BANGHANG IN LAI SIM HUAI HIAM?
Agelh ~Kap Za Khai (Photoh)
Ahuampi in gen lehang ei Zomite pen laisim a uuk kitam lo a, lai zong thupi kisa khollo hi. Tua hangin i minam sungah lainasepna kizekai in, laigelhte leh laibu bawlte bang kisuplawh hun tampi om hi. Ahangin lai ii thupitna leh a tangzaina i theihloh man hikha dingin ka um hi. A taktakin laisimna pen a thupi mahmah nasep khat hi. Mihing khat ihih nak leh i khantoh nading leh i picin nadingin laisimna tawh lungsim leh khuak-an i zon ding ahi hi. Hiah ei Zomite bang hangin lai simsim huai hiam cih thu tawm i en ding hi.
A. Mi khempeuh Lungsim Vitamin kisam hi
Revd Dr. Chin Do Kham in “Ei mite (Zomite) zawnna pen sumlepaai zawnna hi loin ngaihsutna (idea) zawnna hi. Leitung hong kipia zonga bangmah suahlo ding hi hang,” na ci hi. Ngaihsutna zawnna pen lungsim le khuak zawnna pan hong piang hi-a, Dr Johnson pulakna bang hi leh “Lai sim nuam kei leng pilna (lungsim le khuak an) kinei theilo hi,” cih in i zawnna ahang bulpi hong theisak hi. Taksa pumpi’ an ding bekbek kizong a, ahi zongin lungsim le khuak an ding kizong lo ahih manin Zomite na khempeuh ah kiam in kizawng takpi hi.
The Art of Living a gelh France laigelh siampa Andre Maurois in “Lungsim khempeuh pen amau tawh kituak an (thahatna an-vitamin) kisam hi,” na ci hi. Himah hi. Lungsim vitamin a neilo lungsim pen thanem hi, hawm hi, pilna le ciimna theilo hi, thungaihsutna le geelna-ah peeng hi, tatsiamlo (uncivilized, wild-minded), muhkholhna (vision, dream, ambition) nei lo hi. Hihte khempeuh hongdim sak thei pen in laisimna hi. Zawnna khempeuh ah lungsim le khuak zawnna mah lauhuai pen, thudon huai pen hi.
B. Minampi Hihna hong kiciansak hi
Mi nampi hihna sungah ngeina le lai pen a thupi pen ahi hi. Lai in ngeina kem thei, kizel sak thei, puahpha sak thei hi. Minam le ngeina a kipna le a nuntakna pen lai tawh ki-en thei a, teci ci leng zong kikhial lo ding hi. Lai neihna le simna pen minampi hihna ahi hi. Lai neilo minam pen minam picing in kiciamteh ngeilo hi. Tua ahih manin Zomite minam picing/nampi ihihna pen i neih zolai le zolai tawh kigelh le kibawl laibute in teci ahi hi. Minampite in a lai uh it uh hi: lai itna cih thu-ah gelhna, bawlkhiatna le sim tangtangna cih in a thu laigil hi. Lai simsimna pen lai a nungta saksak hi-a, a kisim lo lai pen a nungta lo lai hongsuak ding hi (eg., old Greek (NT)). Eite pen lai i neihzawh kum 100 valta ihih manin lai neihna lam-ah ki-upa pianta a, minampi khat hihna tawh laisim huai mahmah ta hi. Lai in mihing khatkia nuntakna le a huampi nuntakna hong puahpha thei hi. Tha hongpia thei hi. I hihna a mangthang loh nadingin hong kepsak hi. Tua ahih manin lai simsim huai hi. Lai sim tangtangna pen mipi lungsim neihna ahi hi (Sawl 17:11).
C. Pilna Manpha Ahihman hi
Kawlgam laigelh siapa Phe Myint in, “Knowledge kici theihna a kikhol semsem ciangin Wisdom kici pilna hong piang hi. Laisimte adingin a thupipen letsong in hih wisdom ahi hi,” na ci hi. Pilna pen ol tak-a ngah ziauhziauh theih hilo ahihna hongtel sak hi. Hih in pilna manphatna hong lak hi. Pilna pen zontawm kul hi. Ei adingin pilna khuk ahi laibu hoih tampi nei ihih manin laisimna tawh pilna kizong/ngah thei hi. A sangna a tung mipil mi ciim khempeuh in pilna manphatna thei kim ciat uh a, tua pilnate pen laisimna tawh kingah thei hi cih zong thukim uh hi.
