THUPHA SANTAAK MI HIHNA (Isa. 55:7)
Agelh ~Kap Za Khai (Photoh)
Thupha pen mi khempeuh in lunggulh ciat in, kideih ciat hi. Thupha ngahna dingin lampi tuamtuam tawh kihanciam hi. Thupha pen leitungah a manpha pen khat ahihzah khat in zong kizong ciat hi. Jacob bangin a Pa’ thupha ngahna dingin a nu tawh a pa khembawl in thupha na la uh hi (Pian. 27:1-30). Hih tungtawnin thupha’ manphatna le a deihhuaina kilangsak mahmah hi.
Pasian in nisim in mi khempeuh tungah deidanna nei het loin thupha pia den hi (Matt. 5: 45). Mi khempeuh tuni dongin a nuntak theihna zong ama’ hehpihna hang ahi hi. Thu-um hita leh, hi ta kei leh, mihing i hihna tungtawnin Pasian in thupha hong pia veve hi, cih theih ding kisam hi. Ahi zongin hih thu a tel thei lo mi tampi a omna pen lamdang mahmah hi. Mi pawlkhatte in thupha bek deih in thupha piapa phawk lo uh hi. Mi pawlkhatte leuleu in thupha cih lah thei lo (a ngah uh thupha pen kaam phatna hang (lucky) cita zen uh) in a pia pa thei lo kaanlai hi. Bangzah in dahhuai ahiam?
Thupha ngahna dingin thupha ngahtaak mi ihih ding kisam hi. Jacob Stam’ thungetna khat in, “Topa aw… hih nate khempeuh hangin kote thupha hong pia in. Ahi zongin hehpihna tawh kote thupha saantaak mi hong hisak in,” ci-in a thungen hi. Thupha saantaak mi hihna cih pen leitung’ mawhna le khialhnate nusia in Pasian’ sungah nuntak denna ahi hi. Tua bang hihna in Pasian leh ei hong kizomsak tawntung hi. Gentehna in Ruth thubu sunga Naomi in Pasian’ ciamsa gam sungah a om hangin ama lungsim sungah Pasian mun pia lo ahih manin thupha ngah lo hi. A lungsim Pasian a piak lohna in thupha saantaak mi ahih lohna thu bulpi ahi hi.
Bang zahta in mawhnei mi i hi zongin, khialhna i bawl zongin, Pasian kiangah kisikna lungsim takpi tawh ciahkik in, amah tungah bucing ki-ap theihna in Pasian’ maipha muhna le thupha ngahna ding lampi ahi hi (Isa. 55:7). Paunak in, “A khialhna a im mite a dau pailo ding a, a mawhna pulakin a kikhel mite in hehpihna ngah ding uh hi (28:13),” ci-in hong hilh hi. Thupha saantaak mi hihna dingin i sungtawng le i nuntakna kikhel ngiat ding kisam hi. Tua bang i hih leh mi khempeuhte’ san thuphate sangin a lianzaw, a cihtak zaw, a lungkim huai zaw thuphate Topa in hong pia ding hi. Bang hang hiam cih leh Pasian in, “a kitamzan le a kisikkik lungsimte nial ngei lo,” ahih man hi (Late 51:17).
Midangte’ ngah thupha sangin a cingzaw thupha i deih leh ei mahmah in thupha saantaak mi ihih masak ding thupi ahihna i gengen khin hi. Pasian’ thu mang loin, ama’ deihna pan pialkhia in, mawhna le khialhna i bawl den niloh leh ei pen thupha saantaak mi kihi lo ding hi. I mawhna le khialhnate Pasian kiangah thuumin thupha naak sungah lut ding kisam hi. Egypt gam nungngat sanin Canaan gamah mitsuan den ding kisam hi. Abraham le Jacob bangin Pasian biakpiakna ah zuat kik ding kisam hi (Pian. 12:1-4; 35:1). Thupha ngahna dingin Pasian’ thumang lo pi-in thunget den ding sangin, Pa Pasian’ deihna sungah lungsim pumpi bucing ki-ap in i om den leh thupha kicing takin ngah ding hizaw hi (Luka 15:17).
