LUNGLENKAWL (HAUSAPI KAWL) AA PUPA TE' SAI BETNA THU
Agelh ~ Go Deih Mung (Laaitui)
Lunglenkawl
Lunglenkawl ih cihin gamsa namkim omna leh nidang aa Dawi te omna ci aa, Zogam sunga mun minthang leh Mual minthang khat ahi hi. Hih Lunglenkawl pen khuakhat gamsunga om hilo in, a kiim ah Suangbem, Tongciin, Pangmual, Kawlnuai, Bualtal, Tualkhiang leh Haiciin khua te aom hi. Hih Kawl kiimkot ah Tangha lui, Tuimang lui, Tuisa lui, Tuivali lui leh Tuikuii lui te luang aa, Kawl pana anak kipan aa luangsuk lui pen 'Tual Tong lui' kici hi. Banghang in 'Tual Tong Lui' kici hiam cihleh nidang lai in hih Kawl tawh kigaisai, Teikhang gam ah Leiva lui a om hi. Tua lui ah a thuk mahmah tuili khat om a, tua tuili sungah Tuili-cingh dawimangpa khat a om hi. Nikhat Leiva-lii dawi leh Lunglenkawl dawiputeekpa hong kido uh a, Leiva-lii dawi in Lunglenkawl dawiputekpa ii azi Tual Tong kici a thahsak hi. Lunglenkawl putekpa inzong hakkol tawh azi pua in Kawl dawn ah akahto hi. Kawlvum atun dektak laitakin a hakkol kitan sese aa, a zi kiatsuah kha in, a nuai aa lui sung a tu hi. Puteekpa in azi lakik zo nawnlo ahih manin lungleng khuangai lua in zingnisuah simin tua Lunglenkawl tunga suangdawk khat tungah tuu in a zi' kiatna lui a en niloh hi. Hun hong pai totoin nikhat, Putek tutna suangdawk leh Vanpi kikal ah Meiilompi kikhungsuk aa, tua Meiipi athen ciangin tua puteek zong kimu nawnlo hi kici hi. Tua akipan tudongin putekpa tutna pen 'Putek Kawl' 'Putekpa tutna Kawl' kici suak in, azi kiatna lui zong 'Tual Tong lui' kici suak hi.
Lunglenkawl pen Dawi leh gamsa tamna mun ahih manin "Hausapi Kawl" zong kici hi. Ih pu ih pa te in Dawi agenciang un aminsia in lo-ngam loin "Hausa" na ci uh hi. (Huihpi nung, guahpi zu lehzong Dawi gamta in na tuat uh ahih manin "Hausa damin pai in" ci in 'Hausa' kammal na zang uh hi.) Tua hi aa Dawi te tenna, omna mun acihnopna un 'Hausapi Kawl' ana ci uh hi. Nidang lai in hih Lunglenkawl ah Dawi te na omngei takpi aa, khatveivei ciangin Kawl tungzang Suangdawk te tungah sunkim ciangin Puandum, Puanlaisan peuh, Zutee leh Taiteh khawngzong kipho zel ci hi. Tuhun ciangin om nawnlo hi.
Lunglenkawl ii a nuailam ah gammang tulak, Taamdaam khat aom hi. Tua mun pen 'Zopi' kici hi. Hih Zopi munah Humpi, Sahang, Sazuk, Saza, Zangsial leh Saipi akipan gamsa namkim leh Vaphual te ateng uh hi. Tua manin muntuamtuam panin Salian mannuam te in hih gamsa kimna Lunglenkawl ah giakden in sa a beng uh ahi hi.
1. Tuithang Losau puten Lunglenkawl ah Sai a betna thu
Tuithang Losau pute in Sanvom galsimna ah gal luang 40 bang amat uh hangin amauzong luang 5 bang bei veve uh a, tuahsia kisa mahmah uh hi. Tua ahih manin a si teng phutuah nadingin Sai bet ding sawm uh aa, gamsa tamna Lunglenkawl mah a lunggulh pah uh hi. Pasal ngalhat kisa teng vakuan uh a, gam khai nadingin Voknodawng khat akeng uh hi. Lunglenkawl atun uh ciangin Kawl (Mual) zang ah kahto pah uh a, gam sung omzia a tel et kawikawi uh leh Guava kuaitan ziahziah Sai honkhat a gamta a tuak uh hi. Kilehkik phot uh a, nitum ciangin a Vokno puak uh go in, kuang 10 suah in luii uh a, gam a khai uh hi. Tua leh Uital lian mahmah khat hong pai in a omna uh vial 10 kimkot a, lungdamna meipek in a no hi. Tua khit phetin Taampi sungah lut in amangkik hi. Tua khit ciangin Zam, Kuang, Sialki leh Daktal kithuah aa kitum lianlian za uh a, a mun santak lah atheikei uh hi. Tua tumging pen zingsang Akmasa khuan ciangin a khawlpan hi. Khua avak ciangin zanni aa a Sai muh te uh zui pah uh a, pawlkhat in a nungpan zui in, pawlkhat in a mai ah ana khiangtan uh hi. A nung azui te in a kalkawm ah thaumuk a khumtheih masiah, a mai aa khiang te inzong a bil sungah thaumuk akhumtheih mateng in thauzangno meklo dingin kiciam uh hi.
