Ka Neuthu Mangmawh Pawlkhat - Part I (Nu phawkna No. 01-06)
(Astract from Ka Pian Sinthu Vol I)
Agelh ~ Awn Za Pau
01. Kanu Thupha
Ka nu’n thupha hong pia nuam ei leh, a hong tai ciangin hong hamsiat den hi. “Na luang na ban in sawng heh! na cil na zangg khang hen! pulsih in la aigamh in!!! Na khut na ban bui sumh hen!”...cih khawng vive hi liang lawmlawm a, ahi zongin Pasian thu um ahih loh mah bangin agen khiat bangin piang sam lo hi. Acih takpi zong hi lo in, a kamzat ngei ahihi. Tua pen in kei pianzia ka khan khiatna akhong akhia aa kong telgen nop luatna man hi zaw hi. Nute in tate tungah a kamzat dan a pattah dan kibang het lo ding cih gennopna hi.
O2. Ka Nu Khutlum
Khat vei innsung mei khangah ka khut sil ka hiam aw ka tut laitakin ka nu’n bang ziak ahitam cian theih nawn keng, tai kawm leh gitneih loh in ka nungzang hong tum phuat vat mawk a, tawlpi khat ka nak thei kei hi. Ka khasia peuhmah hi. Ka si vat nuam zaw tham hi. Ganhing dan a hilhcian masak om lo a kikeei kipet dan suak kasa hi.
03. Ka Nu Aakciang
A sawt ciangin kanu zia zong ka thei pianpianta hi. Khat vei ka nu’n inn sung aa silngo bawl a manlah mahmah laitakin, ‘innka a anphote na hung in, ak neek loh ding’ ci in hongsawl hi. Kei zong a hung a kinei tei mah hi veng, khuaphia mahmah veve ka hi tam.. akpi no kai hon khat in a neek laitak innsung pan kanu hong pusuak in amuh teh hehlua kisa in, hamsiat kawm leh akciang (ak hunna ciang) la in sat dingin hong delh suasua a, kei zong inntual lam ah tai in, nui tulhtulh kawm sa in ‘Nu, akciang tawh hon sat le cin na khong vem...’ ka cih leh maan sa zek ahi tam hong khawlpah dide hi.
04. Ka Tuitawina Um Khuai
Khat vei leuleu seng tawh um pua in Tualphai tui ka tawi hi. Tualphai tui cih pen Saizang Tual ii a phaitam lamah om ahih manin Tualphai tui kici hi a, Cianlai veeng sungah om hi. Ka tui ka dip khit leh seng sungah guangin ka kisot teh ka seng ka puksak kha a, ka tuitawina umpi seng pan kia in kitam hi. Ka nu hong tai ding ka dah luat man in ka kap hi. Ka gei ah tuitawi nupila khat in hong hehnem pah lian bilbel a, ‘Dah kei o lawm kap kei o! mihing zong si hang ei! Hih tui um kitam leltak dah di hi kei ei!’ hong cih pen tudong ka bilkha in ka zaza lai hi. Inn ka tun teh ka nu’n hong tai ngeiingeii leh tua kammal tawh dawng kik pah lian ding ci in tha ka ngah mahmah hi. Ahih hang tua tungtaang in ka nu’n hong theisiam mahmah bilbel hi.
05. Nu’ Hilh Loh Pa’ Hilh Loh
Ka nu’n hong it mahmah napi’n hong hilh, hong pantah thei hetlo hi. Hih na pi hi ei! Hih na pu hi ei! pu ci o! pi ci o! cih khawng bek na leng a kipan hong hilh mel lo hi. Ka pute pen gensiatna hetlo in Saizang khuapi-ah a kamsiam lo penpente hi a, thu bang limgen ngial leh ahang vava tawh kibangkik liang uh hi.
Kanu kapa in sanggam unau takpi ‘u aw’ cih ding ‘nau aw’ cih ding kamsiam zat ding peuhmah hong pantah lo a, ka khua theih diak tak teh ka top kikkik ahihi. Ka nu in velh huai maw velh huai lo maw cih ngaihsun lo in, a khut manlang mahmah in hong vel thei zelzel hi. Hong taii simin hong hamsiat pahpah hi. Ka pa leuleu in hong taii hong vel ngei peuhmah lo hi. Zong hong hilhcian ngei khollo semm hi. A hong hilh hong gen loh hangin ama omdan leh gamtat luhekna pan pilna ka ngah thei veve hi.
Tua te ka gen ciangin hehna thangpaihna mawh siat nopna tawh a gen ka hi kei hi. A kamzat siam loh leh a hilh siam loh man hi a, ih nu ih pate hong it lamtak pen akuamah tek in kithei lua mahmah hi. Christian biakna zuih hak man in Christian dan tawh kipattah lohna hang hitah a cih a pho-laak nuam zaw ka hihi. “Pasian zahtakna in pilna kipatna hi “ acihte akithei lo akiza naii peuhmah lo na hi mawk tazen hi.
06. Huihpi Nun Ciang Kidalna
Ih gamah ‘Khuapi guah’ zuk hun ciangin huihpi nak nun thei mahmah aa, inntung khuhna siikkang dal, suangpeek leh bi inn pawl khat leemkhia in lenh mang thei hi. Suang inn peekte bang innsung lamah hong kia in hong deng kha leh cih kilau mahmah ahih manin, huihpi a nak nun mahmah ciangin, ka nu’n innnuai gultawngah hong bukpih pahpah aa huihpi guahpi kap dong lungmuang takin ka bu uhhi. Huihpi nun ciangin bii inn bel lungmuanhuai pen bilbel zaw hi.
A kik ah Part – II
Aban ban in hi Laibu Saal pan hong suah toto ding hi ung…
