ZAILA SAK SIAM IH CIHTE
Agelh ~ Kam
La ih cih pen la kam in zaila kici a, lasak siam ih cih ciangin ngeina la ahi, Zola bang ahih leh a khuang leh a sialki tum tawh kituak a, a sa thei letlette lasiam kici hi. Cihnopna ah a lasak leh a tumgingte kituak lianlian ding cihna ahi hi. A un, a aw lai, a aw sang akicihna munte ah, akisam zah a kulzah ding ciang a aw a gingsak thei, a sa theite lasiam kici hi.
Mikang pau in a ‘timing’ ei pau in a ‘tah’ bang kituak kei leh ngeina la ah akilat (kilangh) luat loh hang, tu lai hunthak late ah a tumging leh a aw kituak kei leh ahi zongin, a tah hong kituak kei leh ahi zongin, hong zaknop het lo pah hi. Hong kinuihsan ngeiingaii lel ding hi. Tua hi a, tua bang a, a music tawh kituak a, la a sa theite pen lasiam cih theih pah ding ahihi. Cihnopna ah ‘lasa thei ei, lasiam ei!’ hong kici ding hi.
A tung a ih gensa mah bangin lasak siamte lak ah a siam dan kibang kikim veve, a aw hoih mahmahte pen, a sawt lo in lasiam minthang hong suak pah ding uh hi. Tua kawmkal ah a aw kibang tektek pawl khatte pilvang mahmah leuleu in, ama awsuah leh a luandan tawh kituak ding la teel thei in sa thei pah a, a za a ngai khempeuh in zong hoihsa in minthan lawh mahmah pah uhhi. Mi khat a minthang sak la pen album khat sung a late lak ah, dawng khat dawng nih kan hi lo hi.
Hih bang a minthan ding zong kim leh pam pahtawina leh hong deihsak hong panpih mi hon tampi (fans) ih neih kul hi. Kampau muk pau akipan om dan khawl dan zong mite hong pahtaak theihtheihna dingin siam mahmah kul ding hi. Kawlgam om dan leuleu ah a la siam kisa in a la sak zong hoih mahmah tase leh a sapa kuate hi a, koi ci bang mi hiam ci’n a deidan thei pawl khat om thei lai veve uhhi.
La khat peuh akiphuah ciangin, a la aw suah leh ala nam zui in bang tumging (music) namte kizang leh a la tawh kituak pen ding cih zong teel siam masak ding kisam mahmah hi. La hoih tateu hen ci in, tumging a tam theithei akim in ih zat se sangin, guitar ahih kei leh piano bek khawng tawh akilawm zaw peuh om thei zaw hi. Slow type – aw neem ngiingeii tawh sak hithiat ding a la kiphuak kim lai ‘hard rock’ khawng tawh sa leh a hoih zaw la pawl khat om thei zanzan leuleu hi.
Kei tawh kisai bang hong pulaak leng, kei zong ka kipat cil in bangmah lasa thei ka hi kei hi. Sunday School kahna pan leh nipi sim biak inn kahna pan lasak kipanin, a sawtsawt ciangin lasak uukna hongguan hi. Masuan kician dang nei lo ka hih manin ka pa mahmah in hong panpihna tawh Kawlla album nih ciang ka suak sak zo a, tua lak ah amasa album khat kikhawng khollo, tu lai pau leh ‘pauk’ zo het lo hi. Anihna pen ahih leh Sagaing Division, Kachin State leh Shan State, ah honpi khat Mon State leh adang division te ah tawm kha tek bek mah ka khawng zo liailiai bek hi. A taktak minthanna a nei naii lo mi thak khat in album bup a suahsak pah sangin, a mithangsate tawh kithuah a dawng khat dawng nih kihel masak phot ding a hoih zaw ahihi. Ka ‘single albumte’ akideih luat loh hangin Kawl pau a ka sak Pasian late - ‘gospel songs’ ka sakte uh akideih veve suak hi.
Akipan cilte tungah ngaihsutna kong gen nop inah, nipi sim choir sate lak ah kihel den ding hoih hi. Hun na ngah sim in biakinn ah nang guak in lasak pahpah ding kisam hi. Tu hun ciangin a hanciam nuamte a’dingin internet tungtawn in la deih bangbang kingai thei ta ahih manin, lasak a uukte a’dingin hun hoih mahmah ta hi. La na sak theihna dingin la a tam theithei ngaih ding kisam hi. Hi thei leh Zolate sangin Kawlla tampi ngai ding hoih hi. Kawlla zong sang’in mikang la vive ngai le hang bucing zaw lai hi.Tua ka cih ciangin Zola a thu sim lo, aneu muh cihna hi lo hi. Ahi zongin lasak dan music tum dan leh zat dante kicing tak a thei nuamte a’ding cihna ahihi.