Leo Buscaglia in, “Theihna cih pen bangzah in a neu a tawm hangin, mihingte dinmun lui pan laptoh zawhna thahatna nei hi,” na ci hi. Rev Dr Chin Do Kham kiangah “Pawlpi kem sia pawlkhatte in laibu dangte (biakna laibu ahi lote) sim kullo a cihna tungah bangci sa na hiam,” ci-in a kidot leh Siapa in, “Tua pen khial mahmah hi. Pilna pen lai sungah om hi. Laibu khempeuh sungah ci keng. Lai hoih laibu hoihte sungah hi (Grace Family Newsletter, 2011, Jan-Feb. interview by the editor).”
American (16) na kumpi ahi Abraham Lincoln in a kumpi suahma, Illinois gam, Sangamo mipite kiangah a thugenna khat-ah, “Pilna (education) pen mi khempeuh tawh kisai a thupi mahmah thuguipi hi. Mi khempeuh in a laihawl pilna ciang nei kim thei kim leng hoih hi. Tua hi leh bek i gam le gam tuamtuamte’ tangthu-te sim thei dinga, tua bang simna panin a suakta i gam ii manphatna kithei kimciat pan ding hi. Biakna le mihingziate kitel dinga, tua hangin kipakna lungsim i ngah ding hi. Pilna le amah tawh kizom thute hangin vang neihna, ciimna, ngaihsut bawlkhiatna (invention), set tawh kisai khantohnate tawh a nopci mahmah hunpi khat-ah i tun ding kal ka mu nuam mahmah hi,” a ci hi. Pilna pen manpha mahmah hi. Lai Siangtho in zong “Pilna le thu ngaihsut theihna na neih nading hahkat in (Pau 4:5).” “Na neih khempeuh na bei lawh zongin pilna zong ding (Pau 4:7),” ci hi. Pasian kiangpan hong pai pilna zong zon kul a, sang lai (education) zong zonmah a kul vive ahihna phawk den leng hoih hi.
Pasian hong piak pilna a bulphuh leitung pilna neih ding thupi hi, ci-in Dr. Do Sian Thang in gen hi. Solomon kumpipa in Pasian kiangpan a ngah pilna tawh Pasian vangliatna le a hehpihna a theihteel bangin leitung pilna tawh leitung hoihna a ngaihsun thei hi. Hih pilna nih khentuam loin gawmkhop den ding hizaw hi. Bang hang hiam cih leh a nih in ngah ding haksa bek tham loin leitungah a manpha bel ahih man ahi hi.
D. Ei le Ei Kipantahna hi
Sengam sungah mission nasem Neil Vel Yed in Sengam sungah Khristiante tungpan in Pawlpi nuntakzia ding thu thum hong mukhia hi. Tua thum-te in;
Self- governing (Ki-uktawm)
Self- supporting (Kisiktawm)
Self- propagating (Kipuaktawm) cih teng hi-a, tuhun ciangin mipilte in khat behlap uh a, tua in;
Self-theologizing (Kitheitawm)
Hih teng li pen Pawlpi nuntak kalsuanzia ding bek tham loin mimal khatciat ii nuntak pih ding thu hoih zong ahi hi. Gam le Pawlpi sungte ah Makai sepna, Sumlepaai zonna le zeekna, thuhilhna, cihte ah ei le ei kipattah theih ding thupi lua mahmah a, laisimna bek-in hong hisak zo pen ding ahi hi. Pilna tawh ki-uktawm, pilna tawh kisiktawm, pilna tawh kipuaktawm le pilna tawh kitheitawmna kan-a a manpha zaw om lo ding hi. Laibu khat i sim leh pilna honkhat i ngah dinga kipattahna honkhat hong gualzo sak ding hi.
