Mu, Za, Thei, Paisuk, Sawl (Pai. 3:7-8)
Agelh ~Kap Za Khai (Photoh)
Paikhiatna 3:7-10 sungah Moses kiangah Pasian in a mite adingin amah ngiat in tavuan nei ahihna a genkhia hi. Israel mite’ gim thuakna, simmawh thuakna, lungsim natna le amaute’ kikona awte hangin Pasian in Israel mite hehpih in ama’ ciamsa gam ahi Canaan gam ah a paikhiat pih dingin Moses a sawl hi. Pasian in Israel mite’ thuakna tawh kisai in a gennate in;
Ka mite’ gimna ka mu khin (vs. 7)
Amau’ kikona ka za khin (vs. 7)
Amau’ thuaknate ka thei (vs. 7)
Egypt mite’ khut sungpan khahkhia in, bawngnawi le khuaizu luanna Canaan gam ah amaute a paikhiatpih dingin kong paisuk hi (vs. 8)
Israel mite na paikhiatpih theihna dingin Faro’ kiangah nang kong sawl hi (vs. 10) ci hi.
Nambat 1-3 in a mite’ thuaknate Pasian in tel sitset ahihna, a lina ah a mite’ gimna panin a honkhia dingin amah ngiat hong paisuk ahihna le a ngana ah a mite a paikhiat pih dingin Moses tungtawnin sawlin nasem ahihna kimu thei hi. Eite in haksatna thuakin Pasian kiangah i kiko simin Pasian in hong huh den hi: Vantung mite’ hotkhiat hi loin, Topa mahmah in amaute honkhia hi. A itna leh a hehpihna tawh amaute honkhia a, amah in a beisa hun khempeuh ah amaute hoihtakin a kem hi (Isa. 63:9).
Israel mite bangin midangte’ simmawhna, gawtna, le nuntak haksatna tuamtuam hangin na lungkia, lunggim in na cihmawh ciang tha la in la, Pasian kiang zuan in. Pasian in i lunggim haksatnate hong mu in eite hong mangngilh lo hi. I thuakna peuhpeuh ama’n zong hong thuakpih hi. Pasian in Israel mite’ thungetna dawngpah lo hi. Ahi zongin ama’n hun a sak ciangin a hoih penpen in a semkhiasakpa ahi hi. Israel mite’ gimna pan a honkhiapa in tuni i gimnate zong hong Mu, hong Za, hong Thei bek tham loin eite adingin amahmah hong Paisuk sakkhin a, eite sep zawhloh nate hong sepsak dingin a Tapa le Kha Siangtho hong Sawl khinlai hi (Pai. 3:8; Mk. 10:45; Jn. 14:16-17; Fil. 2:7).
