Lai Pilna.
Agelh ~ Kap Za Khai @ Photoh
Thu patna
Lai pilna cih ciangin laibu sunga kigelh thu tuamtuam pan a kingah pilna leh theihnate hi ci-in kipom masa thei hi. Lai pilna pen a kisin tawm thei, a kizong tawm thei pilna hi a, Pasian piak pilna (wisdom) tawh kibang lo hi. Lai pilna pen a zongzo, a kanzo te in tam mu uh hi. Tua mah bangin lai pilna in nuntakna ah phattuamna tampi hong pia thei hi. Tua ahih manin lai sim thei I hih nak leh laibu simsim ding, lai pilna beh laplap ding, laipilna khangsaksak ding kisam hi. Luthuh U Hla in Lai sim in cih ama laibu sungah ‘laisim lote a khantohna uh khawlcip a, laisimte hi leh khangto semsem uh hi’ ci-in na gelh ngei hi. A khangto nuamte in laibu sung pan pilna zongin na hoih na pha tampi mu khia uha nuntak pih pah uh ahih manun mite’ zahtak leh etteh in om pah uh hi. Ahi zongin laibu sim ngeilote hi leh laibu sunga om pilnate mu kha lo, ngah kha lo, in phattuamna zong ciamkha lo uh hi.
Lai Deih In
A khangto leh a picing gam leh minamte in lai deih kim ciat uh hi. A khangto lo leh a khua mulo mite in lai deih lo uh hi. Gentehna in Abraham Lincoln pen lai a deih mahmah mi khat hi. Amah pen khuata pan a khangkia hi. A pa pen huanbawl in gankhawi a, a gankhawina ah teengin, mite in inn hoih nono a neih laitak un amau pen singinn neu khat sungah teeng uh hi. A nuntak sungin kha (8) bek sangkah kha hi. Lincoln pen a inn pan lai pilna a zong pa, amah le amah a hanciam pa ahi hi. A khua ah laibu sim ding omlo ahih manin tai tampi a kigamlatna khua ah khe tawh pai in laibu kawm a, a sim khit ciangin va puak kik zel hi. Inn ah mei neilo ahih manin singmei leh lampi mei nuai ah laisim den pa hi. Laibu a neih loh hangin laibu omna ah a pai pa hi.
Hi bangin haksapi in laibu zongin a simsimna hangin amah pen theihna, ciaptehna, thu muhna leh gamtat hekzia lam-ah hong picing semsem a, a tawpna ah United States of America president ciang dongah hong kahto zo hi. Hih in lai pilna gah ahi hi. A kumpi sep hun sungin US gam a sila neihna beisak hi (Abolished Slavery through Emancipation Proclamation). Ama sih khit ciangin US khuapi Washington DC ah “Lincoln Memorial” kici innpi khat kilam sak a, US leh leitung bup in a zahtak mahmah mun ahi hi. Laibu a thusimte laibu in lamto a, leitung bup mualsuang dongah tawisang hi. Lai deihna in lungsim pumpi leh nuntak khuasuak zia khantohna lam-ah kipatna ahih manin mi khempeuh in lai deihna lungsim neih huai hi.
Laibu Sung Pan-in
Laibu sungah pilna a tuamtuam a om bangin laibu I sim nak leh tua pilnate a ngah ding hi pah hi. Sangsia/mahte tung panin pilna tuamtuamte koici sin cih theihna kingah hi. Gam uk kumpite leh gam thuvai hawmte tung panin mi tunga nasep dan ding leh gam leh minam puah dan ding kisin thei hi. Scientistte tung panin scientist tawh kisai nate kisin thei hi. Ahi zongin laibu hi leh na khempeuh a kim in kihel khin ahih manin laisimte in a lak theih ding bek thupi hi. Mi khempeuh in laisim huai hi. Banghang hiam cih leh laisim le cin..
- Mipil na suak ding hi.
- Na din mun na kithei ding hi.
- Asia apha na khentel thei ding hi.
- Laigelhzia leh laipiazia na siam ding hi.
- Upmawh thu na gen nawn kei ding hi.
- Mailam thu muhkolhna na nei ding hi.
- Nuntak khuasakzia na tel semsem ding hi.
- Thu na theih tam in, a tel zong tam ding hi.
- Bangmah a theilo na hih lam na kiphawk ding hi.
- Gamtat, luhekzia leh kampau na kidawm zo ding hi.
- Gamlehlei it in, khualehtui zunzia na siam ding hi.
- Hun uk sep zia, makaih sepzia na siam ding hi.
- Na khuak a tathiam tawh na kibang ding hi.
- Hong kineu muh theilo ding hi.
- Thu hilh na siam ding hi.
Thu Khupna
Theihnop leh telnop thu khempeuh laibu sungah om a, lak theih ding bek a kisam hi. Kawlgam laigelhsia khat ahi Phy Myint in ‘laibu pen kham kikholna khamkhuk tawh kibang hi’ na ci ngei hi. Laibu sahpi dong panin laibu a paan mahmah dongah a nuntak pih huai pilna tampi om hi. Tua ahih manin laibu lei in. laibu neih sawm in. laibu sim in. Na laisimte ciamteh in la nuntak pih sawm in. Ni khat ni ciangin na piakkhiat thamante in a gah hong gah khia ding hi.
Reference :
Hau Za Cin, Lai Pilna: Zangkong Awging, khol 24, hawm- 263, March, Yangon, 2013. Zangkong Awging, khol 23, hawm- 251, Feb. 2012.