Saisul azuihzuih uh leh Kawlzawi khat zui in Saite na tai uh a, a makhian ten tua zawi mahah na pang uh hi. Sai te in a mai aa pangte amuh ciangin Sai makai pen Kawlkeen ah tuak suk kha a, a nungzui Saidang tezong tuaksuk mang uh hi. Tua ciangin Saibeng tezong giahphual lamah ciahkik phot uh hi. Mei a tawhding ciangun a Sai uumna lam uah a Meisah (Tual meisah) a mansuah lam uh a phawk kha uh hi. A zongkik dingin a pai uhleh munkhat ah mi tawh akibang Suang tumpi khat a tuak uh hi. Tua Suangpi gei panin a mel kimu loin Uino khatin a naa hi. Tua Uino ham a zak ciangun lau uh a, "Ka Meisah mansuah uh a zong hi ung" acih uhleh a gei ua singkangkeu khat hong kuang ngiau a, tua mei la in Kawl nuai lamah a kum suksuk uh hi.
Kawl nuai a tun uh ciangin Sai tuahsukna lam zuanin a pai uhleh Sai te ahon atang in suangtum tuk bangin ana si pekpak hi. A za-ip tem uh tawh adawt masaksak uh, amau mat in kisimsak uh hi. Sai luang 9 pha a, a suakkhia dektak agailai khat tawh luang 10 aman uhhi. Tua bangin thau lawng khatzong ging loin Sai luang 10 amatna uhpen Lunglenkawl puteek kianga a gam khaina, ankuang kuang 10 a luina zah uh apia hidinghi kici hi. Hih banga Sai matna tawh kisai in Pu Awn Khai in la na phuak a;
Sai aw e sai mang aw e, na liat pal bang han pih cia.
Na liat pal bang hanpih ta cia, hawkguam nau bang sial ing e.
2. Laaitui gam leina Saihapaak ngahna Lunglenkawl
Khatvei Laaitui khuasat Pu Pau Suang (Gualnam) te Dimpi ah a omlai un, anaupa Pu Cin Lian leh a lawm te in Lunglenkawl ah Sai beng dingin a pai uh hi. A paina uhtawh kisai in Pu Ngaih Lian (Gualnam-Mitsum) in la na phuak aa;
Tuanglam ah gual in hon nial leh, Dimtui lunmang hing ci aw.
Dimtui lunmang hing ci aw, zaang ngawisai tawh gual nungciang ah hei ve aw.
Lunglenkawl a tun ciangun giahphual a satpah uh hi. A zingsang ciangin Sai zong dingin gam akuan uh hi. A paipai uh leh Taam lakah Sai ekkeu khat amu uh hi. Tua Sai-ek azuihzuih uhleh ni 4 bang a sawt hi. A ni 5 ni ciangin Sai gol mahmah khat in a Mawl tawh Gua-teh akai diatdiat amu uh hi. Tua ciangin Pu Cin Lian in "Maa Sai va zuan ning in ka thaugin na zak masiah uh, hilai ah na om un" ci in a lawm te a ngaksak hi.
Amahzong tua a Sai galmuh uh ava nehphei pah hi. Sai inzong a husa azak ciangin na pangpah aa, Saipi leh Pu Cin Lian a kimaituah pah uh hi. Sai in a mawl tawh satlum nuam leh a khe tawh tuanlum nuamin Pu Cin Lian abawh ziahziah hi. A sawt ciangin Pu Cin Lian in tua Saipi kalkawm ah lutphei in, a khaalkawm panin akaptoh leh Saipi zunbu kaptham lian ahih manin Saipi zong kipumpei in a tukpah biahbuah hi. Thauging azak uh ciangun Pu Cin Lian' lawmte zong thauginna lamah hong taipah uh a, ana lum vialvual Saipi a tuakpah uh hi. Tua ciangin Pu Ngaih Lian (Mitsum) in la khat tawh na kipsak pah a;
Nah singnuai sang namcih nawh nin, gual baanzaal ka eng lo e.
Gual baanzaal ka eng lo e, ngalliam baanzaal en ingh e.
