Mihau Taktak (Luke 16:19-23)
Agelh ~ Suang Khen Pau
Mihingte kihau nuam ciat a, zawn ding ki-ut lo tek hi. Hauh nading bekbek kizong hi. Hauh nading ahih nak leh luang kikham ngam tangial hi. Hauh ding bekbek kidemin ih nei a, han mualsuang tung nangawn dongah ih kidem hi. Tua hi a, sim leitung in hauna kidemna tualpi bang khat hong suak hi. In teel Lai siangtho sunga gentehna pen Khristian upna guipite kawkkim mahmah hi. Leitungah nuntak zia kikimloh zia, hell thu, nuntak tawntungna thu, sihkhit thu, thu khenna thu cibangin upna guipi teng kituahna mun khat ahi hi. Ahi zongin hih gentehna sungah i kikup nop thu in sum haupa leh Lazaras’ thu hi a, ih theikimciat kha ding hi. Ih theih hangin kinuntakpih kim lo ahih manin tu lai Khirstiante’ nuntak-khuasakzia hong toutham ka sa hi. Sum haupa bang hangin hell sung tung ahiam? Hih gentehna tung tawnin Khristiante adingin Khrih’ deih nuntakna in bang a hiam? cih thu ih kikumnuam hi.
1) A Kilamdang Nuntakna
Hih gentehna sungah mihing tuak ahih hangun a nuntakzia uh kilamdang mahmah hi. Khat hau-in khat zawng pha mahmah hi. Khat in puan hoihnono silhin, an lim penpen ne zo a, adang khat in ahih leh silh ding ten ding nei zolo-in, annengkia tawmin nungta hi. Khat in innhoih mahmah sungah a om laitak-in khat in inn ding nei zo lo-in kongzin leh mi’ kongbiang teng ah kipingpavei hi. Bakvat bang den hi. Mihaupa nuamsa-in a cidam laitakin Lazarus ahih leh meimatum veii-in kikhuat niloh hi. Sum haupa cidamin nuamsa-in inn nuam peen sungah a nuntak laitak-in mi zawngpa a kongbiang ciang bekah om kha hi. Sum haupa in lawm le gual tawh nuamsa-in dungdung dangdang asak laitakin Lazaras in ahih leh a meimatum a liaksak ding uite lobuang lawm neilo hi. A nuntakna uh kilamdang lua mahmah hi. Khat seisangin khat tualniam hi. Khat innbulin kha daipam hi. Khat cithei-in khat cimawh hi. Khat lungnuamin khat lungkham den hi. Khat vang pha-in khat vangsel hi. Mataw, mataw, a kilamdang nuntakna!
Leitung mit tawh ih et ciangin sum haupa in a deih peuhpeuh nei zo-in hau mahmah takpi hi. Ahi zongin khamit tawh ih et ciangin sum haupa pen zawngpha mahmah hi. A nuntakna a kilak ciangin vantungah a kending bang mah neilo hi. Amah in leitungah ading bek sum kholin vantungading sum na khol khalo hi. Puan hoihnono a silh hangin thuman puanpi neikha lo hi. Leitung ah lawm tampi a neih hangin vantungah a panpih ding lawm na zong khallo hi. Ama hauhna pen Khrih kihello hauhna ahih manin a mawkna taktak hi a, a taktak-in cileng a zawng mahmah na hi gige hi. Khrih kihello pilna a mawkna hi. Khrih kihello hanta zong a mawkna mah hi. Khrih kihello nuntakna pen a mawkna pi taktak ahi hi.
A langkhatah Lazaras ahih leh leitungah zawnna leh tualniamna cih simloh aneih omlo hi. A meima a liaksak ui lobuang lawm zong neilo hi. Ahi zongin khamit tawh enthei leng Lazaras pen hau mahmah hi. Pasian’ ta khat ahih banah Pasian’gamh le gou a luah dingpa ahi hi. Puansilh-nikteen aneih loh ha’ng ama’n thuman puan na nei hi. Leitungah lawm a hauh loh hangin vantung dong a tunpih ding lawm hoih pen Khrih na nei hi. Leitungah iplah huai na manpha a neih loh hangin Khrih neih ahih manin hampha hi. A taktakin cileng Lazaras pen mihau taktak na hi zaw hi. Aman Jesuh Khrih na pomin na nei hi.
2) Liangko Kimna Hanmual
Mi zawngpa hong si masa-a vantung gam hong tungin Abraham’ ang hong ngah hi. Sum haupa zong hong sileuleu a, hell sung hong tung mawk hi. Sum haupa a sih ciangin sihvuina zong nasia takin kibawlkha ding hi. Mi thupi, mihau tampi zong in uap kha ding hi. A hankhuk zong hoih takin kibawl kha ding hi. Vangpiakna leh pahtawi phatna zong tampi kisak kha ding hi. Ahi zongin Lazaras a sih ciangin ui si bang khalel bek ding hi. Tham si bang lelbek kha ding hi.Mi thupite’n uap cih thadah a luanghawm luak ding nagawn zong omlo kha ding hi. Hankhuk zong nei zo-in ka um kei hi. Ahi zongin vantung mite in a kha na dawn tuahin Abraham’ angnuam dong na tunpih hi. Khrih’ gentehna ih sim ciangin mihaupa in hell sung a tun nadingin mawhna a bawl lam kician takin omlo hi. Amah’n tual that lo hi. Mi’zi mi’ta tawh mawh lo hi. Golhguk ne lo hi. Zuau nangawn zong gen ngeilo kha ding hi. Ahi zongin hellkhuk sung tung mikmek mawk hi. Bang hangin hellkhuk tung hi ding hiam?