Mi honpi mai ah la na sak ciangin na maizum theih leh/na lau theih leh, mi honpite mai en lo in, a nung penpen a tute lutung kawmpeekte en kawm sa in sa ding a, music tawh kituak dingin na bil tawh ngai kawm gige in sak ding ahihi. Lasak laitak in na lasak tawh kisai lo buang a dang lungsim sungah lut sak loh ding hoih hi. Huih zong manman a dik ding kisam hi. Tua hi kei leh na aw a san mahmah na ding mun ah a kul zah dongin na eu sak zo kei ding hi.
La na sak ciangin a la deihna leh a khiatna akilangh theithei dingin, nang mahmah in a thuak a vei taktak bangin kineih in, na aw kaih dante bawl thei in sa thei lecin, na la sak a ngaite mahmah ii lungsim la in muibun mahmah ding a, a lungsim sungah teng in a bilkha tawh za kikkik den ding uhhi. Gentehna in CK Khai in la hoih mahmah leh aminthang mahmah a la phuah “Tai Tampi” acih bang CK Khai, Rody Za Lian Sing leh Evan. Vanlalsailova te in sa ciat uh a, la kibang veve a sak dan uh kibang khin lo hi. Tuate na ngai kak le uh cin ka gennopna leh ka cihnopna na tel pah ding uhhi.
Lasak dan pen nam thum bang om hi. Na kam bek tawh lasakna, na gong tawh sakna leh na gil tawh saknate ahihi. Ih tel theih ziau ding in a aw sang mahmah leh a ging ngawh theithei a lasaknate ah gil tha tawh sak khawm ding kisam hi. Aw a sang tawh akisa lote, gentehna in Sai Htee Saing in ama late a gong tha vive tawh sa hi kici thei hi. Myo Gyi leuleu ciangin a gil tha tawh a sak tam zaw cih ding ahihi. Kam tha bek tawh saknate pen ih kampau dan hithiat a kisate cihna hi pah hi.
Lasak siamte in a aw a siat lohna dingin, sathau nel lua leh zu leh zatep cihte zat loh ding hoih hi. Tua banah nisim khua ul suahna dingin lam siau ahih kei leh kimawlna khat peuh kimawl tawntung leh hoih hi.
Lasak pen a aw ei deih bang a, bawl (control) theih kawikawi ding kisam hi. A diakdiak in mic tawh la na sak ciangin na aw gin dan ding pen na kam leh na mic kigamlatna zong zat siam mahmah ding kul hi. Mic tawh la na sak munn kei leh mic leh na kam/muk a naii a gamla ding thei siam pah lo ding na hih manin, hun na ngah nak leh sak munn mahmah ding ahih kei leh, kisin mahmah ding kisam hi. A siamsa a theisa a piang kuamah om lo ahih manin, mun khempeuh ah hanciamna om lo in a khong in bangmah kingah lo cih ding mah na hi tawntung hi.
Mipih sapih lia leh tang khangnote aw, ih Zo ngeina late lah kep ciingg ding bek mah hi a, tuate siamna bek tawh khua kisat zolo ding (Kawlgam bup ah kiminthang zo taktak lo ding) ahih manin, leitung bup ii zat ahi tu lai hun thak late ih sak theih kim ding hun hong hi ta hi. Tu hun pen nungak tangval akici khempeuh in guitar a tum theih tek ding hun, Zola, Kawlla, Mangla a sak theih kim tek ding hun hi ta hi. Tua bek tham loh in a kulkulna munah zat theih pahpah dingin Mang laam, Kawllaam, Kala laam cihte a kipan laam a tuamtuam zong lam theih kawikawi ding kisam ta hi.
Hun thak late tawh kisai late leh laamna dianna a tuamtuamte khuaval vaii, zulhzau vaii in ngaihsun zaw lo in, tu hun tu laitak khangthakte ii ngeina (culture) khat in ngaihsun in zat theih kawikawi dingin hoih hi. Hun na ngah uh ciangin a thei a siamte tung pan na sin kawikawi le uh cin cih zong kong hanthawn nuam hi.
