Malaysia Pan Zogam Phawkna
Agelh ~ Cing Don Mang @ Mangsen
Zozang
Pupa' patsa zogam leitang nusia in, tongsan' theihloh Malaysia gamah tuangbang tung ing. Zingni suahsim vai lokuan a, sunni tum zong mel a muhloh, zankhua sawt ciang vaikuan ciah in laikhun tung pan maimit singmawng pianna Zogam mubang ngai ing.
"Nu le Pa, Laizom Sanggam te Phawkna"
Innkuanpih te aw hong phawk mahmah ing, kei ka zinna Malaysia ah inn te hoihthei lua, taih inn bekbek, inn sangpipi kilam zihziah in zan in lampi mei te tang zihziah a nop ci mahmah hi. Aksa, aktui nisim phial in ki ne zo in nuam mahmah hi. Innkhawi ganhing te leh tuisung ganhing, huansungah i ciin mehteh mehgah zong kim in sum nei peuh leng i duh bangbang a kicing in om zihziah hi.
Ahi hang maw, nu aw hilam ah aksa ka neknek hang kazin ding nitak a i akpi tuilai go a innkuan in i nek mah lim pen, ka unau tengun sabuai kiim ah samin ding ngak kawm, ak gilpeeng siktul tawh nong em sak namtui viauviau, a min teh sik tan ciauciau a nonghawm sak mah lim pen,kapa in alu leh agilpi, nangbel "ken ak khe mah limsa pen ing", nong cih hang, nu aw i meh cinloh man hi ding cih ka ngaih sut ciang hong nekngaih lua ing.
Kolam ah khuahun khatbek om in, nisim in khualum mahmah hi. Mihau ten bel a innsung uh avot (aircon) thuah in zanpuan bang silh kik zawzen uh, kobel pangkaa (fan) zangin ki zap sak
hiauhiau ung. Innlam ah khuakhal hun teh lawhpi tawh kizap a, i nuih ziahziah hun te na ngaihsun zel ing.
Phalbi hongtun hun teh meikha tengah singbul sum teng cih a, mei awi kawm in tangthu gen khawm a, khuadam lua kisa ling keuhkeuh kawm in i khut te i lenuai ah koih in i pau khop hun te ngaihhuai si e. Lungdam bawl hongtun ciang, lolai ah ansangte kaikhawm in lungdam bawlpuan ding i thalawh hunte khawng phawk lua ing.
Ko Malaysia gam bel Pasian thu um (Christian) gam ahihloh mahbangin lungdam bawl genloh nipi naleng ki tawlnga kha lo, damnak leh nisim bawng lokuan akibang den hi. I damkei leh nitha hong kat setset in tuabang hunciang ka lung lenglua, inn ah ka damloh ciang nang manlo pipi in na khut vokan nampi tawh katal nonglawnsak bek zong ka natna nuamtuam liang hiven, tun bel ka damloh hunciang Nu aw kacih bek zong anuam tuam hi ing.
Pa aw kazin dingin migam milei natun ciang, "lamdang sakluat neihsawm kei-in! Lamdang i sak atam leh lam kikhial thei hi", ci'n nong vaikhak te naciamteh den ing. Kong ciahkal ding ngaklah mahmah ing.
"Zogam Ngaihna"
Tuan a pupa' theihloh singta gam pan Zogam aw tangbang nadam hiam ci-in gal khua hong don zel ing. Heina khatlo amual zatam in honghal zongin, melmuh loh kum ki vei mah leh sinlai ah atham den pianna Zogam ken hong ngai veng. Kei ka lenna nuam, ka khawlna nuam e, ningzu aisa ciangbal bang ki lui ka ci zongin Zogam vaimin leh gatam mah ken ka ngai zaw, Tunnu ningzumah ken khumsa pen ing.
Singta saulim pakbang etlawm zongin, pankai Zogam ken ka ngai zaw. Singta tongsuah kalel zongin, naubang san kacimloh Zogam tongdam ken ngai zaw. Sesum phungcing ka lo zo kei zong tomkal guabang hin sung anop tuam ding sesum lambang zong ing e, haulun lai ah kabual zongin a hau in hau gui va zuan sese. Tun le Zua leh laizom teng tang' batlei lah kitawi theilo a kei kazuan aw ngetngut aw e. Kei ka lungzuan za in atam ciang nuihsiam in lel leng tawmbang nuamtuam a, zaila in awi leng al bang mangtuam e.
Kei deih sinthu lel thei hileng Tun le Zua, laizom teng leh sengual teng tawh naliim nuai ah tut hong khawl in holung kum khawm nuam ing. Pupa patsa Zogam leitang tulpaan kaita, kapno ten khuambang luah ding lung kagel ciang sinlai lingbang hong do lua e. Heina peuhah lungnuam omlo Sian aw hambang hong huai inla, lungtup tuibang tungsak aw. Zogam hong pallun henla Zotate ciibang kitheh napan Zogam leitangah dawnbang kituah kik ding haibang ngaklah ta'ng!
Lelnop sinthu zatamlai pan khawhlo mabang hong zialbawl phot ning.
Source:
ZRC 10TH ANNIVERSARY - LAIGELH KIDEMNA