Tua zawh ciangin a Sai sungkua teng khei pah uh a, Pu Sing Thuam (Evan Sian Lian Khup' pianna pu) in a sungkua teng la-khia dingin a gilsung ah a lut leh a Saisi in a kawng ciang tumhpah ma-lam in, a lu in Sai nungzang banto nailo lai hi ci uh hi. Hih Sai pen gol mahmah a, a Hapaak pen pi 4 a sau hi. Amau zong tuahpha kisa mahmah uh a, a khua uh Dimpi ah aciah pah vingveng uh hi.
Dimpi panin Pu Pau Suang (Gualnam) in gun-gal gam satnuam ahih manin a lawmte inn 27 tawh Dimpi pan dingkhia in, Kaptel hausa, a sunghpa Pu Thuam Thawng beel in, Kaptel gam Sihsip acihna munah kum 3 sung a ki-nga phot uh hi. Tua sungin Pu Pau Suang in Gungal gamnei Falam ukpipa Con Bik kiangah Pu Cin Lian in Lunglenkawl aa amat, Pi 4 asau Saihapaak tawn 2 masuan in Behiang kumsim (kum 3 sim) in Sialsiah, Mualgulh aa ding Sialpi khat tawh Laaitui gam a lei hi. Kaptel gam Sihsip ah kum 3 a omkhit uh ciangin 1874 kum in Pu Pau Suang in inn 27 tawh Laaitui khua asat hi.
(Behlap: Pu Cin Lian ih cihin Laaitui khuasat, Gualnam Pu Pau Suang' tapa 2na ahi hi. A minpi taktak Pau Khua Cin Lian hi a, a pu Sukte Gawh Pau (Mualbem ukpi) a tamh ahi hi. Muizawl khuasat Pu Am Thang' tanu Pi Cin Man (Col. Khen Za Moong' pi) tawh kiteng in tapa khat (Thang Kap) anei hi. Galhang mahmah ahih manin Dimpi ah a omlai un a pute, Mualbem Sukte te in Khuangleng khua asimh nadingun Lammapi dingin na zawn uh a, 1871 kumin Khuangleng khua na simhpih hi. Galhang bek hilo in sasiam mahmah khatzong hi a, Saipi leh Sapi tampi amat banah Thau paa lo in a khut bekbek tawh Vompi 10 man zo hi. Galhang Sasiam ahih banah mi-ngalhat, mi-gualhuai leh miciim mahmah khat ahih manin Laaitui khua akisat tuungin Pu Ngaih Lian (Gualnam-Mitsum) tawh khuasung lutna, Kanh kongpi a pua-lam ah innkhat tuamlam in, gal leh sa panin khua leh tui ahung akem dingin khuacingh (khua kongpi cingh) in na om uh hi. Hih tawh kisai in Pu Ngaih Lian in la na phuak aa,
Na vang thal bang suang ing e, na nen ah sau phei sa'ng e.
Kamkei leh do a lan leh e, ih nihgel in pal bang nang ta ning cing e.
Hih banga akipiakkhiatna leh khualehtui a hutna hangun khualehtui inzong na zahtak mahmah uh a, zu-masa, sa-masa na pia tangtang uh hi. Hih tawh kisai in Pu Ngaih Lian in la na phuak a;
Siing in gen e gual in gen ee, na min zotaang bang pha e.
Na min zotaang bang pha e, kiakna ding aa, kamkei gial daidual aw e.
Khatvei a sabetna ah Vompi tawh kilai in, Vompi in a khukkep na pehsak kha in, tua meima tawh Pu Cin Lian a nuntakna a bei hi. Amah asih ciangin a lawmpa Pu Ngaih Lian in ngailua ahih manin hibangin la na paih hi.
Vaagkhua tumdang tuanglam tunsau, sang lambang kizong mawh e.
Kiaknua vaitho hambang dal ding, na zua laaizom sen ninu na ngai nam aw.
Pheiphung suan lo bang na lelh leh, ngawisai tungah tuang ve aw.
Tuanglam ah tullim a om leh, ngaih aw vaibang na thaamlo aw, pheiphung suan zaansa hi cia.
Thutawkna te;
Sia Suan Nang, Haiciin EBC Pastor pa' hong genna pan,
Haiciin Suan, Mawngnel Magazine, 2019 sungpan,
Tuithang Khua tangthu bu pan,
Laaitui aa tangthuthei, Pu Thang Khan Khup (Gualnam) hong genna pan,
Tedim aa Pu Cin Sian Pau (Gualnam) hong genna pan,
Pu Pau Za Mung' laibu "Laaitui khua Mualsuang (Unpublish)" pan.