Midangte tungah kingak pen hoih hi. Tua sangin ei le ei dingtawm zoleng hoihzaw sem lai hi. Midang tungah kingakna pen naupangvai hi a, ei le ei dingtawm theihna pen picinna ahi hi. Midangte’ vaksa in om niloh leng hun khat ciangin kipuk thei a, ei le ei kivak leng an dim semsem ding hi. Cihnopna ah ei le ei kisik zo, kivak tawmzo, ki-uk tawm zo cih ciang bekin na khempeuh hong lem (OK!) pan ding cihna ahi hi. Midangte huhna le panpihnate kisam lo cih hi masa lo a, a tawntungin midangte’ nak tawh huihdiik lo ding cihna hizaw hi. Ei mahmah in i huan sungah anteh le mehteh ciingin, ei mahmah in anhuan ngiat in ei le ei an kivak theihzawh ding pen tuhun ciangin a kisam penpen hongsuak hi.
E. Ei le ei Pilna zonna hi
Gisbon’ genna bang hi leh, mi khempeuh in pilna namnih nei uh a, mi dangte tungpan kingah (sangkahna, tintan kahna, etc) pilna le tua sang a thupizaw in ei le ei’ zontawm pilna (laisimna, video etna pan, etc...) hi.
Philip Curtis in zong, “Laibusal le laibu sungpan pilna a zong tawmte pen Certificate khat peuhpeuh ii phattuam pihna a ngah loh uh hangin mi manpha hihna lam-ah Certificate nei-te sangin niamzaw tuanlo uh hi. Sepna le bawlna ah gualzawhna ngah le ngahlo cih pen Certificate neihna sangin sunglam pilna le mi mannei hihna tungah kinga zaw hi,” na ci hi.
Hun simin pongman lai a simte pen University a certificate ngahte sangin muhna le theihna, pilna le cimna, ngaihsut theihna le sep theihna ah khua-val veve uh hi. Hih in ei le ei pilna zonna ii manphatna ahi hi. eg., American mi Hugo Azelbarack pen university zong a kahngei mi hi lo na pi-in American Athet-Hluttaw dongah a kahto zo pa ahi hi. Amah’n ni khat in nai khatta pelh loin Congress laibu sal ah laisim den hi. Nasep tam ta leh tawm ta leh nisim a laisim pelhsak ngeilo hi. Kum tampi sungin laibu tampi a simna hangin theihna leh teelna tampi hong ngah a, American Thukhen mangpi a suak ciangin ama pilnate American gambup in phattuamna leh noptuamna tampi ngah lawh uh hi. Hih in ama hun zeeksiamna hangin a gahkhia gah ahi hi.
F. Khantohna Lim Hi
Tuhun ciangin gam khat khangto leh khangto lo cih kigen ciangin “lai sim zah (Reading Rate)” in zong hong sai mahmah ta hi. Gam khat ii khantohna le ahauhnate a kiteh ciangin GDP, GNP kicih-te tawh a kiteh theih bangin Laisim zah (Reading Rate) pen zong gam khantohna tawh kikhen theilo ahina mangngilh loh ding kisam hi. Tuhun a khangto mahmah gamte en lehang a lai sim zah uh sang mahmah ahihna kimu thei hi. Lai sim kiam semsemna gam le lai sim tam semsemna gamte a khantohzia uh kilam dang mahmah hi. A baihzaw in hi leh lai sim lo mi khat thugen le lai sim mi khat thugen pen a thusun le a thu limna kidang mahmah hi. Francis Bacon in, “lai simna in hong kicing sak hi” ci hi.
Leitungah Israel mite pen laisim pen minam in kiciamteh hi. Amau 14 a phak nakleh nulepate in a tate laisim dingin pantah uh hi. Kum 14 tungsiah limlim in kha khat in laibu bu khatta sim hamtang uh hi. Nulepate in laibu tungah khuaizu zut in a tate uh naamsak in, tua bangin laibu pen it huai hi, ci-in tate lai-uuk in lai a it theih nadingin pantah uh hi. Amau ngaihsutna ah laibu sungah pilna kikoih a, tua pilna pen suangmanpha sangin manphazaw cih hi (Pau. 3:15). International Reading Rate thukanna bang hileh, Korea mite khat in kum khat sungin laibu 11 sim hi. Piantit mi khat in kum khat in laibu 8.4 sim hi. Japan mi khat in kum khat in laibu 8.5 sim hi. Israel mi khat in kum khat in laibu 64 sim hi. Khutdawhngente nangawn laibu tawh kipelh lo uh hi, ci hi. Germante laibu tawh kithuah den uh hi. Mipil gam, a khangto gam mite in a omomna, a khawlkhawlna mun ah laisim ciatciat uh hi. Zuminia gamah kumpite in bus tuankhawm-a laisimte bus-sap la lo hi.
