a man, piakkhiatna ah zong a hat mahmah dingin hong lam-en uh hi.
Hih thunih pen hoih taka hong tonkhop theih ciangin a kikal aa naupangte nuamtakin hong khang lian thei pan ding uh hi.
Goldemier in Israel ah Prime Minister a sep laitak, Nixon pen American President ahi hi. Tua laitakin Israel in gal lel dektak ahih manin Goldemier in Nixon tungah zankim zankhang, a hunlopi-in huhna ngen hi. Tua bang huhna a nget ciangin Nixon in a neulai-a anu' thugen khat phawk khavat hi. Tua in bang hiam cih leh, "Ka ta aw, nidang ciang makai khat-in omin Israel mite tawh kisai huhna hong kinget leh thasial kei in. Huh pah in" ci-in anu' phei tung ah a lup kawmsa-in a thugente ciamteh bang, ciamtehlo banga a omlai phawkkik hi. Tua ahih manin zan khat thu-in Israel-te a huh ding ama' thu tawh khensat hi. Tua khaici anu in a neutuung pek panin na muam khinzo hi.
Billy Graham pen leitung ah evangelist minthang mahmah-in mi tamzaw theih khat ahi hi. Ni khat a lawmte tawh ama' inn ah thu lianpi kikum-in a om laitak khualak aa avak a tapa upmawhlohpi-in hong tung vat hi. Amah pen apa' suun zolo citciat-in lawm le gual tawh nuamsa-in cycle hoih mahmah khat tawh khua sung pan zukhamsa-in hong tung hi. Inn ah a lut khiankhian hilo-in apate' kikupna khan sung dong cycle hong tuang phei-in apa' kalkawm teekteek ah hong khawl kheu mawk hi. Tua khit ciangin apa in tai gawp lo bek hilo-in dingto-in a tapa angkawi-a "Hih pa pen Pasian' na ka sepna ah hong huh ding ka muan mahmah ka tapa pa hi" ci-in a lawmte kiangah gen hi. Tua kammal a zak aa kipan Franklin pen a nuntakzia le a ngaihsutzia hong kikhelpah aa, a pa nasepna Evangelism tawh kisai leitungbup nasepna ah makai dinmun dong tung hi.
Naupangte' Kum ci-in thubulphuh i neihna tungtawnin Lai Siangtho siksanna ah nu le pate in Jesuh' thupha piak ding deihin a naupangte tawh Jesuh' nung hong zui uh hi. I thupi ngaihsut ding ahi hi. Naupangte nawngkaisa-in "No inn na ngak lel un" cih kammalte zang nawnlo ding hihang. Amau tawh tukhawm ding, biakinn kikhoppih ding, thu ngaihpih ding hihang. Hun pia-in paipih ding hi hang. Amaute Jesuh in na nial tuanlo hi.
Topa Jesuh' nungzuite pen deihna tuamtuam tawh a zui om uh hi. Pharisee-te in a mawhna zongin a nung nakzuih mahmah uh hi. Pawl khatte leuleu na lamdang a mu nuam uh ahih manin Jesuh' nung zui uh hi. Pawlkhatte leuleu damlo sapi mahin a ngap ciacia-un Jesuh' nung zui uh hi. Tua banga a nungzuite’ lunggulhna a tawpna ciang hong kilang veve hi. Mawhna a zongte in a mawh theih theihna ding lampi le thute phuak-in mawhna mu uh hi. Na lamdang munuamte in zong na lamdang khat khit khat mu ziahziah uh hi. Natna satna tawh zawngkhal taka a zuite in zong damna le lungnopna ngah uh hi. A lunggulhnate uh hong tangtung hi. Topa' nungzuihna khialh om tuanlo hi. Tuni-in nang bangci bangin Jesuh' nung zui na hiam?
1939 kumin Germany pen galpi khatna hangin meigong 300,000 bang om, kici hi. Tua meigong numei 300,000 te lungkia deklo-in hong hanciam kik uha, Germany gam hong kiphut kik hi. Meigong na hihna hangin lungkia kei in. Topa' mai-ah kiko kik in. Tate adingin tha san ding hi hang. I gamtatna tawh lak ding hi hang. Topa'n gah limci hong hisak ding hi.
Tua Germany pen nisuahna le nitumna lam ci-in kikhen a, nisuahna gam pen Russia-te in uk-in Communist ukna nuai-ah om uh hi. Nitumna lam pen American, France, Britain-te in uk-in Democracy gam hong suak hi. Gam khat ahih hangin, ukna nam nih nuai-ah om uh ahih manin a khantohzia uh, a tat aheek zia uh kibang lo hi. Tua bang ukna innkuan khat sungah hong om tak ciangin innkuan khat ahih hangun a tat aheekzia uh hong kibang keileh, thubaih tuanlo ding hi. Innkuan sung kimakaihzia nam nih a om ciangin kikhenna om tawntung ding hi. Tua kikhenna khempeuh kisia-in thu khempeuh i vaihawm khop diamdiam ciangin Germany gam kimakaihna tawh ka tehkaknop thu a hi hi.
I nuntakna ah Pasian a masapen ah koih ni. I kicinna bulpi Topa Pasian bek ahi hi. Eite mihing i hih manin kicinna khat beek neilo hi hang. Tua Pasian in a nasem aa hong seh Pastor le makaite tawh eite in hoih takin kizopna neih ding kisam hi. Eite le i tate zong pattah siamna tawh Topa' thu a mangte hiciat ni. Tua bang ni hong tun ciangin nang mah in: "Ka tate'n keimah hong suun ei, Topa lungdam ing," ci-a Topa tungah lungdamna khitui tawh tua ni ciangin Topa' min na phat thei ding hi. Na tate na angtanna bulpi hisak den ta in! Topa'n innkuan nuam thupha hong luankim ciat tahen!
Source:
https://tedimbcy.weebly.com