2.1 Mihaupa pen ama ading bekin nungta a, mite ading nungta lo hi.
A kongbiang- a om Lazaras awlmawh lo hi. Don lo hi. Kem lo hi. Khoi lo hi. Ama ading bekbek in nungta takpi mawk hi. Nuamsa hi. Kua’ta kua’ nau pawkkha lo hi. Pak liuliau-in om hi.
Mite adingin nungtalo bek lo-in Khrih adingin zong na nungta lo hi. Khrih adinng nungta lo cih thadah Khrih zong na neilo hi. Khrih adingin nungta photphot leng ei adingin amah hong nungta ding hi. Khrih adingin ih nuntak kei leh Khrih zong ei adingin hong nungta lo kha ding hi. Awlmawhloh mawhna(sin of omission) hang-a mi haupa hell sung a na tung hi zaw hi. Tu ni’n awlmawh ding kilawmpipi na awlmawh kei kha hiam? Kiawlmawh dih ni. Kidon kikem, kipanpih kipantah dih ni!
2.2 Mi haupa pen leitungah a nuntak sung- a a sepkhak nate hang a, vantung gam atung lo hilo-in, sep ding akilawm asepkhak loh manin vantung gam a tanlawh na hi zaw hi.
Thukhen ni ciagin Khrih in, ‘Ka gilkial laitakin an na hong piakei uh a, ka dangtak laitak in tui na hong pia kei uh a, khualmi ka hih laitakin zin nong do kei uh a, puan ka neihloh laitakin puan nong guan kei uh a, ka cinat laitakin nong hawh kei uh hi’. (Matt.25:42-43)hong cikhathei ding hi. Kum zalom 21 sung ah Jesuh Khrih a puantualpi silhin leitungah hong vak nawnlo kha ding a, mihingte mah zangin na hong sem ding ahih manin sep ding a kilawmpipite awlmawhlo a, ih sepkhakloh ding lauhuai mahmah kha ding hi. Mite adingin nuntak ding Khrih in hong deih hi. Unau sung nangawnah ih pilna, ih siamna, ih melhoihna, ih duh ih deih kibang lo hi. Ih kum hong cin tek ciangin zileta kinei hi. Pawlkhatte cithei-in nuamsa a, pawlkhatte ahih leh cimawhin daipam uh hi. Pasian’ deihna ah a citeihte’n azawng a daipaam zawdeuhte huh ding, panpih ding ahi hi.
2.3 Mihaupa in a hauhna Pasian- in neikha hi. Hauhna ih cih pen mawhna hilo a, zawnna zong kamsiat man hituanlo hi.
Mihau khempeuh siakim lo a, mi zawng khempeuh hoih kimlo hi. Hauhna i cih in mawhna ahih loh hangin hauhna hanga kiphatsakna, kiliatsaknas, mineu-muhna, mi simmawhna om thei ahih manin awk nading thang tawh kibang hi. Mihaupa hell sung a tunna a hang pen a hauh man hilo a, a hauhna Pasian-a aneihkhak man hi zaw hi. A hauhna tawh Pasian na khek kha hi. Tua in hauhna ii luahuaina ahi hi.
3)Khrih’ Deih Khristian Nuntakna
Tu laitak I nuntakna sungah mihaupa leh Lazaras bangin, ahuate’n a zawngte awlmawhlohna, apilte’n a haite simmawhna, a thahatte’n a zawngkhalte zawhthawhna lian kasa hi. Usung-nausung nangawnah anei le anei kithupisak diak-in a thaneem-azawngkhalte ki-awlmawkkha lo hi. Kiphawkkha lo hi. Kimangngilh tawntung hi. Ei ading bekin kinungta a, Khrih’ deihna bangin kinungta nawnlo hi. I ki-khristiansak mahmah lai hi. Sep ding kilawmpipi sunsiahin I nei niloh hi, Midangte’ phattuam nading na sepna in Pasian’ lenggah huanah nasep lianpen ahih lam ih phawk kha kei hi. Kum zalom 21 sungah Khrih hong kalh thu in ki-awlmawhna, kidon kikepna ahi hi.
Thu Khupna
Kum zalom 21 sungah Khristiante’ i sep ding akilawm thu in ki-awlmawhna ahi hi. Mihaupa hell sung a tuna pen a hauh man hilo in, Khrih a neihloh man ahi hi. Lazaras zong vantung gam a tuna in a zawn man hizaw lo-in Khrih a neih man na hi zaw hi. Mihaupa hell a tunna a hang in Lazaras a awlmawhlohna hang ahi hi. Leitung ah adeih na khempeuh a neih hangin vantung gam dong a tunpih ding lawm na neikha lo ahih manin a taktak-in cileng Sum haupa pen zawng mahmah hi. Lazaras ahih leh leitung ah bangmah nei lo-in, meimatum veii-in a om hang in vantung dong a tunpih ding Khrih nei ahih manin mihau taktak ahi hi. Khrih kihello hatna a mawkna hi. Khrih kihello siamna a mawkna hi. Khrih kihello pilna amawkna pi mah hi. Khrih kihello hauhna zong a mawkna taktak ahi hi.