G. A Thu le Ahang theih loh manin Sim kul
Banghang in lai sim kul hiam cih leh a kulna a hang theilo ihih manin i theih nadingin lai sim a kul ahi hi. Ahang le a thu pen kizom den hi. Cina ahih manin zatui a nekkul hi. Pahtawina tampi a ngahna pen nasepna ah a cihtak man hi. Tua leh banghangin Zomite lai sim kul hiam? A kulna ahang le a thu i theihcian nai loh manin i sim kul hi. Zomite zungthuk thungaihsutna (critical thinking) lam-ah i tun zawh nailohna, minam picing ihih zawh nailohna, lung kituak lohna (a thu) pen laisim mimal kitawm mahmah in, lai tawh pilna zong kitawm mahmah in lai i thupi sim nailoh man (a hang) ahi hi. Banghangin nang lai sim kul mahmah ahiam? Na theih nopna tu-in lai sim kipan hi. A sawt lo-in a thu le ahang na thei ding hi.
H. Teel Ding (Choice) A Tamluat Man
I tenna leitung pen teel ding bekbek tawh kidim in, teel ding tamlua hi. Nekledawn, silhleteen, hawhna le ciahna cihte a kipanin ahoih le apha teel ding vive himai hi. Ngaihsut tawh kisai ahi zongin, zi le pasal tawh kisai ahi zongin, nuntakna tawh kisai ahi zongin, pilna tawh kisai ahi zongin, i teel ding tamlua mahmah hi. Ahoih le ahoihzaw deuh kikal, a sia pen le a sialo zaw deuh kikal cih bangte ah teelsiamna kisam hi. Pilna thu laigil in bang ahiam? Dr. Do Sian Thang’ genna ah pilna thu laigil in “teelsiamna” na ci hi: teel ding a sia nih lakpan a sia lozaw deuh teelsiamna, le ahoih nih lakpanin ahoihzaw deuh teelsiamna, cih hi.
Leitung thu sangin kha thu teel zawkna, tawmvei sung ading sangin khantawn ading teelzawkna, a puatham bulphuhna sangin a sunglam laigil hoihna muh theihzawkna, kimlepaam donlohna panin kimlepaam kepcing nopna, Lai Siangtho simna bek panin nuntakpihna, Khristian hihna bek panin Khrih’ nungzui suahna, cih bangin ahoihzaw teelsiamna in pilna manphatna ahi hi.
Laisimna le pilna zonna in vantunga a lenglai vasa hong matsak zawhloh hangin i lutungah bu a bawl loh nadingin hong kidalsak thei hi. I neih i theih ding leh i neih lohte lunggulh loh ding hong hilh sawnsawn lai ahi hi.
Cihsa mah bangin i nuntakna pen teel ding vive tawh kidimden a, i nuntak nak leh teel loh a phamawh vive hong suak hi. Tua bang hun ciangin bang bulphuh in teelna i nei ding hiam: pilna bulphuh in maw ahihkeh a dangdang bulphuh zaw ding? I theihkhialh loh ding thu ah, pilna bekin eite ahoih pen hong teelsak thei pen ding hi, cih thu ahi hi. Tua teelsiamna pilna pen laisimna tawh zon ding thupi hi. Teelsiamna pen simsiamna tawh kopkhawmsak ding ihi hi.
A kuamah khempeuh pen zingthawh hun sangin nitak luphun pen pilzawk ding kisam hi. Zani a sangin tuni i pilna kibehlap huaita hi. Pilna leh theihna tawh ki-uk, kido, kidemna hun sungah laisim lo, thukan loin omna pen mimal leh minam kiamsuknapi hi thei hi. Zomite minam khangcing i suah semsem nadingin pilna leh theihna, thumuhna leh ciamna kisam mahmah hi. Laisimna tawh lungsim leh khuak thahatna pia ni.
Laibu hoih mahmah khat sim dikdek phot in.
Tua laibu sungah pilnate la siam photphot in.
Tua hi leh lai simna tunga pilna manphatna le
lai simna manphatna na tel pan ding hi.
